“Kunyina muntu wakamubona kale Leza nociba ciindi comwe.”—Johane 1:18.

NZYOBAAMBA BANTU

Bantu banji basyoma kuti Jesu tali Leza. Nokuba boobo, bamwi balaamba tupango twamu Bbaibbele tutondezya mbuli kuti Jesu uleelene a Leza.

NCOLYAAMBA BBAIBBELE

Ibbaibbele kunyina nolyaamba Jesu kuti ngu Leza Singuzuzyoonse naa kuti uleelene a Leza. Mukwiimpana, Bbaibbele cakusalazya liyiisya kuti Leza mupati kwiinda Jesu. Mucikozyanyo, Ibbaibbele lilaamba majwi eeni aa Jesu aakuti: “Taata mupati kwiinda ndime.” (Johane 14:28) Alimwi Bbaibbele lilaamba kuti: “Kunyina muntu wakamubona kale Leza nociba ciindi comwe.” (Johane 1:18) Mubwini, Jesu takonzyi kuba Leza nkaambo bantu banji bakamubona.

Basikutobela Jesu bakusaanguna kunyina nobakataminina kuti ngu Leza. Mucikozyanyo, Mulembi wamakani mabotu Johane wakaamba kujatikizya zyintu nzyaakalemba kuti: “Eezyi zyalembwa kutegwa musyome kuti Jesu ngu Kilisito Mwana wa Leza.”—Johane 20:31. *

“Alimwi . . . kwakali beembezi ibakali musyokwe kabeembela butanga bwabo masiku.”—Luka 2:8.

NZYOBAAMBA BANTU

Bantu bamwi balasekelela Kilisimasi mu December 25—kabayeeya kuti mbobuzuba Jesu mbwaakazyalwa. Bamwi balasekelela kuzyalwa kwa Jesu kumatalikilo aamwezi wa January.

NCOLYAAMBA BBAIBBELE

Ibbaibbele talyaambi buzuba Jesu mbwaakazyalwa. Nokuba boobo, lilaamba kuti kuciindi cakuzyalwa kwakwe, “kwakali beembezi ibakali musyokwe kabeembela butanga bwabo masiku.” (Luka 2:8) Alimwi kulangilwa kuti beembezi mu December amu January tiibakali kweembelela musyokwe butanga bwabo. Ino nkaambo nzi?

Kubusena nkwaakazyalilwa Jesu kulatontola kapati mu December amu January. Kujatikizya ciindi camwaka eeci, Ibbaibbele lyaamba kuti bantu bakali ‘kukankama . . . akaambo kamvula.’ (Ezara 10:9, 13; Jeremiya 36:22) Aboobo eeci tiicakali ciindi cakuti beembezi ‘kabali musyokwe’ kabeembela butanga bwabo.

“Leza wakamubusya [Jesu] kubafwu.” —Milimo 3:15.

NZYOBAAMBA BANTU

Bantu bamwi basyoma kuti tacikonzyeki kumuntu uuli woonse kubikkilizya a Jesu, kubusyigwa kuzwa kubafwu.

NCOLYAAMBA BBAIBBELE

Jesu wakayiisya basikumutobela kuti wakali ‘kuyoopenzyegwa kapati mane akujaigwa, akuyoobusyigwa mubuzuba bwatatu.’ (Matayo 16:21) Ibbaibbele lyaamba kuti naakamana kujaigwa alimwi akubusyigwa wakalibonya kubantu bainda ku 500. (1 Bakolinto 15:6) Aabo ibakamubona bakasyoma kuti wabusyigwa ncobeni kuzwa kubafwu. Alimwi bamwi bakazumina nokuba kufwa akaambo kakusyoma boobu!—Milimo 7:51-60; 12:1, 2.

NKAAMBO NZI MAKANI AAYA NCAYELEDE KUMUJATIKIZYA?

Ibbaibbele liyiisya kuti lufwu alimwi akubusyigwa kwa Jesu zyakajalula nzila yakuti bantu banji bajane zilongezyo zyaambidwe mu Bbaibbele kujatikizya Paradaiso anyika. (Intembauzyo 37:11, 29; Ciyubunuzyo 21:3, 4) Eelo kaka tulalumba kapati kuluyando ndwaakatondezya Jesu a Bausyi, Leza Singuzuzyoonse, Jehova, nkaambo lino tulijisi bulangizi bwakukkomana alimwi akuyoopona buumi butamani munyika ya Paradaiso!—Johane 3:16; Baloma 6:23.