Mubukkale oobu, mbungano yeelede kubona cikwati cakaindi kuti cakamana ciindi mwaalumi naakakwata kumbi alimwi yeelede kubona cikwati cipya kuti ncamumulawo. Kutegwa tutumvwisye twaambo ootu, atubone Jesu ncaakaamba kujatikizya kulekana alimwi akukwata kumbi.

Ku Matayo 19:9, Jesu wakapandulula kaambo kalikke kamu Magwalo kakonzya kupa kuti cikwati cimane. Wakaamba kuti: “Kufwumbwa uuleka mukaintu wakwe ikutali akaambo kabwaamu, akukwata umbi, wacita bumambe.” Kuzwa kumajwi aa Jesu aaya twiiya kuti, (1) bwaamu nkakaambo kalikke kamu Magwalo kakonzya kupa kuti bantu balekane, akuti (2) mwaalumi uuleka mukaintu wakwe ikutali akaambo kamu Magwalo akukwata umbi, wacita bumambe. *

Sena Jesu wakali kwaamba kuti mwaalumi iwacita bwaamu akuleka mukaintu wakwe, Magwalo alamuzumizya kukwata kumbi? Peepe. Kuti mwaalumi wacita bumambe, mukaintu wakwe ulakonzya kusala kumulekelela naa pe. Ikuti naa tanaamulekelela alimwi balekana kweelana amulawo, mwaalumi ulaangulukide kukwata kumbi awalo mukaintu ulaangulukide kukwatwa kumbi.

Kulubazu lumwi, mukaintu iwacitilwa cakutalulama ulakonzya kuti kalibambilide kumulekelela mulumaakwe kutegwa batalekani. Pele ino mbuti kuti mwaalumi iwacita bumambe wakaka kulekelelwa kumukaintu wakwe akuti walo alikke uyanda kuti balekana kweelana amulawo? Mbwaanga mukaintu ulilibambilide kumukulekelela mulumaakwe akuti batalekani, nkokuti mwaalumi taangulukide kukwata kumbi kweelana a Magwalo. Kuti mwaalumi wazumanana anzila iitali yamu Magwalo akukwata kumbi kakuli taangulukide kucita boobo, nkokuti wainduluka kucita bumambe, calo cikonzya kupa kuti apangilwe kkomitii yalubeta.—1Kor. 5:1, 2; 6:9, 10.

Ciindi mwaalumi uutazumizyidwe a Magwalo naakwata kumbi, ino mbungano icibona buti cikwati cakaindi alimwi acipya? Kweelana a Bbaibbele, sena cikwati cakaindi nkocicili? Sena mukaintu uciyandika kusala kumulekelela ooyo iwakali mulumaakwe? Sena cikwati cipya ceelede kubonwa kuti ncabumambe?

Kaindi, mbungano yakali kubona kuti cikwati cipya ncabumambe kufwumbwa buyo kuti ooyo iwakacitilwa cakutalulama ucipona, takwetwe naa kuti kunyina naakacita bwaamu. Nokuba boobo, Jesu kunyina naakaamba kujatikizya sikucitilwa cakutalulama ciindi naakabandika zyakulekana alimwi akukwata kumbi. Muciindi caboobo, wakaamba kuti mwaalumi uuleka mukaintu wakwe ikutali akaambo kamu Magwalo akukwata kumbi, wacita bumambe. Mubukkale buli boobu, kulekana alimwi akukwata kumbi, ooko Jesu nkwaakaamba kuti kuli mbuli kuti wacita bumambe, kupa kuti cikwati cimane.

Ciindi mwaalumi naaleka mukaintu wakwe akukwata kumbi, tacicikonzyeki kuti mukaintu wakwe  wakaindi ooyo iwakacitilwa cakutalulama amulekelele naa kumukaka. Aboobo mukaintu teelede kulimvwa kuti ucili aamukuli wakusala kumulekelela ooyo iwakali mulumaakwe. Kuyungizya waawo, mboicibona cikwati cipya mbungano takuyeeme akuti ooyo iwakacitilwa cakutalulama wakafwa, wakakwatwa kumbi naa wakacita bwaamu. *

Mucikozyanyo ncotwabandika atala aawa, mwaalumi wakacita bumambe, calo cakapa kuti balekane amukaintu wakwe. Ino kuti mwaalumi tanaakacita bumambe, pele wakamuleka mukaintu wakwe akukwata kumbi? Naa, ino kuti mwaalumi tanaakacita bwaamu katanamuleka mukaintu pele wakacita oobo naakamuleka, mpoonya wakakwata kumbi kakuli mukaintu wakwe wakalilibambilide kumulekelela? Mubukkale boonse oobu, kulekana naa kukwata kumbi, kwalo kuli nkucita bumambe, kulacimana cikwati cakaindi. Aboobo, cikwati eeco cipya ceelede kubona kuti ncamumulawo. Mbubwenya mbokwaambidwe mu Ngazi Yamulindizi yamu November 15, 1979, peeji 32 kuti, “mbwaanga lino wakanjila mucikwati cipya alimwi akuti takonzyi kwiile kucimana akujokela kumukaintu wakwe wakaindi; nkokuti cikwati cakaindi cakamana akaambo kakulekana, bumambe alimwi akukwata kumbi.”

Kucinca ooku takuubyi-ubyi kusetekana kwacikwati naa kuti bumambe tacili cibi cipati. Aboobo mwaalumi uuleka mukaintu ikutali akaambo kamu Magwalo alimwi akukwata uumbi kataangulukide kucita boobo kweelana a Magwalo, ulakonzya kupangilwa kkomitii yalubeta akaambo kakucita bumambe. (Ikuti ooyo ngwaakwata kali Munakristo, awalo ulapangilwa kkomitii yalubeta akaambo kakucita bumambe.) Nokuba kuti cikwati cipya tacibonwi kuti ncabumambe, mwaalumi takonzyi kweelela kupegwa mikuli yaalubazu mumbungano kwamyaka minji kusikila mane bantu bamwi bakaleke kunyema akaambo kacibi ncaakacita alimwi akutalika kumupa bulemu. Nokuba boobo, katanapegwa mukuli uuli woonse, baalu beelede kulanga-langa bukkale mwabede aciindi eeco mukaintu ooyo ambweni iwakacitilwa cabumpelenge alimwi abana baniini ibakalekelezyegwa asikucita cibi.—Mal. 2:14-16.

Ikuzyiba mbwaali mapati makani aakulekana alimwi akukwata kumbi ikutali kwamu Magwalo, Banakristo beelede kwiiya kubona cikwati mbuli mbwacibona Jehova kuti cilisetekene.—Muk. 5:4, 5; Heb. 13:4.