“Nitwakajisi mapenzi, mukaintu wangu wakabaambila bazyali bakwe kujatikizya mapenzi eesu. Mpoonya bausyi bakandiita kutegwa bandipe lulayo kujatikizya bukkale bwesu. Tiindakakkomana!”—Ba James. *

“Kanji-kanji bamamazyala bakali kwaamba kuti: ‘Mwanaangu ndilamuyeeya kapati!’ Balaamba mbobakali kumvwana amwanaabo, calo cipa kuti kandilipa mulandu kuti ndakakwatwa kumwanaabo akupa kuti balo kabapenga!”—Ba Natasha.

Sena cilakonzyeka kulesya penzi abamakwe kuba penzi lyamucikwati?

Cikwati cipa kuti kube mukwasyi mupya. Bbaibbele lyaamba kuti mwaalumi akwata, “uyoosiya bausyi abanyina akukakatila kumukaintu wakwe.” Ncimwi buyo akumukaintu kujatikizya bazyali bakwe amulumaakwe. Akwatwa, Bbaibbele lyaamba kuti bobilo baba “mubili omwe.” Babamba mukwasyi mupya.—Matayo 19:5.

Cikwati canu mweelede kucibikkila maano kwiinda bazyali banu. Sikupa lulayo mucikwati, John M. Gottman, wakalemba kuti: “Cintu cimwi ciyandika kapati ncobeelede kwiiya banabukwetene nkubikkila maano ngobakwetene limwi muzintu zyoonse nzyobacita. Kutondezya kuti mulamubikkila maano ngomukwetene limwi cilabikkilizya akulyaandaanya kumukwasyi wanu.” *

Bazyali bamwi cilakonzya kubayumina kucinca. Mulumi uumwi wakaamba kuti: “Katutanakwatana, mukaintu wangu lyoonse wakali kubikkila maano kuzintu nzyobakali kuyanda bazyali bakwe. Notwakakwatana, banyina bakabona kuti muntu uumwi wakababwezela busena. Eeci cakabayumina kapati kuzumina.”

Banabukwetene bapya abalo cilakonzya kubayumina. Ba James, ibaambwa kumatalikilo aacibalo bakaamba kuti: “Kuba abamakwe tacili mbuli kuba abalongwe balo mbokonzya kusala. Cili mbuli kuti muntu umwi wakwaambila kuti, ‘Noyanda notayandi, ujisi balongwe bapya bobilo.’ Nokuba kuti balakunyemya, mbamukwasyi!”

Ikuti nywebo angomukwetene limwi mwazwangana akaambo kabamakwe, amutubambe twaambo calukamantano. Amutobele lulayo lwamu Bbaibbele lwakuti: “Koyandaula luumuno akusungwaala kulutobela.”—Intembauzyo 34:14.

Kutegwa mucite oobo, amulange-lange bukkale butobela. Bukkale bumwi abumwi bwapegwa mbuli mbwakonzya kuzilanga zintu mulumi naa mukaintu. Nokuba boobo, buyumuyumu bwaambidwe bulakonzya kubajatikizya boonse bobilo, alimwi njiisyo zibandikidwe zilakonzya kumugwasya kubamba twaambo tuli mbotubede.

Mukaintu wanu waamba kuti nicali cibotu kuti nimwali kumvwana abanyina. Pele nywebo cilamuyumina kubamba luumuno abanyina.

Amusole nzila eeyi: Amulibandike penzi amukaintu wanu mpoonya mumvwane acintu comwe. Makani aawa nkubona mbomulimvwa kujatikizya ngomukwetene limwi, muntu ngomwakakonka kuti munoomuyanda lyoonse, ikutali mbomulimvwa kujatikizya banyokozyala. Mwanoobandika, amujane nzila yomwe naa zyobilo zigaminide mbomukonzya kumvwana abanyina, mpoonya akuzitobela nzila eezyo. Mukaintu wanu abona kusoleka kwanu, cakutadooneka, unoomulemeka kapati.—Njiisyo yamu Bbaibbele: 1 Bakorinto 10:24.

Balumi banu baamba kuti mubikkila buyo maano bazyali banu, ikutali mbabo.

Amusole nzila eeyi: Amulibandike penzi abalumi banu, mpoonya musole kubona zintu mbobazibona balo. Pele balumi banu tabeelede kubijilwa akaambo kakuti mulabalemeka bazyali banu. (Tusimpi 23:22) Nokuba boobo, inga mwayandika kubatondezya kwiinda mumajwi alimwi amicito yanu kuti mulababikkila maano kwiinda bazyali banu. Ikuti balumi banu kabakazyi kaambo aaka, tabakalimvwi kuti balazundana abazyali banu mukubikkilwa maano.—Njiisyo yamu Bbaibbele: Baefeso 5:33.

Bakaintu banu bayanda lulayo kubazyali babo muciindi cakumwaambila nywebo.

Amusole nzila eeyi: Amubandike abakaintu banu akumvwana mpomweelede kugolela. Amusolekesye kunyoneka. Sena cililubide lyoonse kwaambila muzyali icimulibilisya? Ndilili nocikonzya kweelela kucita oobo? Ikuti nyoonse mwazuminana, kaambo aaka takeelede kuba penzi pe.—Njiisyo yamu Bbaibbele: Bafilipi 4:5.