Sena Mulizyi?
Kunze aabumboni bwamu Bbaibbele, mbumboni nzi bumbi ibutondezya kuti bana Israyeli bakali bazike mu Egepita?
Bbaibbele lyaamba kuti bana Midiyani nobakamutola ku Egepita Josefa, Usyi, Jakobo alimwi amukwasyi wakwe bakazwa ku Kanana akulongela ku Egepita. Bakaakukkala munyika ya Goseni, kumbali aamulonga wa Nile. (Matl. 47:1, 6) Bana Israyeli “bakali kuyaabwiindila kuvwula akuba basinguzu kapati.” Aboobo bana Egepita bakatalika kubayoowa kapati bana Israyeli cakuti bakabapanga kuba bazike.—Kul. 1:7-14.
Basikukazya bamazuba aano tabaazumini makani aaya aamu Bbaibbele, baamba kuti nkaano buyo. Nokuba boobo, kuli bumboni buliko ibutondezya kuti balunyungu lwa Semu * bakakkala mu Egepita wansiku kabali bazike.
Mucikozyanyo, basikuvwukkula zyakaindi bakajana matongo ku Egepita nkoili kunyika. Dr. John Bimson wakaamba kuti kuli bumboni bwakuti kwakali minzi yalunyungu lwa Semu iisika ku 20 naa kwiinda waawo abusena oobo. Kuyungizya waawo, sikwiiya zyabukkale bwansiku bwamu Egepita James K. Hoffmeier wakaamba kuti: “Kuzwa mu 1800 kusikila mu 1540 B.C., Egepita bwakali busena bubotu kapati ibwabantu baambaula mwaambo waci Semetic mucooko ca Asia nkocili kumbo.” Wakayungizya kuti: “Bulamfwu bwaciindi eeci buleendelana aciindi cabamausyi bana Israyeli, aboobo cileendelana aciindi eeco icaambidwe kulugwalo lwa Matalikilo ciindi Abrahamu, Izaka alimwi a Jakobo nobakaunka ku Egepita kuyooyandaula cakulya, maanzi alimwi amacelelo mabotu.”
Kuli abumbi bumboni ku Egepita nkoili kumusanza. Cipaya cakaindi caku Middle Kingdom (c. 2000–c. 1600 B.C.E.) cakajisi mazina aabazike ibakali kubelekela muŋanda ku Egepita nkoili kumusanza. Mazyina aayinda ku 40 aakali acipaya eeco, ngabalunyungu lwa Semu. Bazike aaba naa babelesi, bakali kubeleka mulimo wakujika, kusuma alimwi amilimo buyo iimbi iiminya. Hoffmeier wakaamba kuti: “Mbwaanga balunyungu lwa Semu ibainda ku 40 bakali kubelekela aŋanda yomwe mucooko ca Egepita [Egepita nkoili kumusanza], mweelwe wabantu aaba ibakali mu Egepita kweelede kuti wakali mupati, kwaambisya aabo ibakali kukkala mumbali aamulonga.”
Sikuvwukkula zyakaindi David Rohl wakalemba kuti, mazina aabazike bamwi “amvwika mbuli mazina aamu Bbaibbele.” Mucikozyanyo, cipaya cijisi mazina aakozyenye amazina mbuli aakuti Isakara, Aseri alimwi a Sifura. (Kul. 1:3, 4, 15) Rohl wakati: “Oobu mbumboni bwamasimpe bwakuti bana Israyeli bakali bazike mu Egepita.”
Dr. Bimson wakaamba kuti: “Tunsiyansiya tulembedwe mu Bbaibbele itwaamba zyabuzike mu Egepita alimwi azya Kulonga tulijisi bumboni.”
^ munc. 4 Semu wakali umwi wabana ba Nowa botatwe. Kulangilwa kuti balunyungu lwa Semu balabikkilizya bana Elamu, bana Asuri, ba Kasidi bakusaanguna, ba Hebrayo, bana Siriya, alimwi amisyobo iindene indene yaku Arabia.
