Mibuzyo Yabasikubala

Ino Mbuti Mbungano ya Banakristo Mboikubona Kuciindilizya Kulya?

Ijwi lya Leza lilabusula bucakolwa akuciindilizya kulya kuba cilengwa kuli baabo babelekela Leza. Aboobo mbungano ya Banakristo muntu ooyo mulyatu uutalangilwi kucinca imubona mbuli mboimubona cakolwa. Cakolwa naa muntu mulyatu teelede kuba umwi wambungano ya Banakristo.

Ibbuku lya Tusimpi 23:20, 21 lyaamba kuti: “Utakali akati kabacakolwa, nanka akati [kabantu balya cakwiindilizya], nkaaambo mukolwi  asindya bayoosikilwa bucete, alimwi butolo bulasamika muntu madeludelu.” Ku Deuteronomo 21:20 tubala zyamuntu ‘sicinguni uutaswiilili’ iweelede kujaigwa kweelana a Mulawo wa Musa. Ikweelana akapango aaka, mbazu zyobilo zyasicinguni alimwi uutaswiilili zyamuntu ooyo nzyakuti, wakali ‘mukolwi asindya.’ Cilasalala kuti mu Israyeli yansiku kuciindilizya kulya kwakali kubonwa kuba cilengwa citali kabotu kuli baabo bakali kulombozya kubelekela Leza.

Aboobo, ino kuciindilizya kulya caamba nzi, alimwi ino mbuti Magwalo aa Cigiliki aa Banakristo mbwaakanana kujatikizya makani aaya? Muntu uuciindilizya kulya kupandululwa kuti “mmuntu uujisi cilengwa cabulyatu uulida avwuuma alimwi uunywa kapati.” Aboobo kaambo nkakuti, kuciindilizya kulya ninzila imwi yabulyatu, aboobo Jwi lya Leza litwaambila kuti ba “sindya” naa balyatu bali akati kabantu aabo batakakoni Bwami bwa Leza. (1 Ba-Korinto 6:9, 10, Ba-Filipo 3:18, 19; 1 Petro 4:3) Kunze lyaboobo, mwaapostolo Paulo naakacenjezya Banakristo kujatikizya “milimo yanyama,” wakaamba ‘bukolwi, injalalando azimwi zili boobo.’ (Ba-Galatiya 5:19-21) Kuciindilizya kulya kanji-kanji kulabikkilizya abukolwi alimwi anjalalando. Aboobo kwiindilizya kulya kuli bikkilizyidwe mumajwi aa Paulo aakuti “azimwi zili boobo.” Kujatikizya “milimo yanyama,” Munakristo uujisi mpuwo yakuciindilizya kulya alimwi uutayandi naaceya kucinca cilengwa cakwe eeci cabulyatu, weelede kugusyigwa mumbungano.—1 Ba-Korinto 5:11, 13. *

Nokuba kuti Jwi lya Leza cakolwa limubona kuti ncimwi buyo amuntu uuciindilizya kulya, cakolwa takatazyi kuzyiba, pele uuciindilizya kulya ulakatazya. Izitondezyo zyakuti muntu ngucakolwa kanji-kanji zilalibonya atuba. Pele kuzyiba kuti muntu ooyu wasika aciimo cakuti aitwe kuti ulaciindilizya kulya, cilakatazya nkaambo tatukonzyi kuzyiba kwiinda mukwiile kumubona buyo mbwalibonya. Aboobo nobalanganya makani aali boobu, baalu bamumbungano beelede kubikkila maano kapati alimwi beelede kubelesya bupampu.

Mucikozyanyo, kuneneya kapati kulakonzya kuba citondezyo cakwiindilizya kulya, pele takuli boobo lyoonse. Kwiindilizya kuneneya kulakonzya kuba akaambo kabulwazi. Bulwazi bwamumukwasyi bulakonzya kupa umwi kuti mafwuta avwule mumubili. Alimwi tweelede kuzyiba kuti kuneneya kapati ooku ndipenzi lyakumubili, kakuli kuciindilizya kulya ndipenzi lyamu mizeezo. Bulwazi bwakuneneya caamba kwiindilila kwamafwuta aayandika mumubili, kakuli kuciindilizya kulya mbulyatu naa nkulya kwakulida avwuuma. Aboobo kuciindilizya kulya takuzyibwi akaambo kamubili muntu ngwajisi, pele muntu mbwalya cakulya. Muntu inga kajisi mubili wansaizi ambweni buya ulakonzya kauli muniini, pele ulakonzya kuba muntu uucindilizya kulya. Aboobo, mbokubonwa kuti mubili ngwansaizi kuliindenyi kweelana akubusena abumwi.

Ino nzyitondezyo nzi zyakwiindilizya kulya? Kwiindilizya kulya ncilengwa mukulya—ikulya cakuti da lyayuma nta limwi wasika nkwazimbilwa naa kuciswa. Kulya kuli boobu kutondezya kuti muntu tabikkili maano kusampu ndyaleta kuli Jehova alimwi akulilemeka kubotu kwabantu Bakwe. (1 Ba-Korinto 10:31) Kulubazu lumwi, muntu uulya ciindi aciindi takonzyi kulondwa kwaambwa kuti “mulyatu.” (Ba-Efeso 5:5, NW) Aboobo, kweelana abbuku lya Ba-Galatiya 6:1, Munakristo uuli boobo inga wayandika lugwasyo. Paulo ulati: “Bakwesu, kuti muntu wajanwa uli mukubisya, nywebo nomuli basimuuya muleelede kumuboozya, nkabela nimucita obo muleelede kuba amyoyo iibombede.”

Ino nkaambo nzi lulayo lwa Bbaibbele lwakutaciindilizya kulya ncoluyandika kapati mazuba aano? Lulayandika nkaambo kakuti kujatikizya mazuba eesu aano, Jesu wakacenjezya kuti: “Amukalilangisye, kuti ambweni myoyo yanu ilalengaala nkaambo kabulyatu, abukolwi, amakataazyo aabuumi buno, abuzuba obuya nobuyoomutilimuna mbuli kooze.” (Luka 21:34, 35) Kutaciindilizya kulya ninzila imwi iiyandika kutegwa tutanyonganizyigwi kumuuya.

Kunywa naa kulya cansaizi nenzila ya Bunakristo. (1 Timoteo 3:2, 11) Aboobo, masimpe Jehova uya kubagwasya aabo boonse basoleka kuccilila lulayo lwa Bbaibbele kuba acilengwa cibotu mukulya alimwi akunywa.—Ba-Hebrayo 4:16.

Bupanduluzi buyungizidwe