AMWEEZEEZYE KUTI: Muyabweendeenda muŋanda iiyobwedwa zintu zyakaindi mwalo imuzwide zibumbwa zyansiku. Mpoonya mwajana kuti bunji bwazibumbwa zilidonkaukide, zilijujukide akaambo kakubalwa zuba, kuugwa mvwula naa kutontola alimwi akunyonyooka. Kumane zibumbwa zimwi tazijisi zibeela zyazyo. Nokuba boobo, comwe cililibedelede nkaambo kunyina mpocinyongene; tubeela toonse twancico nkotuli alimwi tulalibonya. Mpoonya mwabuzya sikumweenzyeenzya kuti: “Sena eeci ncipya kwiinda zeezyi zimwi?” Kumane sikumweenzyeenzya waingula kuti: “Peepe, eeci ncecakaindi kapati kwiinda zyoonse alimwi kunyina nocakabambulwidwe kale.” Mpoonya mwabuzya alimwi kuti: “Sena kuli nocakakwabilidwe kuntenda?” Sikumweenzyeenzya waingula kuti: “Peepe, eeci ncecakali kubbubbulwa muwo alimwi akuugwa mvwula kapati. Alimwi zigwebenga zinji zyasola kuti zicinyonyoone.” Ambweni mulakonzya kulibuzya kuti ‘Ino cakapangwa aanzi?’

Munzila imwi, Bbaibbele lili mbuli cibumbwa eeco cilibedelede. Ndibbuku lyansiku—ndyakaindi kwiinda mabbuku manji. Bwini mbwakuti, kuli mabbuku aambi aansiku. Pele mbubwenya mbuli zibumbwa zinyonyookede, bunji bwamalembe aakaindi akanyonganizigwa kapati mukuya kwaciindi. Mucikozyanyo, zintu izyaambwa mumalembe aaya kujatikizya sayaansi, balazikazya bantu akaambo kaluzyibo lupya alimwi abumboni businizidwe buliko mazuba aano. Lulayo ndwaapa kujatikizya makani aabusilisi kanji-kanji lulibonya kuti lubikka maumi muntenda muciindi cakugwasya. Alimwi bunji bwamalembe aansiku, ntubeela buyo twamalembe aaya mbwaakabede kaindi; zibeela zimwi zyakasweeka naa kunyonyooka citaambiki.

Pele Bbaibbele liliindene amalembe aayo. Lyakatalika kulembwa myaanda yamyaka iinda ku 35, pele Bbaibbele kunyina nolyakanyonganizyigwa pe.  Alimwi nokuba kuti lyali kulwanwa ciindi aciindi kwamyaanda yamyaka—mbuli kuumpwa, kulesyegwa alimwi akusampaulwa, pele ncolyaamba Bbaibbele tacicincide pe. Kunyina nolikonzya kwaambwa kuti talicibeleki akaambo kaluzyibo lupya luliko mazuba aano, Bbaibbele lilaamba zintu zinji zigambya izitondezya kuti lyaambila limwi zintu zyakumbele.—Amubone kabbokesi kakuti “Sena Talicigwasyi naa Lyaamba Masimpe Nokuba Kuti Ndyakaindi?”

Nokuba boobo, mulakonzya kulibuzya kuti, ‘Sena njiisyo zyamu Bbaibbele zicibeleka ncobeni amazuba aano?’ Kutegwa mujane bwiinguzi, amulibuzye kuti: ‘Ino mapenzi nzi aainda kubija ngobajisi bantu mazuba aano? Ino ngaali aayoosya kapati?’ Ambweni inga mwaamba nkondo, kusofwaazyigwa kwamasena, bugwebenga naa makulo. Lino amulange-lange njiisyo zimwi nzyoliyiisya Bbaibbele. Ciindi nomucita oobo, amulibuzye kuti, ‘Ikuti bantu nobali kupona kweelana anjiisyo eezyi, sena nyika nobwatali busena bubotu?’

KUYANDISYA LUUMUNO

“Balikkomene aabo baleta luumuno, nkaambo bayooitwa kuti mbana ba Leza.” (Matayo 5:9) “Kamusoleka kusikila mpomugolela kukkala muluumuno abantu boonse.”—Baroma 12:18.

LUSE AKULEKELELA

“Balikkomene aabo balaaluse, nkaambo bayoofwidwa luse.” (Matayo 5:7) “Amuzumanane kweengelelana akulekelelana camoyo woonse nokuba kuti umwi kajisi kaambo kakutongooka mweenzinyina. Mbubonya Jehova * mbwaakamulekelela camoyo woonse, andinywe mweelede kucita mbubonya oobo.”—Bakolose 3:13.

LUKAMANTANO AKATI KABANTU BAINDENE MUBALA

“Kuzwa kumuntu omwe [Leza] wakalenga bantu ibali muzisi zyoonse kuti bakkale munyika yoonse.” (Milimo 17:26) “Leza tasalululi, pele muzisi zyoonse kufwumbwa muntu uumuyoowa akucita ziluleme ulatambulwa kulinguwe.”—Milimo 10:34, 35.

KWIIBIKKILA MAANO NYIKA

“Jehova Leza wakabweza muntu akumubikka mumuunda wa Edeni kutegwa kaulima akuulanganya.” (Matalikilo 2:15) Leza ‘uyoobanyonyoona aabo banyonyoona nyika.’—Ciyubunuzyo 11:18.

KUSULAIKA BUSYAACIVWULEMWANGU ALIMWI ABWAAMU

‘Amulikasye kubusyaacivwulemwangu buli boonse, nkaambo nokuba kuti muntu kajisi zintu zinji buti, ibuumi bwakwe tabuzwi kuzintu eezyo nzyajisi.’ (Luka 12:15) “Bwaamu abusofwaazi bwamusyobo uuli woonse naa busyaacivwulemwangu tazyeelede nokuba kwaambwa akati kanu pe, mbubonya mbokweelede kubantu basalali.”—Baefeso 5:3.

KUSYOMEKA AKUBELEKA CANGUZU

“Tuyanda kuti katusyomeka muzintu zyoonse.” (Bahebrayo 13:18) “Ooyo uubba atabbi limbi pe, muciindi cakubba abeleke mulimo canguzu.”—Baefeso 4:28.

MBOCIYANDIKA KUGWASYA BAABO IBAYANDIKA LUGWASYO

“Amubaumbulizye aabo ibatyompedwe mumoyo, amubagwasye aabo ibatajisi nguzu, akubakkazikila moyo bantu boonse.” (1 Batesalonika 5:14) ‘Amulanganye bamucaala abamukabafwu mumapenzi aabo.’—Jakobo 1:27.

 Bbaibbele talitupi buyo mulongo wanjiisyo eezyi. Pele alimwi lilatuyiisya mbotweelede kuzibikkila maano njiisyo eezyi alimwi akuzibelesya mubuumi bwesu bwabuzuba abuzuba. Ikuti bantu banji nobali kuzitobela njiisyo izyaambwa atala aawa, nokwatali mapenzi manji munyika mazuba aano. Aboobo, masimpe kuti njiisyo zyamu Bbaibbele zicigwasya noliba lino! Pele ino njiisyo zyamu Bbaibbele inga zyamugwasya buti mazuba aano?

Mwaalumi musongo kapati wakaamba kuti: “Busongo bulabonwa kuti buliluleme kwiinda mumilimo yambubo.” (Matayo 11:19) Sena tamuzumini oobo? Busongo bwini-bwini bulalibonya kwiinda mumilimo iicitwa ciindi nomububelesya. Aboobo mulakonzya kuyeeya kuti: ‘Ikuti naa Bbaibbele lilagwasya ncobeni, sena talyeelede kubucinca buumi bwangu? Mbuti mbolikonzya kundigwasya mumapenzi ngondijisi lino?’ Amulange-lange cikozyanyo.

Ba Delphine * bakajisi zinji zyakucita mubuumi alimwi bakalikkomene. Pele cakutayeeyela, bakasikilwa mapenzi aataambiki. Mwanaabo musimbi mukubusi wakafwa, cikwati cakamana alimwi mali akamana. Bakaamba kuti: “Ndakanyongana kapati—kufwidwa mwana, kubula mulumi akubula ŋanda yakukkala. Ndakalimvwa kubula mpindu mubuumi.”

Ba Delphine bakabona mbwaali aamasimpe majwi aaya aakuti: “Imyaka yabuumi bwesu ili buyo 70, naa 80, ikuti muntu kali muyumu kapati. Pele yoonse  izwide buyo mapenzi amause; ilafwambaana kumana, eelyo tulauluka.”—Intembauzyo 90:10.

Ba Delphine bakajana lugwasyo mu Bbaibbele muciindi eeci cikatazya. Lyakabagwasya kapati. Mbubonya mbuli zibalo zyotatwe zitobela mbozitiitondezye, Bbaibbele lyakabagwasya abamwi ciindi nobakabelesya busolozi bwandilyo kulwana mapenzi aabo. Balimvwa kuti Bbaibbele lili mbuli cibumbwa eeciya icaambwa kumatalikilo aacibalo. Liliindene kapati amabbuku manji aakaindi alo aatacigwasyi. Sena cili boobo akaambo kakuti Bbaibbele lipangidwe aacintu ciindene? Sena mubwini lijisi mizeezo ya Leza, kutali yabantu?—1 Batesalonika 2:13.

Ambweni andinywe mwakajana kuti buumi mbufwaafwi kapati alimwi buzwide buyo mapenzi. Ciindi mapenzi naamuvwulila kapati, ino nkookuli nkomujana luumbulizyo alimwi alugwasyo?

Atulange-lange nzila zyotatwe Bbaibbele mbolikonzya kumugwasya mubuumi bwanu. Lilakonzya kumuyiisya mbomukonzya

1. kweeleba mapenzi ikuti kacikonzyeka.

2. kuzunda mapenzi ciindi naasika.

3. kuliyumya mubukkale mbomutakonzyi kucinca.

Zibalo zitobela zilabandika mbazu eezyi zyotatwe.