Kuzyiba cipego cikonzya kukkomanisya muntu umwi tacili cintu cuubauba. Kayi sikutambula cipego nguukonzya kwiibona mpindu yacipego eeco. Alimwi buya sikutambula cipego ncabona kuti ncibotu, uumwi takonzyi kucibona boobo.

Mucikozyanyo, mukubusi ulakonzya kulimvwa kuti fooni mpya ilakonzya kuba cipego cibotu kapati. Kulubazu lumwi, bapati balakonzya kubotelwa kutambula cikono camukwasyi, mbuli cintu cabambwa kwamyaka minji mumukwasyi. Mumasena aamwi, cipego ncobasala bana alimwi abapati, inga mali, calo cipa kuti sikutambula aabelesye munzila iili yoonse njayanda.

Nokuba kuti kuli buyumuyumu, bantu banji balabikkila maano kuyandaula cipego ncayelede kupegwa muntu ngobayandisya. Nokuba kuti kujana cipego cili boobo tacili cuubauba lyoonse, kuyeeya twaambo tumwi ambweni kulakonzya kugwasya kutegwa muzwidilile. Atulange-lange twaambo tone tukonzya kupa kuti sikutambula akkutile.

Ncayandisya sikutambula. Mwaalumi umwi ku Belfast, Ireland nkoli Kunyika, wakaamba kuti ncinga yakubelesya muzisobano njaakapegwa naakajisi myaka iili 10 naa 11, cakali cipego cibotu kwiinda. Nkaambo nzi? Wakaamba kuti: “Nkaambo ndakali kwiiyanda kapati.” Majwi aaya atondezya kuti cintu ncayandisya muntu ncecikonzya kupa kuti acikkomanine cipego ncaapegwa naa pe. Aboobo kamutanapa muntu cipego, amusaangune kuyeeya kujatikizya muntu ooyo. Amusole kuzyiba cintu ncakonzya kukkomanina, nkaambo cintu ncakkomanina muntu kanji-kanji ncecintu ncayandisya. Mucikozyanyo, bantu ibajisi bazyukulu kanji-kanji balakkomana kuba antoomwe amikwasyi yabo. Balakonzya kuyandisya kuswaigwa-swaigwa abana babo alimwi abazyukulu. Ikuunka kuyooswaya masena aambi antoomwe amukwasyi kabaliko abamakaapa cilakonzya kuba cipego cibakkomanisya kapati.

Icikonzya kugwasya kuzyiba zintu nzyayandisya muntu, nkuba muswiilizi mubotu. Bbaibbele litukulwaizya “kufwambaana kuswiilila, kumuka kwaambaula.” (Jakobo 1:19) Lyoonse nomubandika abalongwe banu naa bacibbululu, amuswiililisye zintu  izitondezya nzyobayanda alimwi anzyobatayandi. Mpoonya mulakonzya kuzyiba cipego ncobakonzya kukkomanina kapati mwabapa.

Ncayandika sikutambula. Sikutambula ulakonzya kucikkomanina kapati nociba cipego citayi koomoonga ikuti kacili cintu cigwasya kulinguwe. Pele ino mbuti mbomukonzya kuzyiba muntu umwi ncayandika?

Cilakonzya kulibonya kuti nzila nguuba-uba yakuzyiba cintu ncayandika, nkumubuzya. Nokuba boobo, bunji bwabantu ibapa bamwi zipego tabaikkomanini nzila eeyi nkaambo taikonzyi kubapa kukkomana kapati, aboobo balombozya kupa cipego ceelede aciindi ncatayeeyeli sikucitambula. Kuyungizya waawo, bantu bamwi balalikwaya kwaamba zintu nzyobayanda naa nzyobatayandi, pele kanji-kanji inga tabaambi nzyobayandika.

Aboobo, amubikkile maano kapati kubukkale bwamuntu umwi aumwi. Sena ucili mwana naa mupati, takwete naa takwetwe, ulikwete naa ulikwetwe, wakalekwa, wakafwidwa, ulabeleka naa wakacita litaya? Mpoonya amuyeeyesye kujatikizya zipego nzyabulide muntu nzyomukonzya kumupa.

Kutegwa mucikonzye kumvwisya nzyobayandika aabo mbomuyanda kupa zipego, mweelede kubuzya bantu aabo ibakali mubukkale bukonzyenye. Ambweni balakonzya kumwaambila kujatikizya zintu ziyandika kapati nzyobatazyi bantu banji. Kwiinda mukubuzya-buzya, mulakonzya kupa cipego ciyandika kapati ncobatakonzyi kuyeeyela bamwi.

Ciindi ceelede. Bbaibbele lyaamba kuti: “Ijwi lyaambwa aciindi ceelede—eelo kaka ndibotu kapati!” (Tusimpi 15:23) Kapango aaka katondezya kuti majwi aambwa aciindi ceelede alakonzya kugwasya kapati. Eeci ncimwi buyo azintu nzyotucita. Mbubwenya mbuli jwi lyaambwa aciindi ceelede mbolikonzya kumukkomanisya muntu uuswiilila, icipego cipegwa aciindi ceelede cilakonzya kumukkomanisya kapati sikutambula.

Mulongwe uyanda kukwata naa kukwatwa. Mukubusi uyanda kumanizya cikolo. Banabukwetene balangila kuba amwana. Eezyi nzeziindi zimwi zipego nozivwula kupegwa. Bamwi bacibona kuti cili kabotu kubamba mulongo waziindi zyaalubazu izilangilwa kucitika mwaka utobela. Munzila eeyi balakonzya kulibambila kakucili ciindi kubona cipego cikonzya kweelela aciindi eeco. *

Eeci tacaambi kuti mweelede buyo kupa zipego muziindi zyaalubazu. Mulakonzya kujana lukkomano kwiinda mukupa zipego aciindi cili coonse. Nokuba boobo, mweelede kucenjela. Mucikozyanyo, kuti naa mwaalumi wapa mukaintu umwi cipego kakunyina akaambo kalimvwisya ncaamupeda, mukaintu inga wayeeya kuti cipego eeco ncitondezyo cakuti uyanda kuti basyabane. Pele ikuti katajisi makanze aali boobo, cipego eeco cilakonzya kuleta manyongwe. Eeci citupa kubikkila maano kukaambo akambi kayandika kapati, nkokuti makanze aasikupa.

Makanze aasikupa. Kweelana ambocatondezya cikozyanyo cainda, inga cabota kweezeezya naa sikucitambula cipego inga tanaamuyeeyela bumbi sikupa. Kulubazu lumbi, inga cabota kuti sikupa wazyiba walo makanze ngajisi mukupa cipego eeco. Nokuba kuti bantu banji inga kabayeeya kuti makanze ngobajisi mukupa zipego ali buyo kabotu, ibanji balapa zipego aziindi zimwi zyamwaka nkaambo balimvwa kuti beelede kucita oobo. Mpoonya bamwi inga kabayeeya kuti kwiinda mukupa zipego balatalika kulanganizyigwa munzila yaalubazu naa kupegwa cipego abalo.

Ino ncinzi ncomukonzya kucita kutegwa musinizye naa zipego nzyomupa bamwi zilapegwa amakanze mabotu? Bbaibbele lyaamba kuti: “Amucite zintu zyoonse caluyando.” (1 Bakorinto 16:14) Ikuti kupa kwanu kakuzwa ansi aamoyo alimwi akuti kamubabikkila maano basikucitambula, cakutadooneka cipego canu ciyootambulwa calukkomano alimwi muyoolibonena bubotu buboola akaambo kabwaabi bwini-bwini. Ciindi nomupa kuzwa ansi aamoyo, mupa kuti Taateesu wakujulu akkomane. Mwaapostolo Paulo wakabalumbaizya Banakristo bansiku baku Korinto ciindi nobakalyaaba kupa Banakristonyina baku Judaya zintu nzyobakali kuyandika zyakumubili. Paulo wakabaambila kuti:  “Leza uyanda muntu uupa kumwi kakkomene.”—2 Bakorinto 9:7.

Kuti twaabikkila maano makani aaya ngotwabandika, cilakonzya kupa kuti zipego nzyotupa bamwi kazibakkomanisya kapati. Makani aaya alimwi aambi, aliswaangene abubambe mbwaakabikka Leza bwakuti bantu batambule cipego cibotu kwiinda zyoonse. Tumukulwaizya kulanga-langa cipego eeci ciinda zyoonse kwiinda mukubala cibalo citobela.