“Musiya mulawo wa Leza akuccilila tunsiyansiya twabantu.”—Maako 7:8.

NCOLYAAMBA BBAIBBELE

Bantu bakalengwa kabajisi ‘luyandisisyo lwakukomba Leza.’ (Matayo 5:3) Mukusoleka kuzuzikizya luyandisisyo oolo, bantu balipangila zikombelo zinji mwalo mobayiisya mizeezo yabantu kutali ya Leza.

Mucikozyanyo, kujatikizya bantu bakali kuzulilwa mucikombelo cimwi camumwaanda wamyaka wakusaanguna, Ibbaibbele lyaamba kuti: “Mbasungu kubelekela Leza, pele ikutali kweelana aluzyibo lwini-lwini. Nkaambo mbwaanga tiibakabuzyi bululami bwa Leza, pele bakali kusoleka kulibikkila bululami bwabo beni, tiibakalibombya pe kubululami bwa Leza.” (Baloma 10:2, 3) Mbubwenya buyo amazuba aano, muzikombelo zinji “bayiisya milawo yabantu kuba njiisyo zya Leza.”—Maako 7:7.

“Katubikkilana maano ikutegwa tukulwaizyanye kutondezya luyando akucita milimo mibotu, tutanooleki kuswaangana antoomwe.”—Bahebulayo 10:24, 25.

NCOLYAAMBA BBAIBBELE

Lugwalo lwa Bahebulayo 10:25 lubelesya mabala aakuti “tutanooleki kuswaangana antoomwe.” Mabala aaya atondezya kuti Leza uyanda kuti bantu kabaswaangana mbuli mbunga kutegwa bamukombe. Pele, sena mukombi umwi aumwi weelede kuba aabupanduluzi bwakwe bujatikizya Leza alimwi anzyayanda? Peepe. Ibbaibbele lyaamba kuti aabo bakomba Leza munzila njakkomanina ‘beelede kwaamba cintu comwe boonse’ alimwi ‘akukamantana ncobeni camoyo omwe amuzeezo omwe.’ (1 Bakolinto 1:10) Beelede kukamantana mbuli mbunga yomwe alimwi ‘akuba aluyando kuciinga coonse cabakwesu’ munyika yoonse. (1 Petulo 2:17; 1 Bakolinto 11:16) Lukamantano luli boobu alimwi abukombi buli kabotu bulamukkomanisya Leza.

“Eeci nceciyoozyibya bantu boonse kuti muli basikwiiya bangu, ikuti kamujisi luyando akati kanu.”—Johane 13:35.

NCOLYAAMBA BBAIBBELE

Ikutondezya mbomukonzya kubazyiba bakombi bakasimpe, Ibbaibbele lyaamba kuti: “Kwiinda mumicelo yabo muyoobazyiba. Sena bantu kuli nobacela misaansa kuzwa kumamvwa naa nkuyu kumitubetube?” (Matayo 7:16) Tamuyandiki kuti mane mube aalwiiyo lunji muzisyango kutegwa mucikonzye kwiindanya cisamu camisaansa alimwi acamamvwa; mbubwenya buyo, tamuyandiki kuti mane mube aaluzyibo lunji mubukombi kutegwa muzyibe cikombelo camasimpe alimwi acakubeja. Ino micelo nzi imwi, naa nzintu nzi zitondezya cikombelo cakasimpe?

• Cikombelo cakasimpe ciyiisya kasimpe kazwa Mujwi lya Leza, Bbaibbele. (Johane 4:24; 17:17) Taciyeeme abusongo bwabantu pe.

• Cikombelo cakasimpe cilagwasya bantu kuzyiba Leza, alimwi azina lyakwe lyakuti Jehova.—Johane 17:3, 6.

• Cikombelo cakasimpe cibikkila kapati maano ku Bwami bwa Leza kuti mbobukonzya kupa bulangizi kubantu, kutali mfwulumende zyabantu.—Matayo 10:7; 24:14

• Cikombelo cakasimpe cikulwaizya luyando lwini-lwini. (Johane 13:35) Ciyiisya bantu kulemekana, kubelesya ciindi cabo alimwi alubono lwabo kugwasya bamwi, alimwi akutatola lubazu munkondo zyamasi.—Mika 4:1-4

• Bukombi bwakasimpe ncintu ciyandika, kutali buyo cilengwa ceelede buyo kutobelwa. Basicikombelo cakasimpe balapona kweelana anzyobayiisya.—Baloma 2:21; 1 Johane 3:18.

Bakamboni ba Jehova, basikumwaya magazini eeyi, balasoleka kumulemeka Leza muŋambawido yabo alimwi ambobalilemeka. Sena inga tiimwayanda kujanika kumiswaangano ku Ŋanda ya Bwami kutegwa mukalibonene?