SENA inga mwacikonzya kubala Bbaibbele lyamumwaambo wa Chihebrayo? Ambweni tamukonzyi. Andiza buya tamunalibwene Bbaibbele lya Chihebrayo. Nokuba boobo, mulakonzya kulikkomanina kapati Bbaibbele lyanu lya Busanduluzi Bwanyika Mpya kwiinda mukwiiya cimwi cintu kujatikizya syaazibwene wamumwaanda wamyaka wa 16 Elias Hutter alimwi ama Bbaibbele aakwe obilo aa Chihebrayo ngaakamwaya.

Elias Hutter wakazyalwa mu 1553 ku Görlitz, dolopo lisyoonto ilili afwaafwi amunyinza wamazuba aano wacisi ca Germany acisi ca Poland alimwi a Czech Republic. Hutter wakaiya myaambo yaambaulwa mucooko ca Asia nkocili kujwe ku Lutheran University ku Jena. Naakajisi buyo myaka iili 24, wakasalwa kuba syaazibwene mumwaambo wa Chihebrayo ku Leipzig. Mbwaanga wakali sikubambulula lwiiyo, wakatalisya cikolo ku Nuremberg kwalo basicikolo nkobakali kukonzya kwiiya mwaambo wa Chihebrayo, Chigiriki, ci Latin, alimwi aci German mumyaka yone. Aciindi eeco, eeci tiicakali kukonzyeka kucitika kucikolo cimbi cili coonse nokuba kuyunivesiti.

Mu 1587, Hutter wakamwaya Bbaibbele lya Chihebrayo lyalo ilizyibidwe kapati kuti Cizuminano Cakaindi. Bbaibbele eeli lyakali kwiitwa kuti Derekh ha-Kodesh, izina ilyakazwa kubbuku lya Isaya 35:8 alimwi ilyaamba kuti “Nzila ya Busalali.” Akaambo kakuti lyakalembedwe kabotu, eeci cakapa kuti lyaambwe kuti “zyoonse zyakalembedwe mumo zyakali kutondezya buyo bubotu bwa Bbaibbele eeli.” Pele icakapa kuti Bbaibbele eeli liyandike kapati, ninzila basicikolo mobakali kulibelesya kalili cibelesyo cigwasya kapati kwiiya mwaambo wa Chihebrayo.

Kutegwa tumvwisye kaambo Bbaibbele lya Chihebrayo lya Hutter ncolyakali kugwasya kapati, atulange-lange buyumuyumu bobilo mbobakali kujana basicikolo ciindi nobakali kusola kubala Bbaibbele mu Chihebrayo. Buyumuyumu bwakusaanguna bwakali bwakuti alufabbeti yakaliindene alimwi tiiyakazyibidwe kapati, mpoonya bwabili bwakali bwakuti tukumbatizyo twamabala twakali kupa kuti cikatazye kuzyiba mabala eeni. Mucikozyanyo, amulange-lange bbala lya Chihebrayo ililembwa kuti ne’phesh (lyalo mu Chihebrayo cakusaanguna ililembwa boobu נפשׁ), kwaamba “buumi.” Mulugwalo lwa Ezekieli 18:4, kumatalikilo aabbala eeli kuli kakumbatizyo aaka ka Chihebrayo ha (ה), kalo ikapa kuti bbala eeli kalilembwa kuti han·ne’phesh (הנפשׁ). Kumuntu uutauzyi kabotu mwaambo wa Chihebrayo, ibbala lyakuti han·ne’phesh (הנפשׁ) lilakonzya kulibonya mbuli kuti liliindene kapati abbala lyakuti ne’phesh (נפשׁ).

Kutegwa agwasye basicikolo bakwe, Hutter wakabelesya nzila mpya iigwasya mukusimba—kulemba mabala aa Chihebrayo munzila iyakaindene amabala  aamwi. Mabala eeni wakali kwaasizya mpoonya tukumbatizyo tanaakali kutusizya. Kwaalemba munzila eeyi kwakapa kuti basicikolo cibaubile-ubile kuzyiba bbala lini lya Chihebrayo, calo icakabagwasya kwiiya mwaambo. Bbaibbele lya New World Translation of the Holy Scriptures—With References lyakabelesya nzila njemunya eeyi iigwasya mubupanduluzi buyungizyidwe. * Bbala lini lyakali kulembwa mumabala aasiisya, mpoonya tukumbatizyo twakali kulembwa mumabala aatasiisyi. Mabala aasizyigwa muzifwanikiso atondezya nzila njaakabelesya Hutter mu Bbaibbele lya Chihebrayo mulugwalo lwa Ezekieli 18:4 mpoonya anzila yakabelesyegwa mubupanduluzi buyungizyidwe bwa Reference Bible mukapango nkamunya aaka.

Hutter alimwi wakasimba Bbaibbele lizyibidwe kapati kuti Cizuminano Cipya, ilyakajisi myaambo iili 12. Bbaibbele eeli lyakasimbilwa ku Nuremberg mu 1599 alimwi kanji-kanji lyaambwa kuti Nuremberg Polyglot. Hutter wakali kuyanda kubikkilizya abusanduluzi bwa Magwalo aa Banakristo aa Chigiriki mumwaambo wa Chihebrayo. Pele wakaamba kuti, nokuba kuti “wakalilibambilide kubbadelela” busanduluzi bwa Chihebrayo oobu, kupa bambi mulimo ooyu nokwatakagwasya. * Aboobo wakasala kuti walo lwakwe asandulule Bbaibbele lya Cizuminano Cipya kuzwa mu Chigiriki kutola mu Chihebrayo. Hutter wakaleka milimo imbi yoonse akutalika kusandulula, aboobo wakamanizya mulimo woonse wakusandulula mumwaka omwe buyo.

Ino mbubotu nzi bwakali mubusanduluzi bwa Hutter bwa Magwalo aa Banakristo aa Chigiriki mumwaambo wa Chihebrayo? Mu 1891, syaazibwene wa Chihebrayo Franz Delitzsch wakalemba boobu: “Busanduluzi bwakwe bwa Chihebrayo butondezya kuti wakaluuzyi kapati mwaambo ooyu calo citacitiki-citiki akati ka Banakristo alimwi bucigwasya kapati amazuba aano, nkaambo kanji-kanji wakalicibwene kusala mabala aayelela aakubelesya.”

Hutter kunyina naakavwuba akaambo kamulimo wakwe wakusandulula; kweelede kuti ma Bbaibbele aakwe tanaakasambalwa kabotu. Nokuba boobo, mulimo ngwaakacita ulayandika kapati alimwi wazumanana kugwasya. Mucikozyanyo, Bbaibbele lyakwe lya Cizuminano Cipya lyamu Chihebrayo lyakalembululwa alimwi akusimbwa a William Robertson mu 1661 mpoonya alimwi amu 1798 a Richard Caddick. Naakali kusandulula kuzwa mu Chigiriki, cakweelela Hutter wakalemba zina lyabulemu lyakuti Kyʹri·os (Mwami) alimwi alyakuti The·osʹ (Leza) kwaamba “Jehova” (יהוה, JHVH) oomo malembe mwaakali kuzubululwa kuzwa mu Magwalo aa Chihebrayo naa oomo mwaakali kuyeeya kuti aamba Jehova. Eeci cilakkomanisya nkaambo nokuba kuti ma Bbaibbele manji aa Cizuminano Cipya taabelesyi zina lya Leza limugeme, Bbaibbele lya Hutter lipa bumboni butondezya mbociyandika kupilusya zina lya Leza mu Magwalo aa Banakristo aa Chigiriki.

Ciindi ciboola mwaakubona zina lya Leza, lyakuti Jehova mu Magwalo aa Banakristo aa Chigiriki naa mwaakulanga mubupanduluzi buyungizyidwe mu Reference Bible, amukayeeye mulimo ngwaakacita Elias Hutter alimwi ama Bbaibbele aakwe aalibedelede aa Chihebrayo.