Izuba lyakalitalikide kale kubala muli Bwasanu mafwumofwumo mu September 1922 ciindi bantu ibali 8,000 nobakabungene muŋanda mpati yakuswaanganina. Sicuuno wamuswaangano wakaambilizya kuti mucibeela eeci ciyandika kapati, muntu uuli woonse wakalizumizyidwe kuzwa anze, pele kunyina iwakali kuzumizyigwa kunjila alimwi muŋanda eeyi yakuswaanganina ikuti naa walizwide.

Inyimbo zyakaimbwa mucibeela cakusaanguna camuswaangano icakali kujatikizya kwiimba nyimbo icakali kwiitwa kuti “Praise Service,” mpoonya ba Joseph F. Rutherford bakatanta acibumbili. Baswiilizi banji bakalikkede kumwi kabayeeyela ncaakali kuyanda kwaamba. Mweelwe musyoonto wabantu bakali kweendeenda akaambo kakuti kwakali kupya. Mwaambi wakabalomba kuti bakkale kutegwa baswiilile. Mwaambi naakatalika kupa makani, sena kuli wakacibona cisani cipati cakavwungidwe kabotu-kabotu akwaanzikwa mujulu?

Mukwesu Rutherford wakabandika makani aakajisi mutwe wakuti, “Bwami bwakujulu bwaswena afwaafwi.” Kwawoola lyomwe acisela, ijwi lyakwe lyanguzu lyakali kulimvwisya muŋanda yoonse yakuswaanganina ciindi naakali kubandika kujatikizya basinsimi bakaindi mbobakaambilizya cakutayoowa kuboola kwa Bwami. Kumamanino aamakani wakabuzya kuti, “Sena mulasyoma kwaamba kuti Mwami uulemekwa wakatalika kweendelezya?” Baswiilizi bakaingula cakupozomoka kuti: “Inzya!”

“Nkokuti atukakambauke, nobana ba Leza singuzuzyoonse!” Kumane mukwesu Rutherford wakoongolola kuti: “Ngooyo Mwami ulalela! Nywebo ndinywe baambilizi bakwe. Aboobo amwaambilizye, amwaambilizye, amwaambilizye Mwami a Bwami bwakwe.”

Aciindi eeco, cisani icakali mujulu cakavwungululwa kacilembedwe mabala aakuti: “Amwaambilizye Mwami a Bwami bwakwe.”

Ba Ray Bopp balayeeya nobati, “Mibili yakeenda akaambo kamajwi aayo.” Ba Anna Gardner bakaamba kuti “ciluli cakazungaana akaambo kakukambilila.” Ba Fred Twarosh balo bakati, “Basimuswaangano boonse bakanyamuka caantoomwe.” Ba Evangelos Scouffas bakati, “Cakali mbuli kuti kwakali nguzu zinji kapati izyakatunyamuna azyuuno mpotwakakkede, kumane twakaimikila meso eesu kaayiba-iba misozi.”

Ibanji ibakajanika kumuswaangano ooyu bakalitalikide kale kukambauka makani mabotu aa Bwami. Pele aciindi eeci bakalimvwa mbuli kuti lino bakapegwa nguzu zinji kutegwa bautalike buya alimwi mulimo wabo. Ba Ethel Bennecoff bakaamba kuti Basikwiiya Bbaibbele aaba “bakaba basungu alimwi bakazula luyando mumyoyo yabo kwiinda kaindi.” Ba Odessa Tuck, balo aciindi eeco ibakajisi myaka iili 18, bakapiluka kwabo kabakanzide kwiingula bwiite bwakuti: “Ino nguni uutiiunke?” Bakaamba kuti: “Tiindakazyi naa ndakeelede kuyookambaukila kuli, naa kuyookambauka buti akuti naa ndakeelede kuyookambauka nzi. Cintu buyo ncondakazyi ncakuti ndakali kuyanda kuba mbuli Isaya ooyo iwakaamba kuti: ‘Ndime aano! Kondituma!’” (Is. 6:8) Ba Ralph Leffler bakaamba kuti: “Buzuba oobo mbotwakakkomana kapati bwakaba mbuli kuti ngaakali matalikilo aamulimo wakwaambilizya Bwami uuli mukucitwa mazuba aano nyika yoonse mboizulwa.”

Aanu nkakaambo kaako muswaangano wacooko ooyu iwakacitwa mu 1922 ku Cedar Point, Ohio  ulayeeyegwa kapati mumakani aakacitika kaindi akuti ncintu cipati citakalubwi icakacitika mumbunga ya Leza! Ba George Gangas bakaamba kuti, “Muswaangano wacooko uulya wakandipa kuba amakanze aakuti tandeelede kwiindwa muswaangano nouba omwe.” Kweelana ambobakali kukonzya kuyeeya, kunyina nobakaindwa muswaangano nouba omwe. Ba Julia Wilcox bakalemba kuti: “Nciyumu kupandulula mbondilimvwa kukkomana ciindi coonse nokwaambwa muswaangano waku Cedar Point mu 1922 mumabbuku eesu. Lyoonse inga ndaamba kuti, ‘Ndalumba Jehova akaambo kacoolwe ncowakandipa cakujanika kumuswaangano uulya.’”

Cakutadooneka, tobanabunji mazuba aano andiswe tulaiyeeya miswaangano yacooko iyakatukkomanisya kapati njotutalubi yalo yakapa kuti tube basungu kapati akumuyanda Leza wesu mupati alimwi a Mwami wakwe. Twaiyeeya miswaangano iili boobo, andiswe citupa kwaamba kuti, “Ndalumba Jehova akaambo kacoolwe ncowakandipa cakujanika kumuswaangano uulya.”