Bamukabunga ka World Health Organization baamba kuti kuyoya busi buzwa kumincini iibelesya mungwimba wadizilo nkokupa kuti bantu banji kabaciswa bulwazi bwakkansa yakumapunga alimwi zimwi ziindi abulwazi bwakkansa yamucisubilo.

Bungu bwakaangana ibwakajanwa kunkomwe aalwizi butondezya kuti kaindi, tukunka alimwi azisamu zijanwa mazuba aano mumasena aakasaala, zyakali kumena kucooko ca Antarctica. Bantu banji basyoma kuti kaindi ziindi zyamupeyo ku Antarctica tiikwakali kutontola kapati alimwi “kwakanyina caanda,” alimwi mbokutontola akukasaala kubusena oobu tiikwakaindene aku equator.

Lipooti yakapegwa mu 2012 abamukabunga ka Ireland’s Association of Catholic Priests, yakatondezya kuti 87 pesenti yaba Katolika bamucisi eeci baamba kuti bapaizi beelede kuzumizyigwa kukwata; ibali 77 pesenti baamba kuti bamakaintu beelede kuzumizyigwa kuba bapaizi.

Buvwuntauzi bwakacitwa kujatikizya musamu wantuntumaanzi bwakatondezya kuti mumasena amwi misamu tiiyakali kabotu, akuti imwi yakali yakubeja, calo cakali kupa kuti kayaalilwa kuponya bantu. Muzisi zyaku Southeast Asia, 36 pesenti yamisamu eeyi niyakalangwa-langwa kwakajanwa kuti yakali yakubeja, mpoonya muzisi zyamu sub-Saharan Africa kwakajanwa 20 pesenti yamisamu iili boobu.

Akati-kati kamwezi wa April 2012, bapati-pati bamfwulumende yaku El Salvador bakaambilizya kujatikizya buzuba bumwi kuti bwakali buzuba bwakusaanguna mumyaka yotatwe kakutajaigwi muntu. Akaambo kankondo yakali kucitwa abantu babelesya misamu iikola, mu 2011, mucisi eeci mweelwe wabantu bakajaigwa wakasika ku 4,400—ngumwi wamyeelwe yiinda kukomena akati kamyeelwe yabantu bakajaigwa munyika yoonse.