Amube Alweetelelo ‘Kubantu Boonse’
CIINDI Jesu naakali kuyiisya basikwiiya bakwe kujatikizya mbobeelede kukambauka makani mabotu, wakatondezya kuti talili lyoonse bantu nobanoowutambula kabotu mulumbe wa Bwami. (Lk. 10:3, 5, 6) Mumulimo wesu, tulakonzya kujana bantu bakonzya kutunyemena naa kutufwubaazya buya. Masimpe, zintu zili boobo zilakonzya kupa kuti cituyumine kuzumanana kubeetelela aabo mbotukambaukila.
Muntu silweetelelo ulabona zintu nzyobayandika alimwi amapenzi abamwi, ulabeetelela, akuyanda kubagwasya. Nokuba boobo, kuti twacileka kubeetelela aabo mbotujana mumulimo wamumuunda, andiswe tulakonzya kucileka kuba basungu kumuuya. Kulubazu lumwi, ciindi notutondezya lweetelelo, cili mbuli kuti tusosela mulilo, tupa kuti busungu bwesu mumulimo wakukambauka buzumanane.—1Tes. 5:19.
Ino mbuti mbotukonzya kutondezya lweetelelo nociba ciindi nocili ciyumu kucita boobo? Atulange-lange zikozyanyo zyotatwe nzyotuyandika kwiiya, nkokuti Jehova, Jesu, alimwi amwaapostolo Paulo.
AMWIIYE LWEETELELO LWA JEHOVA
Kwamyaka minji kapati, Jehova waliyumya kukusampaulwa kwazina lyakwe. Nokuba boobo, wazumanana kutondezya “luzyalo kubantu batalumbi ababi.” (Lk. 6:35) Luzyalo lwakwe lulatondezyegwa kwiinda mukukkazyika moyo kwakwe. Jehova uyanda kuti “bantu boonse” bafwutulwe. (1Tim. 2:3, 4) Nokuba kuti Leza ulabusulaika bubi, bantu ubabona kuti balayandika kapati alimwi tayandi kuti muntu uuli woonse anyonyoonwe.—2Pet. 3:9.
Jehova ulibwene Saatani mbwaazwidilila koofwaazya mizeezo yabantu batasyomi. (2Kor. 4:3, 4) Banji bakayiisyigwa bube bubyaabi alimwi anjiisyo zyakubeja kuzwa kubwana, calo cipa kuti cibayumine kuzumina kasimpe. Jehova uliyandide kubagwasya bantu bali boobo. Ino tuzyi buti?
Amubone Jehova mbwaakali kubabona bana Nineve bansiku. Nokuba kuti bakali basinkondo, Jehova wakaambila Jona kuti: “Sena mebo tandeelede kuufwida lubomba munzi mupati wa Nineve, oomo imuli bantu bainda ku 120,000 ibatacizyi nokuba kwiindanya cibi acibotu?” (Jon. 4:11) Jehova wakabona bana Nineve kuti tiibakakazyi kasimpe kujatikizya nguwe, aboobo wakabafwida luse akutuma Jona kuti akabacenjezye.
Mbubwenya mbuli Jehova, bantu tubabona kuti balayandika kapati. Tulakonzya kumwiiya kwiinda mukusungwaala kugwasya kufwumbwa bantu ibanga bayanda kuswiilila, nokuba kuti balakonzya kulibonya kuti tabakonzyi kuutambula mulumbe.
AMWIIYE LWEETELELO LWA JESU
Mbubwenya mbuli Bausyi, Jesu wakabeetelela bantu ibakali kuyandika lugwasyo lwakumuuya. “Lino naakabona makamu aabantu, wakabeetelela nkaambo bakali kupenzyegwa alimwi bakalimwaikide mbuli mbelele zitakwe mweembezi.” (Mt. 9:36) Jesu wakali kubona bwini mbobabede bantu; wakalizyi kuti aabo ibakaboola kuzoomuswiilila bakayiisyigwa zyakubeja alimwi akuti tiibakali kweendelezyegwa kabotu abasololi babo bazikombelo. Nokuba kuti wakalizyi kuti bantu banji bakali kuyoozumizya zintu ziindene-indene kubasinkilila kubweza ntaamu, Jesu wakazumanana “kubayiisya zintu zinji.”—Mk. 4:1-9.
Mutatyompwi ikuti naa muntu kumatalikilo tanaatondezya luyandisisyo
Ciindi bukkale nobwacinca, bantu balakonzya kucinca kujatikizya mbobakabona kasimpe
Ciindi bantu nobatautambuli kabotu mulumbe wesu, tweelede kubikkila maano akubona kaambo kabapa kucita boobo. Ambweni bamwi inga kabajisi mizeezo iitaluzi kujatikizya Bbaibbele naa kujatikizya Bunakristo akaambo kazikozyanyo zibyaabi izyabaabo ibalitaminina kuba Banakristo. Ambweni bamwi bakaambilwa zyakubeja kujatikizya nzyotusyoma. Alimwi bamwi balakonzya kusulaikwa abantu bamucilawo cabo naa abanamukwasyi ikuti batutambula kabotu.
Bantu bamwi mbotujana mumulimo balakonzya kuukaka mulumbe wesu akaambo kazintu zibyaabi izyakabacitikila zyalo izyakabatyompya. Misyinali wazina lya Kim wakaamba kuti: “Mucibeela cimwi cacilawo cesu, bantu banji bakajatikizyigwa munkondo mwalo mobakasweekelwa zintu zyabo zyoonse. Tabajisi bulangizi bwini-bwini bwakumbele. Balikatazyidwe mumizeezo. Mubusena oobu, kanji-kanji tulajana bantu bakazya mulumbe wesu. Aciindi cimwi, ndakaumwa nondakali kukambauka.”
Ino mbuti ba Kim mbobazumanana kubeetelela bantu nomuba mubukkale buli boobo? Bakaamba kuti: “Ciindi nondifwubaazyigwa, ndilasola kuyeeya lugwalo lwa Tusimpi 19:11, ilwaamba kuti: ‘Bupampu bwamuntu bulamulesya kufwambaana kunyema.’ Ikuyeeya zintu zyakabacitikila mubuumi aabo ibali mucilawo cesu kulandigwasya kubeetelela. Alimwi tabali boonse mbotujana ibaukaka mulumbe wesu. Mubusena mbubwenya oobu, tulijisi nyendo zyakupilukila zibotu.
Tulakonzya kulibuzya kuti, ‘Ino mbuti mbondikonzya kuutambula mulumbe wa Bwami ikuti nondali ndime ndili mubukkale mobabede aabo mbotukambaukila?’ Mucikozyanyo, ino mbuti kuti ziindi zinji twakaambilwa zyakubeja kujatikizya Bakamboni ba Jehova? Mubukkale buli boobo, ambweni andiswe tulakonzya kukaka aboobo inga twayandika kufwidwa lweetelelo. Ciindi notuyeeya malailile aa Jesu aakweendelezya bamwi mbubonya mbotuyanda kuti batweendelezye, tulakulwaizyigwa kutondezya lweetelelo nociba ciindi nocili ciyumu kucita boobo.—Mt. 7:12.
AMWIIYE LWEETELELO LWA PAULO
Mwaapostolo Paulo wakatondezya lweetelelo nokuba kuli basikukazya. Nkaambo nzi? Tanaakaluba kujatikizya bukkale bwakwe bwakaindi. Wakaamba kuti: “Musyule ndakali sikusampaula Leza asikupenzya bantu bakwe alimwi asikasampusampu. Nokuba boobo, ndakafwidwa luse, nkaambo ndakacita zintu cakutazyiba alimwi ndakanyina lusyomo abuniini.” (1Tim. 1:13) Wakalizyi kuti Jehova alimwi a Jesu bakamufwida luse lupati. Aboobo, wakali kukonzya kububona bukkale bwakwe bwakaindi mubantu bamwi mbaakali kukambaukila.
Ziindi zimwi, Paulo wakali kujana bantu bakali kusyoma kapati njiisyo zyakubeja. Ino wakacita buti? Lugwalo lwa Milimo 17:16 lulaamba kuti ciindi Paulo naakali mu Atene, “wakabijilwa kapati mumoyo naakabona kuti munzi wakazwide mituni.” Nokuba boobo, Paulo wakabelesya bukkale oobo ibwakamupede kubijilwa kupa bumboni bubotu. (Mil. 17:22, 23) Wakali kucinca nzila nzyaakali kubelesya kukambauka alimwi wakali kubandika munzila ziindene-indene kubantu ibakajisi bukkale bwiindene-indene kutegwa ‘ziyume zitete abafwutule bamwi.’—1Kor. 9:20-23.
Tulakonzya kumwiiya Paulo kwiinda mukuzyiba bube bubyaabi naa njiisyo zyakubeja nzyobajisi bantu mpoonya akubelesya bupampu kubaambila “makani mabotu aacintu ciinda kubota.” (Is. 52:7) Mucizyi wazina lya Dorothy wakaamba kuti: “Mucilawo cesu, bantu banji bakayiisyigwa kuti Leza ngusilunya alimwi ulabeteka bantu. Ndilabalumbaizya bantu bali boobu akaambo kalusyomo lwabo luyumu muli Leza, mpoonya ndilabaambila ncolyaamba Bbaibbele kujatikizya bube bwa Jehova bwaluyando azisyomezyo zyakwe zyakumbele.”
‘AMUZUMANANE KUZUNDA BUBI KWIINDA MUKUCITA ZIBOTU’
Mbotuyaabuya kwini “kumazuba aamamanino,” tweelede kulangila kuti bube bwabantu bamwi mbotukambaukila ‘buyoobija akubijila limwi.’ (2Tim. 3:1, 13) Pele tatweelede kulekela bukkale oobu kutupa kuleka kutondezya lweetelelo naa kutupa kumaninwa lukkomano. Jehova ulakonzya kutupa nguzu ‘zyakuzumanana kuzunda bubi kwiinda mukucita zibotu.’ (Rom. 12:21) Mupainiya wazina lya Jessica wakaamba kuti: “Ziindi zinji ndilajana bantu balisumpula, ibanyansya mulumbe wesu alimwi andiswe. Zintu zili boobo zilanyemya. Ciindi nonditalika mubandi, ndilapaila kuli Jehova cakaumuumu akulomba lugwasyo lwakwe kutegwa kandibona muntu mbuli mbwamubona walo. Eeci cilandigwasya kutabikkila maano kujatikizya mbondilimvwa, pele muciindi caboobo, cindipa kuyeeya kujatikizya mbondikonzya kumugwasya muntu.”
Tulazumanana kuyandaula baabo ibeelela buumi butamani
Mukuya kwaciindi, bamwi bantu bayoozumina kwiiya kasimpe
Alimwi tweelede kubona mbotukonzya kukulwaizya babelesima. Jessica wakayungizya kwaamba kuti: “Ikuti naa umwi wesu kuli cintu cibyaabi icamucitikila, ndilasoleka kutacibikkila maano. Muciindi caboobo, ndilaucinca mubandi kwiinda mukwaamba zintu zili kabotu, nkokuti mbuli bubotu bujanika mumulimo wesu nokuba kuti bamwi tabautambuli kabotu.
Jehova ulibuzyi kabotu buyumu-yumu boonse mbotujana mumulimo wamumuunda. Eelo kaka ceelede kuti cilamukkomanisya kapati nabona mbotwiiya luse lwakwe! (Lk. 6:36) Pele Jehova takazumanani kubeetelela alimwi akubakkazikila moyo bantu munyika eeyi mane kukabe kutamani. Tulakonzya kusyoma kuti ulizyi kabotu-kabotu ciindi ceelede cakunyonyoona bweende bwazintu oobu. Kusikila akacite boobo, mulimo wesu wakukambauka weelede kucitwa cakubinda. (2Tim. 4:2) Aboobo atuzumanane kuubeleka mulimo wesu cabusungu alimwi akutondezya lweetelelo ‘kubantu boonse.’
