Rosie wakaamba kuti: “Ndakali kulibilika kapati kujatikizya zintu nzyondakali kuyeeyela buyo kuti inga zyabija kwiinda bwini mbozyakabede.” Ino magwalo nzi aakamugwasya? Lumwi akati kangawo ndugwalo lwa Matayo 6:34 ilwaambwa kuti: “Mutanoolibiliki zyabuzuba butobela, nkaambo buzuba butobela bunoojisi zyakulibilika zyambubo. Buzuba bumwi abumwi bulijisi mapenzi aambubo aakkwene.” Rosie wakaamba kuti majwi aa Jesu aaya akamugwasya kuti aleke kulibilika kujatikizya zintu zikonzya kucitika buzuba butobela. Wakayungizya akwaamba kuti: “Ndakajisi mapenzi manji kale, kanditanatalika kulibilika kujatikizya bukkale butanacitika alimwi ambweni butakacitiki buya.”

Yasmine awalo wakabona kuti kulibilika kwakatalika kumweendelezya. Wakati: “Ndakali kulila mazuba aali mbwaabede mukati kansondo, alimwi ndakali kuba aacilabila masiku aamwi. Ndakali kulimvwa kuti kuyeeya kubyaabi kwakali kundilya bulanga.” Ino ndugwalo nzi lwakamugwasya? Wakaamba lugwalo lwa 1 Petro 5:7 ilwaamba kuti: “Kamuwaala makatazyo aanu oonse kuli [Leza], nkaambo ulamubikkila maano.” Yasmine wakaamba kuti: “Mukuya kwaciindi, ndakazumanana kupaila kuli Jehova, alimwi wakayiingula mipailo yangu. Ndakalimvwa mbuli kuti cibbudu cilema kapati cakagusyigwa amagwezyo aangu. Nokuba kuti zimwi ziindi kuyeeya kubyaabi inga kulaboola, pele lino ndilizyi mbondikonzya kukuzunda.”

Mukubusi musimbi uutegwa Isabella wakaamba kuti: “Ndiyeeya kuti kusumpya mbulwazi bwamumukwasyi nkaambo abalo bataata bakali kucita mbubonya oobo. Ndilaibikka ambali milimo iiyandika kapati kutegwa kandikkede buyo—kulyookezya naa kweebelela buyo TV. Eeci ncilengwa cibyaabi nkaambo cipa kuti muntu akatale kapati alimwi akutaubeleka kabotu mulimo wakwe.” Njiisyo iyakamugwasya ijanika kulugwalo lwa 2 Timoteyo 2:15, ilwaamba kuti: “Kosungwaala kulitondezya kuti uli muntu uutambulika kuli Leza, mubelesi uutakwe cintu cimuusya nsoni.” Isabella wakaamba kuti: “Tiindakali kuyanda kuti Jehova kausa kujatikizya mulimo wangu akaambo kakuti ndakasumpya.” Lino ucita kabotu kapati.

Mbubwenya buyo, awalo Kelsey wakaamba kuti: “Ndakali kupegwa mulimo kakucili ciindi pele ndakali kuucita buyo kwacaala kaindi kasyoonto. Ndakali kulila, kuba acilabila alimwi akulibilika. Eeci tiicakali kundigwasya pe. Kelsey wakagwasyigwa kulugwalo lwa Tusimpi 13:16 ilwaamba kuti: “Muntu uucenjede ucita zintu caluzyibo, pele mufwubafwuba utondezya bufwubafwuba bwakwe.” Wakapandulula ncaakaiya kwiinda mukuzinzibala kuyeeya lugwalo oolu naakati: “Cilagwasya kulibambilila limwi zyakucita mpoonya akutasumpya kuzicita. Lino ndilijisi kabbuku nkondibikka atebulu lyangu nkondilembela milimo yeelede kucitwa, alimwi eeci cindigwasya kulibambila ciindi nondeelede kwiicita, kutegwa nditabbilingani kwacaala buyo kaindi kasyoonto.”

Ba Kirsten bakaamba kuti: “Balumi bangu bakandisiya abana baniini bone.” Ino ninjiisyo nzi yamu Magwalo iyakabagwasya? Ninjiisyo iijanika kulugwalo lwa Tusimpi 17:17 iyaamba kuti: “Mulongwe mwini-mwini ulatondezya luyando ciindi coonse, alimwi ngomunyoko wakazyalilwa kuti akugwasye muziindi zyamapenzi.” Ba Kirsten bakalomba lugwasyo kubasyominyina. Sena bakagwasyigwa? “Balongwe bangu bakandigwasya munzila ziindene-indene! Bamwi bakali kundisiila zintu zyakubelesya alimwi amaluba-luba amulyango. Kwaziindi zyotatwe bantu banji bakandigwasya mebo abana bangu kulonga kuzwa muŋanda iimwi kuya kuŋanda iimbi. Muntu umwi wakandigwasya kujana mulimo. Balongwe bangu kunyina nobakaleka kundilanganya.”

Ba Delphine ibaambwa kumatalikilo, abalo bakajisi penzi lyakulendelelwa. Balayeeya ciindi nobakasweekelwa zintu zyoonse nobakaamba kuti: “Ndakali kulendelelwa kapati nkaambo ndakali kubona bantu bamwi kabakkala antoomwe amikwasyi yabo, pele mebo ndakali ndelikke alimwi tiindakakkomene pe.” Lugwalo lumwi ilwakabagwasya lwakali lwa Intembauzyo 68:6 ilwaamba kuti: “Leza upa kuti aabo bali balikke bakkale muŋanda.” Bakapandulula kuti: “Ndakalizyi kuti lugwalo oolu tiilwakali kwaamba ŋanda iini kwiigama. Muciindi caboobo, ndakazyiba kuti Leza ulapa ŋanda yakumuuya, ibusena bukwabilidwe ncobeni bwalo butupa kuba abalongwe beni-beni aabo ibamuyanda Jehova. Pele ndakalizyi kuti inga tiindaba acilongwe abantu bamwi kanditanaba acilongwe a Jehova. Aboobo lugwalo lwa Intembauzyo 37:4 lwakandigwasya nkaambo lwaamba kuti: ‘Kobotelwa kapati muli Jehova, eelyo walo uyookupa nzyouyanda moyo wako.’”

Mumajwi aabo aamamanino bakaamba kuti: “Ndakabona kuti ndakeelede kuyumya cilongwe cangu a Jehova. Nkaambo ngomulongwe mubotu uubainda boonse. Mpoonya ndakapanga mulongo wazintu zikkomanisya izyakucita abamwi, kutegwa ndijane balongwe balo bamuyanda Jehova. Ndakaiya kubona bubotu muli bamwi alimwi akutakubikkila maano kulubizya kwabo.”

Masimpe, bantu bamubelekela Leza tabanalondoka pe. Bakamboni ba Jehova balasikilwa mapenzi mbubonya mbuli mbwaasikila bantu boonse. Pele kwiiya Bbaibbele kukulwaizya bantu kugwasya bamwi kufwumbwa leelyo nocikonzyeka. Cilagwasya kuba abalongwe bali boobo. Nokuba boobo, sena njiisyo zyamu Bbaibbele zilakonzya kutugwasya kuliyumya amumapenzi aatakonzyi kumana lino, mbuli malwazi aatasilikiki alimwi abuumba?