Nzila Yaciloba: Ntalisyo Njumu

Ncocaamba eeci. Mayake mayumu oonse, mbuli ŋanda, ayandika ntalisyo njumu kutegwa atawi nokuba kuti kwainda myaka minji. Mbubonya buyo, ikutegwa mukwasyi uzumanane kuyuma, uyandika ntalisyo mbotu. Mikwasyi ilakonzya kuzwidilila ikuti yatobela malailile aagwasya.

Ino nkaambo nzi ncociyandika eeci? Kuli mabbuku manji amapulogilamu aacipekupeku aapa malailile aajatikizya bukkale bwamumukwasyi. Basikupa lulayo bamwi bakulwaizya banabukwetene ibatamvwani kuti bazumanane kukkala antoomwe, kakuli bamwi babakulwaizya kuti baandaane naa kulekana. Basyaazibwene mumakani aaya balacinca-cinca mbobazibona zyintu. Mucikozyanyo, mu 1994, syaazibwene mumakani aajatikizya mapenzi aabakubusi wakalemba kuti, kumatalikilo aamulimo wakwe ooyu wakali kuyeeya kuti: “Inga cainda kugwasya kuti bana kabakkala amuzyali uuli alikke pele uukkomene, kwiinda kukkala abazyali boonse bobile pele kabatakkomene. Ndakali kuyeeya kuti cilainda kugwasya kulekana muciindi cakuzumanana kukkala antoomwe mulukwatano luzwide mapenzi.” Nokuba boobo, nokwakainda myaka iisika ku 20, mukaintu ooyu wakacinca mbwazibona zyintu. Wakaamba kuti: “Kulekana kulabanyonganya kapati bana banji.”

Mizeezo yabantu ilacinca, pele malailile mabotu aakonzya kugwasya ngayaayo aaendelana lyoonse anjiisyo zili mu Jwi lya Leza, Ibbaibbele. Nomwali kubala zibalo eezi zitobelene, mweelede kuti mwabona njiisyo zyamu Bbaibbele izilembedwe atala amapeeji 3 kusikila ku 8. Injiisyo zili boobu zyagwasya mikwasyi minji kuzwidilila. Mikwasyi eeyi ilijisi mapenzi mbubonya mbuli mikwasyi iimbi. Pele lwiindano ndwakuti, mikwasyi eeyi yagwasyigwa a Bbaibbele kuba antalisyo njumu yalukwatano abukkale bwamumukwasyi. Inzya, Ibbaibbele lilagwasya kapati, nkaambo Sikwaanza Bbaibbele, Jehova Leza ngowakatalisya mukwasyi.—2 Timoteo 3:16, 17.

Amusole nzila eeyi. Amulembe mulongo wamagwalo aalembedwe atala amapeeji 3 kusikila ku 8. Amuyungizye amagwalo aambi aamugwasya. Amwaayobole magwalo aaya, akwaabala ciindi aciindi.

Amusale cakucita. Amube amakanze aakutobela ncolyaamba Bbaibbele mumukwasyi wenu.

 [Cifwanikiso icili apeeji 8, 9]

Ikuti mukwasyi wenu kautobela njiisyo zyamu Bbaibbele, uyakucikonzya kuliyumya mumapenzi mbubwenya mbuli ŋanda iijisi ntalisyo njumu mbwiitakonzyi kuwa ciindi caguwo