MIBALA yeebeka yabayuni aaba ilakonzya kulibonya ciindi nobauluka musyokwe kabali banji! Kweebeka ooku kwakabagambya kapati basikuvwuntauzya baku Europe ibakasikide ku Central and South America kutalikila kumamanino aamwaanda wamyaka wa 15. Nzyobakabona bakali bayuni bali mbuli bagwele bajisi myeeye milamfwu ibajanika kumasena aakasaala aku America. Kalitanalampa, zifwanikiso zyazilenge eezyi zibotu kapati zyakalibonya amamaapu aatondezya busena oobu kacili citondezyo caparadaiso mpya njobakajana.

Bayuni aaba basimbi abasankwa balaamubala uulibonya kabotu, baliindene abayuni bamwi bajisi mibala mibotu. Alimwi bayuni aaba balicenjede kapati, mbayuni babelekela antoomwe, balo basabila kapati ciindi nobalila. Kababalilwa ku 30 mutanga, bayuni aaba balazwa nkoboona mafwumofwumo kuunka kuyooyandaula nseke, micelo, alimwi azyakulya zimbi. Bayuni aaba kanji-kanji babelesya mala aabo kujata cakulya mpoonya akucilya kubelesya mulomo mupati woongomene. Alimwi balakonzya kupandula cipapa ciyumu camucelo. Bamana kulya, inga bavwula kuunka mumajeleele naa kunkomwe yamulonga kuyoolya bulongo bwalo bukonzya kubagwasya kugwisya misamu iikola iijanika muzyakulya alimwi akubapa misamu iimbi iiyandika.

 Kanji-kanji bayuni aaba batalika kuzyala bana, tabaandaani mubuumi bwabo, alimwi balagwasyanya kulanganya bana babo. Misyobo iindene-indene yabayuni aaba, bakkala mumpako yazisamu, muzilindi zyakunkomwe yamulonga alimwi amuzyuulu, naa mumpako zyamumajeleele, ooko nkobakonzya kubonwa kabasonzolana, cisimbi acisankwa. Nokuba kuti bana babo balatola myezi iili 6 kuti basime, balazumanana kukkala abazyali kwamyaka yotatwe. Bayuni aaba bamusyokwe, balapona myaka iili 30 naa 40, pele bamwi bakavwubidwe bakapona myaka iinda ku 60. Kuli misyobo iibalilwa ku 18, imwi akati kayeeyo ilitondezyedwe ansi aawa.