LUYANDISISYO ndondakajisi mukasimpe kamu Bbaibbele lwakalitalikide kale nozicitika zyoonse eezyi. Bamaama bakalijisi mabbuku aamba zyamu Bbaibbele, alimwi ndakali kuzikkomanina zibalo izyakali mukati, kwaambisya zifwanikiso. Bataata tiibakali kuyanda kuti bamaama kabandiyiisya nzyobakali kwiiya. Nokuba boobo, ndakali kuyandisya kuzyiba zinji alimwi ndakali kubuzya mibuzyo, aboobo bamaama bakatalika kwiiya andime muziindi bataata nzyobatakaliko aŋanda. Akaambo kaceeci, andime ndakasala kuti ndaabe buumi bwangu kuli Jehova. Ndakabbapatizyigwa mudolopo lya Blackpool, ku England, mu 1943 kandijisi myaka iili 10.

Kuzwa ciindi eeco, mebo abamaama twakali kutola lubazu mumulimo wamumuunda lyoonse antoomwe. Twakali kubelesya malekkoodi ikutalisya mibandi yamu Bbaibbele. Zilimba zyamalekkoodi eezyi zyakali zipati alimwi zyakali kulema makkilogilamu aali 4.5. Kamuyeeya buyo, mebo ndemwana musyoonto, nkeyaabulikwela acilimba cipati boobu!

Nondakakkwanya myaka iili 14, ndakayanda kuti ndibe mupainiya waciindi coonse. Bamaama bakandaambila kuti ndisaangune kubandika amulangizi wabbazu. Mukwesu ooyu wakandaambila kuti ndisole kwiiya mulimo umwi  iwakali kukonzya kundigwasya mumulimo wabupainiya. Aboobo ndakacita oobo. Nondakabeleka kwamyaka yobilo, ndakabuzya mulangizi wabbazu aumbi kujatikizya mulimo wabupainiya. Wakandaambila kuti, “Kotalika. Umukide buya!”

Aboobo, mu April 1949, mebo abamaama twakayeeya kuti zintu zimwi nzyotwakajisi muŋanda yaleenti, tuzipe buyo bamwi mpoonya zimwi tuzisambale akuunka ku Middleton, afwaafwi a Manchester ooko nkotwakatalika kucita bupainiya. Nokwakainda myezi yone, ndakasala mukwesu umwi kuti katubeleka limwi bupainiya. Bakuofesi yamutabi bakatupa muzeezo wakuti tuunke kumbungano mpya iyakali mu Irlam. Mpoonya bamaama abalo bakali kubeleka mulimo wabupainiya amucizyi wamumbungano iimbi.

Nokuba kuti ndakali buyo amyaka iili 17, mebo amukwesu ngotwakali kubeleka limwi twakapegwa mukuli wakweendelezya miswaangano nkaambo kwakali buyo bakwesu basyoonto beelela mumbungano mpya eeyi. Mukuya kwaciindi, ndakaambilwa kuyoobelekela ku Mbungano yaku Buxton, iyakajisi basikumwaya basyoonto yakali kuyandika kugwasyigwa. Zintu zyoonse eezyi izyakacitika ndakali kuzibona kuti zyakali kundigwasya kulibambila mikuli njondakali kuyoobeleka kumbele.

Mu 1951, ndakalembela kuyoojanika kucikolo ca Watchtower Bible School of Gilead. Nokuba boobo, mu December 1952, bakandiita kuti ndinjile mulimo wabusikalumamba. Ndakalomba kuti bandigwisye akaambo kakuti ndakali mubelesi wa Leza waciindi coonse, pele  nkuta tiiyakazumina kuti ndakali mubelesi wa Leza aboobo bakandaanga kwamyezi iili cisambomwe. Kandicili muntolongo ndakatambula lugwalo lwakundiita kucikolo canamba 22 ca Gilead. Aboobo mu July 1953, ndakakkwela bwato ibwakali kwiitwa kuti Georgic, bwakali kutozya ku New York.

Nondakasika, ndakacikonzya kujanika kumuswaangano wamu 1953 iwakajisi mutwe wakuti New World Society. Kuzwa waawo, ndakakkwela citima kuunka ku South Lansing, ku New York, ooko cikolo nkocakabede. Mbwaanga ndakazwide muntolongo, ndakajisi buyo mali masyoonto. Nondakaseluka mucitima, kuli bbaasi ilyakaleelede kunditola ku South Lansing. Tiindakajisi naaba mali masyoonto aakali kuyandika kubbadela mubbaasi, aboobo ndakakweleta buya kumuntu ngotwakatanta limwi.

Ku Cikolo ca Gilead twakayiisyigwa ‘kuba zintu zyoonse kubantu bamisyobo yoonse’ mumulimo wabumisyinali. (1Kor. 9:22) Swebo totatwe, nkokuti mebo, ba Paul Bruun, aba Raymond Leach twakatumwa ku Philippines. Twakasaanguna kulindila ma visa eesu kwamyezi iili mbwiibede; mpoonya twakaunka ku Rotterdam kubelesya bwato, kumane twakaunka ku Lwizi lwa Mediterranean, ku Suez Canal, ku Indian Ocean, ku Malaysia, aku Hong Kong. Twakatola mazuba aali 47 katweenda mulwizi! Mpoonya twakasika ku Manila mu November 19, 1954.

Mpoonya kucinca kwakatalika, nkokuti bantu bapya, cisi cipya, alimwi mane buya amwaambo mupya. Nokuba boobo, swebo totatwe twakatumwa kumbungano iyakali mu Dolopo lya Quezon, oomo bantu banji ibakkala mumo mobaambaula mwaambo wa Chingisi. Akaambo kaceeci, nokwakainda myezi iili cisambomwe, twakazyi buyo mabala masyoonto aamumwaambo wa Chitagalog. Mulimo wesu iwakali kutobela wakali kuyootugwasya kumana penzi eelyo.

Bumwi buzuba mu May 1955 notwakasika aŋanda kuzwa mubukambausi, mebo a Mukwesu Leach twakajana magwalo muŋanda yesu. Mumagwalo aayo twakaambilwa kuti tweelede kuba balangizi bamabazu. Ndakajisi buyo myaka iili 22, pele mulimo ooyu wakandipa coolwe cakuba “zintu zyoonse kubantu bamisyobo yoonse” munzila zipya.

Mucikozyanyo, ndakapa makani aabuleya aakusaanguna kandili mulangizi wabbazu kumbele aacintoolo cakali mumunzi abuleya. Ndakazikuzyiba kuti cakali cilengwa ku Philippines mumazuba aayo kupa makani aabuleya kubuleya ncobeni! Nondakali kuswaya mbungano ziindene-indene, ndakali kubandika makani mumasena aabuleya mbuli mumamaaketi, mumaanda mapati aamfwulumende imucitilwa miswaangano, mumasena musobaninwa zisobano, mumapaaki, alimwi kanji-kanji amumbali aamigwagwa. Ciindi cimwi katuli mu Dolopo lya San Pablo, mvwula mpati yakapa kuti nditacikonzyi kubandika makani aabuleya kumaaketi, aboobo ndakapa muzeezo kubakwesu ibakali kweendelezya wakuti makani apegwe mu Ŋanda ya Bwami. Naakamana kupegwa makani, bakwesu bakabuzya kuti naa makani aaya alakonzya kulipootwa kuti muswaangano wabuleya mbwaanga tanaakacitilwa aabuleya.

Lyoonse ndakali kusikila mumaanda abakwesu. Nokuba kuti maanda akali masyoonto alimwi taakwe naakajisi zintu zinji, lyoonse akali abulondo. Kanji-kanji ndakali koona ansi aamunseme. Zisambilo zyakali zyaanze, aboobo ndakaiya kusambila aanze. Ndakali kutanta zyootoota amabbaasi, alimwi zimwi ziindi ndakali kubelesya bwato ikuunka kunsumbu zimbi. Mumyaka yoonse yamulimo wangu, taakwe nondakajisi mootokala.

Kubeleka mubukambausi alimwi akuswaya mbungano kwakandigwasya kwiiya mwaambo wa Chitagalog. Taakwe nondakanjila cikolo cakwiiya mwaambo ooyu, pele ndakawiiya kwiinda mukuswiilila kubakwesu mubukambausi alimwi akumiswaangano. Bakwesu bakali kuyanda kundigwasya aboobo ndakalumba akaambo kakukkazika moyo nkobakajisi alimwi akusyomeka.

Mukuya kwaciindi, mikuli mipya njondakapegwa yakandipa kuti ndizumanane kucinca.  Mu 1956 ciindi Mukwesu Nathan Knorr naakaswaya, ndakapegwa mukuli wakubandika abasimubweza twaambo kumuswaangano wacisi coonse. Tiindakajisi luzyibo kapati, aboobo bakwesu bamwi cakulisungula bakandigwasya kutegwa ndiiye. Kakutanainda mwaka, kwakabambwa aumbi muswaangano wacisi coonse alimwi Mukwesu Frederick Franz wakaswaya kuzwa kumaofesi mapati. Ciindi nondakali kubeleka kandili mulangizi wamuswaangano wacooko, ndakaiya ku Mukwesu Franz kujatikizya kulisungula kwakwe kwakucinca kweelana abantu bakubusena ooko. Bakwesu bakubusena ooko bakakkomana kapati kubona Mukwesu Franz kasamide cisani caku Philippines citegwa barong Tagalog, ciindi naakali kupa makani aabuleya.

Ndakeelede kucinca alimwi ciindi nondakapegwa mukuli wakubeleka kandili mulangizi wacooko. Aciindi eeco twakali kutondezya bantu filimu yakuti The Happiness of the New World Society, kanji-kanji twakali kweebelela anze mumasena aabuleya. Zimwi ziindi, twakali kunyonganyizyigwa azyuuka. Zyakali kuboola akaambo kamumuni wapulojekita alimwi zyakali kunjila mupulojekita. Eelo kaka wakali mulimo mupati kusalazya pulojekita twamana kutondezya filimu! Tiicakali cuuba-uba kutondezya mafilimu aaya, pele cakali kukkomanisya kubona bantu mbobakali kukkomana kuzyiba mbunga ya Jehova yanyika yoonse.

Bapaizi ba Katolika bakayunga beendelezi ba mfwulumende kuti batatupi mapepa aatuzumizya kuba amiswaangano. Naa kusola kutusabila kwiinda mukulizya milangu yacikombelo cabo  kufwumbwa ciindi makani naakali kupegwa kumapulogilamu eesu ngotwakali kucitila afwaafwi azikombelo zyabo. Nokuba boobo, mulimo wakazumanana alimwi bantu banji bakubusena oobo lino mbakombi ba Jehova.

Mu 1959, ndakatambula lugwalo lwakundizyibya kuti ndinoobelekela kuofesi yamutabi. Eeci cakandipa zyoolwe zinji zyakuti ndiiye. Mukuya kwaciindi, ndakalombwa kuswaya mitabi mumasi aambi. Mulweendo lumwi, twakazyibana amucizyi Janet Dumond, iwakali kubeleka kali misyinali ku Thailand. Twakali kulembelana kwaciindi cili mbocibede eelyo kumbele twakazookwatana. Twabeleka antoomwe kwamyaka iili 51 mumulimo ooyu uukkomanisya katuli banabukwetene.

Muciindi coonse eeci, ndakaba acoolwe cakuswaya bantu ba Jehova mumasi aali 33. Eelo kaka ndilalumba kapati kuti milimo njondakabeleka musyule oomu yakandigwasya kulibambila buyumuyumu bulibedelede bwakubeleka abantu baindene-indene! Nyendo zyakuswaya eezyi zyakandipa kuti ndicince mbondizibona zintu alimwi zyakandigwasya kubona luyando lwa Jehova mboluleta bantu baindene-indene antoomwe.—Mil. 10:34, 35

Eelo kaka cali kukkomanisya kubeleka abakwesu baku Philippines! Imweelwe wabasikumwaya kwacecino ciindi waya atala ziindi zili 10 kwiinda mbowakabede notwakatalika kubelekela kubusena kuno. Mebo aba Janet twazumanana kubeleka antoomwe kuofesi yamutabi yaku Philippines mu Dolopo lya Quezon. Nokuba kuti kwainda myaka iinda ku 60 kandibeleka mulimo ooyu kucisi cimbi, ndiciyandika kuti kandilibambilide kucinca bukkale bwangu kweelana ambwayanda Jehova. Kucinca ikwacitika caino-ino mumbunga kwapa kuti tuzumanane kuba bantu banyoneka mumulimo wesu kuli Leza alimwi akubakwesu.

Twali kusolekesya kutambula cintu cili coonse ncotwabona kuti cileendelana akuyanda kwa Jehova, aboobo eeci capa kuti tupone buumi bukkomanisya kapati. Kuyungizya waawo, twasolekesya kucinca mumbazu ziyandika alimwi akubabelekela kabotu bakwesu. Inzya, kufwumbwa kuti Jehova kayanda, tulikanzide kuba “zintu zyoonse kubantu bamisyobo yoonse.”