SENA kuli mukwesu naa mucizyi ngomuzyi iwakaunka kucisi cimbi kwalo ikuyandika basikumwaya ba Bwami banji? Bakamboni bali boobu kanji-kanji tubaamba kuti aabo ibabelekela kumasena aabulide basikumwaya. Sena kuli nomwakalibuzya kale kuti: ‘Ino ncinzi cibakulwaizya kuyoobelekela kumasi aambi? Mbuti mbobalibambila kucita mulimo uuli boobu? Sena andime inga ndacikonzya kutola lubazu mumulimo ooyu?’ Nzila mbotu yakujana bwiinguzi kumibuzyo eeyi, nkwiinda mukubandika abakwesu alimwi abacizyi aaba. Aboobo amuleke lino tubandike ambabo.

Ino ncinzi cakamupa kuti mutalike kuyeeya kuunka kuyoobelekela kucisi cimbi kwalo ikubulide basikumwaya? Ba Amy, lino bajisi myaka iili 35, bazwa ku United States. Baamba kuti: “Kwamyaka minji, ndakali kuyeeya kujatikizya kuyoobelekela kucisi cimbi, pele ndakali kubona kuti mbaakani eeyi tandikonzyi kwiizuzikizya.” Ino ncinzi cakabapa kuti bacince mbobakali kuzibona zintu? “Mu 2004 banabukwetene ibabelekela ku Belize bakanditamba kuti ndikabaswaye alimwi akuti ndikabeleke ambabo mumulimo wabupainiya kwamwezi omwe. Ndakacita oobo alimwi buya ndakakkomana kapati! Nokwakainda mwaka omwe, ndakaunka ku Ghana kuyoobeleka ooko kandili mupainiya.”

Myaka yainda, ba Stephanie, lino bajisi myaka yakuzyalwa iitandila ku 30 abalo ibazwa ku United States, bakabulanga-langa bukkale bwabo bamane bakayeeya balaamba: ‘Tandiciswi-ciswi alimwi tandijisi mikuli yakulanganya mukwasyi. Mubwini, ndilakonzya kucitila Jehova zintu zinji kwiinda nzyondili mukucita lino.’ Ikulilingula cakusyomeka munzila iili boobu kwakabakulwaizya kuunka ku Ghana kutegwa bayungizye mulimo wabo. Ba Filip aba Ida, bapainiya banabukwetene kuzwa ku Denmark, ibajisi myaka yakuzyalwa iili kuma 50 lyoonse bali kulombozya kuunka kucilawo ikubulide basikumwaya. Bakasola kujana nzila mbobakali kukonzya kuzuzikizya kulombozya kwabo. Ba Filip bakati: “Ciindi notwakaba acoolwe cakuunka ku Ghana, cakali mbuli kuti Jehova wakatwaambila kuti: ‘Kamuya!’” Mu 2008 bakaunka ku Ghana alimwi bakabeleka ookuya kwamyaka iinda aali yotatwe.

 Ba Hans aba Brook, banabukwetene bapainiya ibajisi myaka yakuzyalwa iili kuma 30, babelekela ku United States. Mu 2005 bakagwasyilizya mukupa lugwasyo nokwakacitika ntenda yaguwo pati iitegwa Hurricane Katrina. Nokwakainda ciindi, bakalembela kuti bagwasyilizye mumulimo wakuyaka mumasi aambi pele tiibakatambulwa pe. Ba Hans balayeeya ategwa, “Mpoonya twakayeeya makani aamwi kumuswaangano wacooko aakaamba kuti Mwami Davida wakacinca mbaakani yakwe ciindi naakaambilwa kuti takoozumizyigwa kuyaka tempele. Kaambo aaka kakatugwasya kubona kuti cili buyo kabotu kucinca mbaakani zyakumuuya.” (1Mak. 17:1-4, 11, 12; 22:5-11) Ba Brook abalo bayungizya kuti, “Jehova wakali kuyanda kuti tukonkomone amulyango umbi.”

Nobakamana kuswiilila zyakuluula zikkomanisya kuzwa kubalongwe babo ibakabelekela kumasi aambi, ba Hans aba Brook bakakulwaizyigwa kuyoocita mulimo wabupainiya kucisi cimbi. Mu 2012 bakaunka ku Ghana ooko nkobakabeleka kwamyezi yone, kugwasyilizya mumbungano iyakali kubelesya mwaambo wakutambaika. Nokuba kuti bakapiluka ku United States, lukkomano ndobakajana akaambo kakubelekela ku Ghana lwakabagwasya kuzumanana kuba aluyandisisyo lwakubikka zintu zyakumuuya mubusena bwakusaanguna mubuumi bwabo. Kuzwa ciindi eeco, bakalijisi acoolwe cakugwasya kuyaka mutabi ku Micronesia.

Ino mbuti mbomwakalibambila kutegwa mukabelekele kubusena kubulide basikumwaya? Ba Stephanie bakaamba kuti: “Ndakavwuntauzya zibalo zyamu Ngazi Yamulindizi izibandika makani aamba zyakuyoobelekela kubusena kubulide basikumwaya. * Kunze lyaboobo, ndakabandika abaalu mumbungano alimwi amulangizi wabbazu amukaintu wakwe kujatikizya kulombozya kwangu kwakuunka kuyoobelekela kucisi cimbi. Cipati kwiinda zyoonse eezyi ncakuti, bunji bwaziindi ndakali kumwaambila Jehova mumupailo kujatikizya mbaakani yangu.” Cimwi ncobakacita ba Stephanie ncakuubya-ubya buumi bwabo, calo icakabagwasya kuyobola mali aakuyoobelesya baunka kuyoobelekela kucisi cimbi.

Ba Hans bakaamba kuti: “Twakapaila  kuli Jehova kuti atusololele nkaambo twakalilibambilide kuunka kufwumbwa nkwaakali kuyootutuma. Mumipailo yesu twakali kubwaamba abuzuba bugaminide notwakakanzide kubweza ntaamu eeyi.” Banabukwetene aaba bakalemba magwalo kumitabi yone. Nobakatambula lugwalo lwakubaita kuzwa kumutabi waku Ghana, bakaunka nkuko kabajisi makanze aakuswaya ookuya kwamyezi yobilo buyo. Ba Hans bakaamba kuti, “Twakakkomana kapati kubelekela antoomwe ambungano cakuti twakayungizya ciindi ncotwakeelede kukkala ookuya.”

Ba George aba Adria, banabukwetene ibajisi myaka yakuzyalwa iitandila kuma 40 ibakkala kucisi ca Canada, lyoonse bakali kukayeeya kaambo kakuti Jehova ulakulongezya kusala kuli kabotu, ikutali buyo kuba amakanze mabotu. Aboobo bakabweza ntaamu zigaminide kutegwa baizuzikizye mbaakani yabo. Bakabandika amucizyi umwi iwakali kubelekela kubusena kubulide basikumwaya ku Ghana akumubuzya mibuzyo minji. Alimwi bakalemba magwalo kumutabi waku Canada awakucisi ca Ghana. Ba Adria bakati, “Lyoonse twakali kulangaula nzila mbotwakali kukonzya kuubya-ubya buumi bwesu kwiinda mbotwakacitide kale.” Kusala kubotu kuli boobu kwakapa kuti bacikonzye kuunka ku Ghana mu 2004.

Ino mbuyumuyumu nzi mbomwakajana nomwakaunka, alimwi ino mwakaliyumya buti? Buyumuyumu mbobakasaanguna kujana ba Amy, bwakali bwakuyeeya kuŋanda. “Zintu zyoonse zyakaliindene kapati ambozyakabede kuŋanda.” Ino ncinzi cakabagwasya? “Mafooni ngobakali kunditumina bamukwasyi wangu kundaambila mbobakali kulumba akaambo kamulimo wangu, cakandigwasya kuyeeya icakandipa kuti ndibweze ntaamu iili boobu. Mebo abamukwasyi wangu mukuya kwaciindi twakatalika kubandika aa Intaneti. Mbwaanga twakali kubonana, cakali mbuli kuti bamukwasyi wangu bakali  afwaafwi.” Ikumvwana amucizyi umwi uusimide wakubusena oobu kwakabagwasya kuzyiba zilengwa ziindene-indene. Ba Amy baamba kuti, “Mweenzuma ooyu wakaba ngomuntu ngondakali kubuzya kufwumbwa naa ndakatazyigwa kuzyiba kaambo bantu ncobakali kucitila zintu munzila imwi. Kwiinda mukugwasyigwa anguwe, ndakaiya zintu nzyondakeelede kucita alimwi anzyondatakeelede kucita, calo icakandigwasya kapati kuzumanana kubeleka mulimo kandikkomene.”

Ba George aba Adria baluula kuti, nobakaunka ku Ghana ciindi cakusaanguna, cakali mbuli kuti bapiluka kumazuba aakaindi. Ba Adria baamba kuti: “Muciindi cakubelesya mincini iiwasya, twakali kubelesya maanza. Akwalo kujika cakulya kwakali kulibonya mbuli kuti kutola ciindi cilamfwu kapati kwiinda mbotwakazyibide. Pele nokwakainda ciindi, bukkale ibwakali kulibonya mbuli kuti mbuyumu bwakatuyiisya kuzyiba zintu zimwi zipya.” Ba Brook baamba kuti: “Nokuba kuti swebo tobapainiya tulayaanya buyumuyumu, tupona buumi bukkomanisya. Ikuti twazibikka antoomwe zyakuluula zyoonse zikulwaizya nzyotujisi, zitugwasya kubona kuti masimpe mulimo ooyu uletela bulumbu.”

Nkaambo nzi ncomubakulwaizya bamwi kucita mulimo wa Bwami ooyu? Ba Stephanie baamba kuti, “Kukambaukila mucilawo imujanika bantu banji ibayandisisya kwiiya kasimpe cakuti bayanda kwiiya Bbaibbele buzuba abuzuba, ncintu cikkomanisya kapati. Kuunka kuyoobelekela kubusena kubulide kapati, nkusala kumwi nkondakacita ikwiinda kubota!” Mu 2014, ba Stephanie bakakwatwa kuli ba Aaron, alimwi mazuba aano babelekela kumutabi waku Ghana.

Ba Christine, imupainiya iwakazwa ku Germany lino ibajisi myaka iili kuma 30 baamba kuti, “Inzya, ncintu cikkomanisya kapati kubelekela kubusena kubulide basikumwaya.” Ba Christine bakabeleka ku Bolivia kabatanaunka ku Ghana. Bakati: “Mbwaanga ndili kulamfwu amukwasyi wangu, lyoonse ndilanga kuli Jehova kuti andigwasye. Mazuba aano waba mwini-mwini kulindime kwiinda mbwaakabede kaindi. Kunze lyaboobo, ndilakkomana kapati akaambo kalukamantano lulibedelede luliko akati kabantu ba Jehova. Mulimo ooyu wapa kuti buumi bwangu bube ampindu kapati.” Caino-ino, ba Christine bakakwatwa kuli ba Gideon, alimwi bazumanana kubelekela antoomwe ku Ghana.

Ba Filip aba Ida batwaambila ncobakacita kutegwa bagwasye bantu mbobaiya limwi Bbaibbele kuyaambele. Ba Filip baamba kuti: “Twakali kuba aziiyo zisika ku 15 naa kwiinda waawo, pele lino tuba buyo aziiyo zisika ku 10 kutegwa tubayiisye cakulomya.” Sena ziiyo eezyi zyakagwasyigwa? Ba Filip baluula kuti: “Ndakaiya amukubusi utegwa Micheal. Twakali kwiiya abuzuba alimwi wakali kulibambila kabotu cakuti twakalimanizya kuliiya bbuku lya Ncoliyiisya Bbaibbele mumwezi omwe buyo. Kuzwa waawo, Michael wakaba sikumwaya uutanabbapatizyigwa. Buzuba bwakusaanguna notwakaunka limwi mumulimo wamumuunda, wakandibuzya kuti: ‘Sena inga mwandigwasya kusololela ziiyo zyangu?’ Ndakamulanga kandigambidwe. Michael wakaamba kuti wakalitalisyide kale ziiyo zyotatwe aboobo wakali kuyanda kugwasyigwa kuzisololela.” Masimpe, bamayi banji baciyandika mbwanga lino nobaba basikwiiya Bbaibbele abalo mbaamayi ba Bbaibbele.

Mboobu ba Amy mbobakaluula kujatikizya mbobakafwambaana kuzyiba ikubula kupati ikwakaliko: “Nokwakainda buyo ciindi cisyoonto kuzwa notwakasika ku Ghana, twakaunka kuyookambauka mumunzi umwi musyoonto akulangaula basyaataambi. Cigambya ncakuti, twakajana basyaataambi ibali lusele mumunzi omwe ooyo!” Mukuya kwaciindi, ba Amy bakakwatwa kuli ba Eric, alimwi balabeleka antoomwe kabali bapainiya baalubazu. Balagwasyilizya mumbungano iibelesya mwaambo wakutambaika kutegwa bagwasye basikumwaya basyaataambi ibainda ku 300 alimwi abasyaataambi ibajisi luyandisisyo ibakkala mucisi eeci. Pele kujatikizya ba George aba Adria balo baamba kuti, kubelekela mucisi ca Ghana kwabapa coolwe cakulibonena ameso ncocaamba kuba bamisyinali. Elo kaka bakakkomana kapati nobakatambwa kuyoojanika ku Cikolo ca Gileadi mukkilasi yanamba 126! Mazuba aano, balabeleka kabali bamisyinali mucisi ca Mozambique.

Cilakulwaizya kapati kubona bantu banji ibazwa mumasi aambi kababeleka canguzu antoomwe abakwesu alimwi abacizyi bamucisi eeci kutegwa bagwasyanye mumulimo wakutebula. (Joh. 4:35) Nsondo ansondo, bantu ibabalilwa ku 120 balabbapatizyigwa mucisi ca Ghana. Mbubwenya mbuli bakwesu ibali 17 ibakaunka kuyoobelekela kubusena kubulide basikumwaya mucisi ca Ghana, basikumwaya banji balakulwaizyigwa aluyando ndobajisi kuli Jehova kuti ‘balyaabe cakuliyandila.’ Balaunka kuyoobelekela mumasena oomo imuyandika bakambausi ba Bwami banji. Eelo kaka Jehova ulabakkomanina kapati babelesi aaba ibalyaabide kumulimo ooyu!—Int. 110:3; Tus. 27:11.