Lufwu Sena Ngamamanino Aazyintu Zyoonse?

MU February 1987, mudaala umwi wamyaka iili 85 wakaleka kubelesya muncini wakali kusalazya insa zyakwe alimwi iwakali kupa kuti azumanane kupona. Nikwakainda nsondo zyobilo wakafwa aŋanda mwanaakwe musankwa kalangilila.

Kakusyeede buyo ciindi cisyoonto kuti afwe mudaala ooyu, wakabandika amwanaakwe kaambo kamwi nkobakabandikide kakuti: Sena bafwide balakonzya kupona alimwi? Bausyi musankwa ooyu bakaliyiide kapati pele tiibakali kusyoma zyintu nzyobasyoma bamwi. Bakali kusyoma njiisyo yakusanduka kwazyintu alimwi bakali kusululwa akaambo kakuupaupa ameso kwabasizikombelo. Mudaala ooyu wakali kwaamba kuti tacikonzyeki kuzyiba naa Leza nkwali naa pe.

Mukusola kuumbulizya bausyi akubapa bulangizi, imwana musankwa wakabaambila bausyi kuti bafwide balakonzya kupona alimwi. Nobakali afwaafwi kufwa, bausyi bakaamba kuti bakali kuyanda kupona alimwi, kabajisi nguzu alimwi kabataciswi.

Kuumbulizyigwa Notwafwidwa

Ibwini mbwakuti, ibunji bwabantu balayanda kupona alimwi kabajisi nguzu munyika yaluumuno. Ibbaibbele lyaamba kuti bantu baliindene abanyama “batakwe muyeeyo.” (2 Petro 2:12) Ibantu bafwa tulabazikka. Tulaakuyeeya zyintu ziya kucitika kumbele. Tatuyandi kucembaala, kuciswa akufwa. Nokuba boobo, eezyi nzezyintu zitucitikila.

Twayeeya kuti tuya kufwa naa lufwu lwabantu mbotuyanda, citupa kutyompwa. Nokuba boobo, Ibbaibbele litukulwaizya kutatyompwa notwafwidwa kwiinda mukwaamba kuti: “Kuya kuŋanda yadilwe nkubotu kwiinda kuya kuŋanda yakusekelela.” Kumane lilati: “Nkabela baumi baleelede kubika moyo kuliceeci.” (Mukambausi 7:2) Ino nkaambo nzi makani aajatikizya lufwu ncotweelede kwaabikka kumoyo naa kwaayeeyesya?

Nkaambo kakuti twakalengwa munzila yakuti katuyanda kupona buumi bukkomanisya alimwi muluumuno. Kunyina uyanda kufwa. Imakani aakuti bumwi buzuba tuya kufwa tatwaayandi kwaamvwa. Ikupandulula kaambo aaka, Ibbaibbele lyaamba kuti: “[Leza] wabika bulangizi bwabuumi buteeli mumyoyo yabo.” (Mukambausi 3:11) Ncotuyanda mbuumi, tatuyandi kufwa pe. Amuyeeye kaambo aaka: Ikuti Mulengi naatakatulenga amuzeezo wakupona kukabe kutamani, sena notwali kulombozya kupona? Sena bafwide balakonzya kupona alimwi akuba abuumi bwalukkomano kakunyina kuciswa?

Kaambo Katupa Kusyoma

Imwakali, magazini yakamwaigwa aba American Association of Retired Persons iitegwa AARP The Magazine yakajisi cibalo cakuti “Life After Death” (Kupona Alimwi). Bantu banji ibajisi myaka iinda ku 50 nibakabuzyigwa-buzyigwa, “ibunji bwabo (73 pesenti) basyoma kuti bafwide balakonzya kupona alimwi.” Kulubazu lumwi, magazini eeyi yakaamba kuti ibasyoonto buyo (25 pesenti) basyoma kuti ikuti bafwa ngamamanino azyintu zyoonse. Pele sena masimpe kuti eeci ncecico ncobayanda kusyoma bantu?

Mucibalo nceena eeci, kwaambwa kuti Tom, muna Katolika waku New York wakati:  “Toonse tulizyi kuti bakambausi balaakukambauka kuti bafwide balakonzya kupona alimwi. Ncondikonzya kwaamba ncakuti bantu bayiisya njiisyo ziindene-indene. Umwi aumwi weelede kulisalila makani ngayeelede kusyoma. Mebo ndilaakuunka ku Misa. Ibuumi mbondipona bulakonzya kupa kuti ibamwi bayeeye kuti ndilasyoma mububuke, pele nsisyomi kuti bafwide balakonzya kupona alimwi. Ikuti naa bafwide balakonzya kupona alimwi, nkokuti eeco ncoolwe.”

Mbubwenya mbuli Tom, ibanji tabasyomi kuti bafwide balakonzya kupona alimwi mbubwenya mbocakabede kumudaala waambwa kumatalikilo aacibaalo eeci. Ibunji bwaziindi wakali kwaambila mwanaakwe kuti, “Bukombi bugwasya baabo batakonzyi kuliyumya caboola kulufwu.” Nokuba boobo, mudala ooyu abantu bamwi batakali kusyoma, bakazyi kubona kuti ikusyoma Mulengi singuzu zyoonse kupa kuti cikonzyeke kumvwisya zyintu zimwi zigambya.

Mucikozyanyo, nokwiinda buyo nsondo zyotatwe kuzwa buzuba bwakumita, nsalalila ilatalika kuba atubeela-beela tupanga bongo. Tubeela ootu tulalicimbaula cakufwambaana cakunga zimwi ziindi inga tusika ku 250,000 muminiti yomwe buyo! Kwainda myezi iili fwuka, mwana ulazyalwa kajisi bongo bugambya ibukonzya kumugwasya kwiiya zyintu zinji kapati. Haazibwene mumakani aabubambe bwazyintu zipona wazyina lya James Watson wakaamba kuti ibongo bwabantu “ncecintu ciinda kugambya akati kazyintu zyoonse zibakajana mububumbo.”

Bayeeya zyintu zili boobu, ibanji balagambwa kapati. Sena andinywe mulaakugambwa? Sena ikuyeeya zyintu eezyi kwamugwasya kujana bwiinguzi bwamubuzyo ngwaakabuzya mwaalumi umwi kaindi kuti: “Kuti naa muntu wafwa, sena uyoopona alimwi?” Imwaalumi ooyu wakamwiingula Leza kasinizyide kuti: “Waakundiita, njooingula, uyoondiyandisisya ndemulengwa wako.”—Jobo 14:14, 15, BT.

Masimpe, eeci ceelede kutukulwaizya kulanga-langa bumboni butupa kusyoma kuti bafwide balakonzya kupona alimwi.