Wakakakatila Kuzintu Nzyaakali Kusyoma
Ciindi Song Hee naakajisi myaka iili 11, banyina bakabona kuti moongolola wamwanaabo wakalidiimene. Badokota nobakamulanga-langa bakajana kuti wakajisi bulwazi butegwa scoliosis, bulwazi bupa moongolola kudiimana mbuli bbala “C” naa kupilingana mbuli “S.” Bulwazi bwa Song Hee bwakaindila cakuti wakali kuyandika kwaandulwa. Pele Song Hee tanaakazumina kubikkwa bulowa. Basikulemba Sinsimuka! bakamubuzya kujatikizya cakacitika.
Nobakabujana bulwazi oobu, sena kuli mbobakakugwasya bamadokota?
Kwamyaka yotatwe ndakali kulangililwa abamadokota bobilo, pele moongolola wakazumanana kudiimana. Penzi eeli lyakakomena cakuti moongolola wakatalika kuguma moyo alimwi amapunga, calo cakapa kuti kanditayoyi kabotu. Icakali kuyandika buyo, nkwaandulwa.
Sena wakazumina kwaandulwa?
Inzya, pele ndakaambilwa kuti kwaandulwa ooku kuyookatazya. Aciindi eeci, penzi lyakali lipati kapati nkaambo moongolola wangu wakadiimana kusika a 116 digiliizi. Nokuba boobo, kuzumina kwaandulwa kwakali kuyooleta penzi limbi. Akaambo kazintu nzyondisyoma ziyeeme a Bbaibbele, tiindakazumina kubikkwa bulowa. *
Sena mwakamujana dokota wakalisungwide kukwaandula?
Mebo abamaama twakajana dokota uucibwene kubusena nkotwakali kukkala ku Florida, U.S.A. Nokuba boobo, nindakamwaambila kuti tandiyandi kubikkwa bulowa, wakandaambila kuti kunyina dokota uukonzya kuzumina kundaandula kakunyina kubikkwa bulowa. Cakaindila kubija nkundaambila kuti tandikakkwanyi myaka iili 20 ikuti ndataandulwa. Ndakajisi buyo myaka iili 14.
Sena wakamupandulwida kaambo ncootakali kuyanda kubikkwa bulowa?
Inzya, ndakamwaambila kuti nzyondisyoma ziyeeme aa Bbaibbele, akuti Leza wakaamba kuti bulowa bulisetekene, tacikwe makani akuti mbwamuntu naa mbwamunyama.Alimwi buya, muna Israyeli uulya bulowa wakeelede kujaigwa. Mpoonya ndakamutondezya Milimo 15:19, 20. Lugwalo oolu ilwakalembelwa Banakristo lwaamba kuti: ‘Amutantamuke bulowa.’ Eeci caamba kuti tabweelede kunjila mumubili wamuntu kubelesya nzila iili yoonse—kwiinda mukubulya naa mukuyaswa munyeleti.
Ino badokota bakacita buti?
Bakazumanana kwaamba kuti ndeelede kubikkwa bulowa. Alimwi bamadokota bakandaambila kuti ikuti ndazumina kubikkwa bulowa, tiindakali kuyakubbadela.
Oolo lwakali lubomba ncobeni! Ino yebo abanyoko mwakacita buti?
Nokuba kuti kunyina wakalisungwide kundaandula kakunyina kubikkwa bulowa, twakasala kukakatila kuli nzyotusyoma. Mpoonya zintu zyakaindila kubija. Kweelana amulawo, ndakacili mwana muniini. Akaambo kakuti bulwazi bwangu bwakaindila, makani bakaatola kunkuta. Mucoolwe, basimilawo baku Florida bakatupa mazuba aali 30 aakuti tujane dokota uukonzya kutobela ncondakali kuyanda.
Sena kuli ngomwakajana?
Inzya. Ba Hospital Liaison Committee ya Bakamboni ba Jehova bakubusena nkotukkala bakajana dokota waku New York uucibwene kusilika bulwazi bwa scoliosis, walo iwakali kulimvwa kuti inga wandaandula eelyo wakazumina kundibona. Aboobo, twakamujana dokota kaatanakkwana mazuba aali 30 ngotwakapegwa ankuta. *
Ino zintu zyakeenda buti?
Zyoonse zyakeenda kabotu! Ba Dr Robert M. Bernstein bakandinjizya tubulo kumoongolola. Bakandaandula ziindi zyobilo, kwiinzya nsondo zyobilo akati.
Nkaambo nzi ziindi zyobilo?
Kutegwa ndasweekelwa bulowa bunji ciindi cakusaanguna, mubili wangu ucikonzye kupanga ma red blood cells kacitanasika ciindi cabili. Pele muziindi zyoonse zyobilo ndakasweekelwa buyo bulowa busyoonto. Ndilabalumba bamadokota akaambo kakuyeeya kabotu kwabo, kubelesya busongo akuucita kabotu mulimo wabo. Alimwi ndakayumya kabotu-kabotu, kakunyina kuba amapenzi ngobajana aabo bazumina kubikkwa bulowa.
Ino badokota bako bakalimvwa buti?
Bamadokota beelede kumubikkila maano mulwazi
Bakakkomana kapati! Bakaamba kuti: “Kusilika muntu tacaambi buyo kumwaandula.” Bakaamba kuti bamadokota beelede kumubikkila maano mulwazi, kubikkilizya azintu nzyasyoma. Kuli bantu banji kunze aa Bakamboni ba Jehova bakonzya kusala nzila eeyi yabusilisi.
^ par. 7 Bazyali ba Song Hee Mbaakamboni ba Jehova. Awalo Song Hee usyoma nzyobasyoma bazyali bakwe alimwi wakabbapatizyigwa mu 2012 kajisi myaka iili 16.
Ba Hospital Liaison Committee bagwasya Bakamboni bacisidwe kujana bamadokota bakonzya kusilika Bakamboni kakunyina kubelesya bulowa.
Ba Clinical Excellence Commission, New South Wales (Australia) Health, mucibalo caamba zyantenda ziliko mukubikkwa bulowa baamba boobu: “Kubikka muntu bulowa nkulonzya maseelo aapona kuzwa kumuntu wagusyigwa bulowa kutola kumuntu wabikkwa bulowa. Lyoonse muntu nabikkwa cintu cagusyigwa mumubili wamuntu uumbi, mubili usaanguna kucikaka. Ntenda zikonzya kubako nzipati.”
