AMWEEZEEZYE kuti muyaabweenda masiku mumugwagwa uusiya mbi. Nokuba kuti zuba lyabbila kaindi, pesi mulijisi bulangizi bwakuti tamukonzyi kusweeka nkomuya nkaambo mulijisi atocci liyaka kapati. Ciindi nomulimunika ansi, mulakonzya kubona zintu zyoonse izili ambele lyanu. Mpoonya ciindi nomulimunika kumbele, mumuni wandilyo ulamunika kumbele nkomuya.

Munzila imwi, Bbaibbele lili mbuli tocci eelyo. Mbuli mbotwabona kale muzibalo zyainda, Jwi lya Leza lilakonzya kutugwasya kulwana zintu zili ambele lyesu, nkokuti mapenzi aabuzuba abuzuba ngotuswaanganya toonse munyika eeyi iipilingene. Pele Bbaibbele lilatugwasya munzila aimbi. Lilakonzya kutugwasya kuzyiba ziyoocitika kumbele akututondezya nzila iisololela kulukkomano lutamani alimwi akukkutila. (Intembauzyo 119:105) Munzila nzi?

Atulange-lange nzila zyobilo mwalo Bbaibbele molitupa bulangizi bwakumbele: 1 Lilatugwasya kuba abuumi bulaampindu, alimwi 2 lilatuyiisya mbotukonzya kuba acilongwe ciyumu a Mulengi wesu.

Bbaibbele lilapa lulayo lubotu lukonzya kutugwasya kulwana mapenzi eesu, pele talili bbuku lyaamba buyo mbotukonzya kulwana mapenzi aatugeme. Muciindi cakukulwaizya kuti katubikkila buyo maano kumapenzi eesu, Bbaibbele lituyiisya kuti tweelede kubikkila maano akuzintu nzyobayandika bamwi. Lilikke kuti twacita oobo, ndendilyo notukonzya kuba abuumi bulaampindu ncobeni.

Mucikozyanyo, amubone njiisyo eeyi yamu Bbaibbele yaamba kuti: “Kupa kulakkomanisya kapati kwiinda kupegwa.” (Milimo 20:35) Sena mulayeeya ciindi nomwakagwasya muntu umwi iwakali kuyandika zintu zyakumubili? Naa ambweni ciindi nomwakagwasya mweenzinyoko kwiinda mukumuswiilila ciindi naakali kumwaambila zintu izyakali mumoyo wakwe? Sena tiimwakalimvwa kukkomana akaambo kakugwasya muntu uumwi kuba alukkomano?

 Tulakkomana kapati ciindi notugwasya bantu kakunyina kulangila kuti abalo batupe cintu cimwi. Mulembi umwi wakaamba kuti: “Aabo ibalyaaba kugwasya bamwi balajana bulumbu lilikke buyo kuti bacita oobo kakunyina kulangila kujana bulumbu buli boonse.” Pele ciindi notulyaaba kugwasya bamwi—kwaambisya aabo batakonzyi kutujolela—tulatambula zilongezyo. Masimpe, tubelekela antoomwe a Mulengi wesu walo uubona milimo yaluzyalo iili boobu kuti tukolotya nguwe. (Tusimpi 19:17) Ulalumba kapati akaambo kalugwasyo ndotupa bantu bapengede, alimwi usyomezya kuti uyootupa bulumbu bwabuumi butamani munyika yaparadaiso​—masimpe oobu mbulangizi butaliboteli bwakumbele!—Intembauzyo 37:29; Luka 14:12-14. *

Cipati kwiinda zyoonse, Bbaibbele lituyiisya kuti tulakonzya kuba abuumi bulaampindu ncobeni kwiinda mukukomba Leza wakasimpe, Jehova. Jwi lyakwe litukulwaizya kuti tweelede kumutembaula, kumulemeka alimwi akumuvwida. (Mukambausi 12:13; Ciyubunuzyo 4:11) Ciindi notucita oobo, tuzuzikizya cimwi cintu ciyandika kapati: Tulamukkomanisya kapati Mulengi wesu. Nkakaambo kaako utukulwaizya kuti: “Kosongwaala . . . ukkomanisye moyo wangu. (Tusimpi 27:11) Amuciyeeyele buyo—ciindi notusala zyakucita izyeendelana anjiisyo zyamu Bbaibbele, tukkomanisya moyo wa Taateesu wakujulu siluyando. Nkaambo nzi? Nkaambo ulatubikkila maano alimwi uyanda kuti tugwasyigwe kwiinda mukutobela busolozi bwakwe. (Isaya 48:17, 18) Mubwini, sena kuli coolwe cipati kwiinda ncotukonzya kuba ancico kunze aacoolwe cakukomba Mwami wabubumbo boonse alimwi akupona buumi bukkomanisya moyo wakwe?

Bbaibbele alimwi lituyiisya kuba acilongwe a Mulengi wesu. Magwalo aamba kuti: “Amuswene kuli Leza, eelyo awalo ulaswena kulindinywe.” (Jakobo 4:8) Zimwi ziindi tulakonzya kudooneka naa cilakonzyeka ncobeni kuba acilongwe a Mulengi singuzuzyoonse. Pele Bbaibbele litusyomezya kuti, ikuti ‘twamuyandaula Leza,’ inga ‘twamujana ncobeni,’ nkaambo “tali kulamfwu kuli umwi aumwi wesu.” (Milimo 17:27) Kukulwaizya nkolipa Bbaibbele kwakuti tube balongwe ba Leza kulatugwasya nkaambo kutupa kuba abulangizi bwakumbele. Munzila nzi?

Amulange-lange kaambo aaka: Kufwumbwa naa twasola buti, kunyina naba omwe akati kesu uukonzya kumutija sinkondoma—lufwu. (1 Bakorinto 15:26) Pele Leza nkwali lyoonse. Takonzyi kufwa alimwi uyanda kuti balongwe bakwe abalo kabapona lyoonse. Kwiinda mukubelesya majwi masyoonto aatobela pele imabotu kapati, Bbaibbele lilaamba Jehova ncayanda kuli baabo bamuyandaula nati: “Amuzumanane kupona mane kukabe kutamani.”—Intembauzyo 22:26.

Mbuti mbomukonzya kuba acilongwe ciyumu boobo a Leza? Amuzumanane kwiiya kujatikizya nguwe kwiinda mu Jwi lyakwe, Bbaibbele. (Johane 17:3; 2 Timoteyo 3:16) Amumulombe kuti amugwasye kumvwisya Magwalo. Bbaibbele litusyomezya kuti, ikuti naa camoyo woonse ‘twazumanana kumulomba busongo Leza,’ uyootupa. * (Jakobo 1:5) Camamanino, amusolekesye kuzibelesya nzyomwiiya, amulekele Jwi lya Leza kuti libe ‘lambe kumaulu aanu’ alimwi ‘amumuni uumunikila nzila zyanu’—lino mane kukabe kutamani.—Intembauzyo 119:105.