Kujatikizya nkondo izyakali kucitika ciindi naakacili mwana, Herodotus wakayeeya kulemba twaambo twakapa kuti ba Giriki kabalwana nkondo alimwi acini icakali kupa kuti bana Persia kabalwana bana Greece mu 490 alimwi amu 480 B.C.E. Kunze lyakulemba makani aajatikizya cakapa bana Persia kulwana nkondo, wakalemba makani oonse ngaakali kukonzya kujana aajatikizya zisi zyakalwanwa abana Persia.

Herodotus wakajisi cipego cakulemba. Wakali kulemba twaambo cakulomya, akubikkilizya makani oonse aakali kuyandika kutegwa cibalo cizulile. Zintu nzyaakalemba Herodotus zililibedelede akaambo kakuti makani ngaakalemba tanaakayeeme amakani aakazumizyidwe abweendelezi, alo aakali kwaamba zintu zyakali kucitika kaindi nkaambo makani aali boobu tanaakali kujanika.

Kaindi, bantu banji tiibakali kubikkila maano kulemba makani, ccita buyo kuti bayanda kulemba makani amwi aakulidunda kujatikizya zibumbwa. Kutegwa alembe makani, Herodotus wakali kubikkila maano kuzintu nzyaakali kubona, zilengwa zyabantu, alimwi azyakuluula zyabantu izyakali kujatikizya makani ngaakali kuyanda kuti alembe. Aboobo kutegwa ajane twaambo ootu, wakaswaya masena manji. Wakakomenena ku Halicarnassus (lino ikwiitwa kuti Bodrum), cisi ca Turkey nkocili kumusanza alimwi wakaswaya masena manji mu Greece.

 Wakaswaya masena aabambene a Black Sea nkoili kunyika aku Scythia kwalo lino ikwiitwa kuti Ukraine, alimwi amasena aali kumusanza aa Palestine alimwi amasena aali ku Egypt nkoili kunyika. Kuya kujwe, kuboneka kuti wakasika ku Babylon alimwi kulangilwa kuti wakamanizya lweendo lwakwe kumasena aakumbo alo aakali kweendelezyegwa a Greece, lino Italy nkoili kumusanza. Kufwumbwa nkwaakali kuswaya, wakali kubuzya-buzya bantu kutegwa ajane twaambo, ikapati kubantu bakali kuboneka kuti inga bamwaambila twaambo twamasimpe.

Ino mbuti mbwaaluzi makani ngaakalemba Herodotus? Kujatikizya masena ngaakaswaya alimwi azintu nzyaakalibonena ameso, luzyibo lwakwe lubonwa kuti luliluzi. Bupanduluzi bwakwe kujatikizya zilengwa nzyobatazyi bana Greece—mbuli zyeezyo zyabana Scythia izijatikizya kuzikkwa kwabami alimwi abana Egypt mbobakali kuyobola mibili yabantu bafwide—buleendelana anzyobajana basikuvwukkula zintu zyakaindi. Kwaambwa kuti makani ngaakalemba kujatikizya Egypt “ajisi twaambo tunji kapati kwiinda makani aali woonse aakalembwa mumazuba aakaindi aamba zyacisi eeci.”

Kanji-kanji Herodotus kunyina ncaakali kunga wacita kunze lyakubweza twaambo twatakazulide kapati nkaambo ntotwakaliko tulikke aciindi eeco. Kuyungizya waawo, bantu bamuciindi ncaakapona bakali kusyoma kuti baleza bakali kutola lubazu mubukkale bwabantu. Aboobo tatuli twaambo toonse ntwaakalemba itusika azyeelelo zyabasikulemba makani aakaindi bamazuba aano. Nokuba boobo, Herodotus wakasola kwaandaanya makani aamasimpe kutwaano buyo. Wakaambilizya alikke kuti tatuli twaambo toonse ntwaakaambilwa ntwaakasyoma. Wakali kulemba makani lilikke kuti waayeezyanisya akwaalanga-langa kabotu.

Kweelede kuti makani ngaakalemba aategwa The Histories ajisi makani aamba zintu nzyaakacita mubuumi bwakwe. Kweelana amakani ngaakajisi, inga twaamba kuti wakawoonda mulimo.