Mwana naazyalwa, bazyali balakonzya kukkomana kapati alimwi akulimvwa kuba amukuli. Mbomuli bazyali bapya, mulakonzya kugambwa kubona kuti ciindi cinji cimanina mukulanganya mwanaanu. Kutaona alimwi akucinca mbomulimvwa cilakonzya kuleta buyumuyumu mulukwatano. Nyoonse nyobilo muyooyandika kucinca zintu zimwi kutegwa mumubikkile maano mwanaanu alimwi akubamba cikwati canu. Mbuti lulayo lwamu Bbaibbele mbolukonzya kumugwasya kulwana buyumuyumu oobu?

NCOLYAAMBA BBAIBBELE: “Luyando lulakkazyika moyo alimwi luli aluzyalo.” Alimwi luyando “talulibikkili buyo maano lwini, talukalali.” (1 Bakolinto 13:4, 5) Mbwaanga muli mutumbu, mulatalika kubikkila kapati maano mwanaanu. Nokuba boobo, mulumi wanu inga watalika kulimvwa kutabikkilwa maano, aboobo mutalubi kuti awalo uyandika kubikkilwa maano. Kwiinda mukukkazika moyo akuba alubomba, inga mwamugwasya mulumi wanu kulimvwa kuyandwa alimwi akuba alubazu mukukomezya mwanaanu.

“Nywebo nobalumi, amuzumanane kukkala mbubonya oobo ambabo kweelana aluzyibo.” (1 Petulo 3:7) Amuzyibe kuti mukaintu wanu unoomanina ciindi cinji kulanganya mwanaanu. Ujisi mikuli mipya alimwi ulakonzya kukatala naa kutyompwa kapati mumizeezo. Ziindi zimwi ulakonzya kumukalalila, pesi amubatame nkaambo “uumuka kukalala mubotu kwiinda mulemu.” (Tusimpi 16:32) Amubelesye bupampu akumugwasyilizya.—Tusimpi 14:29.

NCOMUKONZYA KUCITA:

• Mulumi: Amugwasye mukaintu wanu kulanganya mwanaanu naaba masiku. Amucesye ciindi ncomucita zintu zimwi kutegwa mube aciindi cinji cakuba antoomwe amukaintu alimwi amwanaanu

• Mukaintu: Ciindi mulumi wanu nayanda kumugwasya kulanganya mwana, amulutambule lugwasyo lwakwe. Ikuti taacita kabotu zintu, mutamunyemeni pe, pele caluzyalo amumutondezye mbwayelede kucita

NCOLYAAMBA BBAIBBELE: ‘Bayooba nyama yomwe buyo.’ (Matalikilo 2:24) Nokuba kuti kwazyalwa mwana mumukwasyi amuyeeye kuti nywebo alimwi angomukwetene limwi mucili “nyama yomwe.” Amucite zyoonse nzyomukonzya kutegwa muyumye cilongwe canu.

Nobamakaintu, amutondezye kulumba kujatikizya lugwasyo ndwamupa mulumi wanu. Majwi aanu aakulumba alakonzya ‘kuponya.’ (Tusimpi 12:18) Nobalumi, amumwaambile mukaintu wanu mbomumuyanda alimwi ambwayandika kulindinywe. Amumulumbaizye kujatikizya mbwaulanganya mukwasyi.—Tusimpi 31:10, 28.

“Umwi aumwi kayandisya kugwasya bamwi ikutali buyo kuligwasya lwakwe mwini.” (1 Bakolinto 10:24) Lyoonse amumucitile zintu ziinda kubota ngomukwetene limwi. Antoomwe kamujana ciindi cakubandika, kulumbaizyanya alimwi akuswiililana. Mutanoolikkomanisyi buyo nobeni caboola kumakani aakoonana. Amubikkile maano kuzintu nzyayandika ngomukwetene limwi. Bbaibbele lyaamba kuti: “Mutaimani pe, ccita buyo kuti mwazuminizyanya.” (1 Bakolinto 7:3-5) Aboobo makani aaya amwaabandike camoyo woonse angomukwetene limwi. Kukkazika moyo kwanu alimwi akumvwisya umwi aumwi mbwalimvwa kuyooyumya cilongwe canu.

NCOMUKONZYA KUCITA:

• Lyoonse amujane ciindi cakuba antoomwe angomukwetene limwi

• Kamucitilana tuntu tusyoonto-syoonto itupa kuti ngomukwetene limwi alimvwe kuti mulamuyanda, mbuli kumulembela kagwalo naa kumupa cipego nociceya

NCOLYAAMBA BBAIBBELE: “Kuzwa kubuvwanda ulaazyi malembe aasalala, aayo aakonzya kukupa kuti ube musongo kutegwa ukafwutuke.” (2 Timoteyo 3:15) Amuyeeye ncomukonzya kucita kutegwa mumuyiisye mwanaanu. Ulaanguzu zigambya zyakwiiya zintu noliba leelyo katanazyalwa. Kacili mwida, mwanaanu ulakonzya kulizyiba jwi lyanu alimwi ulakonzya kutobelezya mbomulimvwa. Kamumubalila ciindi nacili muvwanda. Nokuba kuti takonzyi kumvwisya nzyomumubalila, cilakonzya kumugwasya kuyandisisya kubala aakukomena.

Nokuba kuti mwanaanu ucili muvwanda, ulakonzya kumvwa nzyomwaamba kujatikizya Leza. Amuleke kuti mwanaanu amvwe ciindi nomupaila kuli Jehova. (Deuteronomo 11:19) Nociba ciindi nomusobana antoomwe, amwaambe kujatikizya zintu Leza nzyaakalenga. (Intembauzyo 78:3, 4) Mwanaanu nayaabukomena, uyoobona mbomumuyanda Jehova alimwi awalo uyoocita mbubonya.

NCOMUKONZYA KUCITA:

• Cacigaminina amupailile busongo kutegwa mucikonzye kuyiisya mwanaanu

• Kamumwaambila cakwiinduluka-induluka majwi alimwi amizeezo iiyandika kutegwa atalike kwiiya kacili muniini