Sena Bulangizi Bwanu Bwa Paradaiso Kuli Mpobuyeeme?

“Ndizi umwi muntu uuli muli-Kristo . . . wakakwempelwa ku-Paradaiso.”—2 BA-KORINTO 12:2-4.

1. Ino nzisyomezyo nzi zyamu Bbaibbele izibapa kukkomana bantu banji?

PARADAISO! Sena muciyeeyede mbomwakalimvwa ciindi cakusaanguna nomwakamvwa cisyomezyo ca Leza caparadaiso anyika? Mulakonzya kuyeeya nomwakaiya kuti ‘meso aaboofwu ayoobona, matwi aabasinke ayoosinkuka alimwi maanzi ayooboneka munkanda’ munzila iikondelezya kapati. Ino mbuti mbomwakalimvwa nomwakaiya businsimi bwaamba kuti umpe uyookkala akabelele alimwi kapongo asiluwe? Sena tiimwakakkomana kapati kubala zyabubuke bwabayandwa besu bafwide kabajisi bulangizi bwakuzumanana kupona mu Paradaiso eeyo?—Isaya 11:6; 35:5, 6; Johane 5:28, 29.

2, 3. (a) Ino nkaambo nzi ncocikonzya kwaambilwa kuti bulangizi bwanu bwamu Bbaibbele kuli mpobuyeeme? (b) Ino mbumboni nzi abumwi ayeeme bulangizi mbotujisi?

² Bulangizi bwanu kuli mpobuyeeme. Mulijisi twaambo ncomweelede kusyoma zisyomezyo zyamu Bbaibbele zya Paradaiso eeyo. Mucikozyanyo, mulijisi lusyomo mumajwi aa Jesu kuli simucita zibi wakakankamidwe aakuti: “Tunooli ayebo mu-Paradaiso.” (Luka 23:43) Mulacisyoma cisyomezyo eeci cakuti: “Swebo tulangila ijulu ipya anyika impya, mbubonya mbuli mbwaakatusyomezya. Mulinzizyo momukala bululami.” Alimwi mulacisyoma cisyomezyo cakuti Leza uyoosindula misozi kumeso eesu; kunoonyina lufwu; buumba, kulila alimwi amacise ziyoomana. Eeci caamba kuti nyika yaparadaiso iyakuba alimwi!—2 Petro 3:13; Ciyubunuzyo 21:4.

³ Pele bumboni abumbi bwabulangizi bwa Paradaiso bujatikizya cintu cimwi Banakristo munyika yoonse mobajatikizyidwe kale. Ino ncinzi eeco? Leza wabamba paradaiso yakumuuya alimwi wabikka bantu bakwe mulinjiyo. Ikaambo kakuti “paradaiso yakumuuya” kalakonzya kumvwika mbuli kuti nkakulengelezya buyo naa inga kayuma kukateelela, pele paradaiso iili boobo yakasinsimwa alimwi nkwiili ncobeni.

Cilengaano ca Paradaiso

4. Ino ncilengaano nzi caambidwe ku 2 Ba-Korinto 12:2-4, alimwi ino nguni ulangilwa kuti cakamucitikila?

⁴ Kumakani aaya, amubone ncaakalemba imwaapostolo Paulo kuti: “Ndizi umwi muntu uuli muli-Kristo, . . . wakakwempelwa kujulu lyatatu. Ndizi kuti oyo muntu na (kali amubili nanka kazwide mumubili nsizi mebo, Leza nguuzi mbwaakabede) wakakwempelwa ku-Paradaiso, wakaswiilila makani aataambiki aatondwa kwaambwa kumulomo wamuntu.” (2 Ba-Korinto 12:2-4) Cibalo eeco cilatobela twamana buyo tupango oomo Paulo mwaakaamba ikweelela kwakwe kwakuti wakali mwaapostolo. Kuyungizya waawo, kunyina Bbaibbele nolyaamba muntu uumbi wakacitikilwa cilengaano cili boobo, alimwi Paulo ngonguwe uutwaambila kujatikizya ncico. Aboobo kuboneka kuti Paulo ngonguwe wakaba acilengaano eeci. Iciindi Jehova naakamutondezya cilengaano eeci, ino njiili “paradaiso” njaakanjila?—2 Ba-Korinto 11:5, 23-31.

5. Ncinzi ncaatakabona Paulo, aboobo ino “paradaiso” eeyo yakali buti?

⁵ Makani aazingulukide cibalo taatondezyi kuti “julu lyatatu” caamba busena buzingulukide nyika. Ibbaibbele bunji bwaziindi libelesya namba 3 kwiiminina kukankaizya, kuvwulisya naa nguzu ziyungizyidwe. (Mukambausi 4:12; Isaya 6:3; Matayo 26:34, 75; Ciyubunuzyo 4:8) Aboobo, ncaakabona Paulo mucilengaano cakali sumpukide naa atala. Cakali cakumuuya.

6. Ino mmakani nzi aakacitika kaindi aatugwasya kumvwisya ncaakabona Paulo?

 ⁶ Ibusinsimi bwamu Bbaibbele ibwamusyule bulatugwasya kumvwisya. Ibantu bakwe bansiku nobakaleka kusyomeka kulinguwe, Leza wakakanza kulekela bana Babuloni kulwana Juda alimwi a Jerusalemu. Eeco cakasololela kukunyonyoonwa mu 607 B.C.E., kweelana ambozyakali kutobelana kucitika zintu mu Bbaibbele. Ibusinsimi bwakaamba kuti nyika yakali kuyoozumanana kaili tongo kwamyaka iili 70; mpoona Leza wakali kuyoozumizya ba Juda beempedwe kujokela alimwi akupilusya bukombi bwakasimpe. Eeci cakacitika kuzwa mu 537 B.C.E. kuya kumbele. (Deuteronomo 28:15, 62-68; 2 Bami 21:10-15; 24:12-16; 25:1-4; Jeremiya 29:10-14) Pele ino ncinzi cakacitika kunyika yini kwiigama? Kwamyaka eeyo iili 70 yakaba tongo, cimpayuma, ibusena bwakali kukkala bamwaaba. (Jeremiya 4:26; 10:22) Nokuba boobo, kwakali cisyomezyo eeci: “Jehova uyooumbulizya Zioni. Uyoowumbulizya matongo aakwe oonse; inkanda yakwe uyooyisandula kuti ibe mbuli Edeni, amabbuwa aakwe ayooba mbuli muunda [naa Paradaiso kweelana a Septuagint] wa-Jehova.”—Isaya 51:3; majwi aayungizyidwe.

7. Ino ncinzi cakeelede kucitika nokwakainda myaka iili 70 yalunyonyooko?

⁷ Eeco cakacitika nokwakainda myaka iili 70. Ikwiinda mukulongezyegwa a Leza, bukkale bwakacinca, bwakabota. Amweezyeezye buyo kujatikizya makani aaya: “Inkanda amatongo zyoonse ziyoosekelela, alyalo igundu liyookondwa akusyuuka malubaluba aaebeka. Kusyuuka liyoosyuuka loko, akusekelela liyoosekelela akwiimba. . . . Cilema unooya busotauka mbuli insya, alulimi lwasyataambi luyooimbisya. Nkaambo maanzi ayooboneka munkanda atulongalonga tuyookunka mugundu. Musenga uupisya uyoosanduka kuba iziba, ayalo nyika injumu iyooba tusensa twamaanzi. Muŋanda yabamwaaba mubakalede muyooba mani amatete amalelebo.”—Isaya 35:1-7.

Bantu Bapilusyidwe Alimwi Basandukide

8. Ino tuzyi buti kuti caandaano 35 cabbuku lya Isaya cakali kwaamba bantu?

⁸ Elo kaka kwakaba kusanduka! Itongo lyaba paradaiso. Pele businsimi oobu abumbi busyomeka bwakatondezya kuti alimwi kwakali kuyooba kucinca mubantu, mbubonya mbuli tongo ilyakaba nyika muzyalwa micelo. Ino nkaambo nzi ncotukonzya kwaambila boobo? Isaya wakabikkila maano “[ku]banunwidwe ba-Jehova,” ibakali kuyoopiluka kunyika yabo “akuza bwiimba” alimwi akujana “lukondo abusekelezi.” (Isaya 35:10) Eeco cakacitikila bantu ikutali nyika iini pe. Kuyungizya waawo, Isaya mutupango tumbi wakasinsima kujatikizya bantu bakapilusyigwa ku Zioni kuti: “Bategwe mibanga yabululami njaakasimpika Jehova . . .  Nkaambo mbubonya mbuli nyika mbwiisyuusya insyuuko zyayo, . . . Jehova uyoomeneka bululami alutembaulo kumeso aamasi oonse.” Alimwi Isaya wakaamba boobu kujatikizya bantu ba Leza: “Jehova uyookweenzya lyoonse . . . Uyooabila zifuwa zyako inguzu, nkabela uyooba mbuli muunda [uutililwa kabotu].” (Isaya 58:11; 61:3, 11; Jeremiya 31:10-12) Aboobo mbubonya mbuli nyika yini mboyakali kucinca akubota, kwakali kuyooba kucinca kuba Juda bakapilusyigwa.

9. Ino “[ni]paradaiso” nzi Paulo njaakabona, alimwi ndiilili noyakazuzikizyigwa?

⁹ Eeci cakacitika kaindi citugwasya kumvwisya ncaakabona Paulo mucilengaano. Cakali kuyoojatikizya mbungano ya Bunakristo, eeyo njaakaamba kuti “muunda wa-Leza uulimwa” alimwi iwakeelede kuzyala micelo. (1 Ba-Korinto 3:9) Ino ndiilili cilengaano eeco nocakali kuyoozuzikizyigwa? Paulo wakaamba ncaakabona kuti ‘nciyubunuzyo,’ icintu cakali kuyoocitika kumbele. Wakalizyi kuti aakufwa kwakali kuyooba luleyo kapati. (2 Ba-Korinto 12:1; Incito 20:29, 30; 2 Ba-Tesalonika 2:3, 7) Eelyo basiluleyo nobakali kuya ambele alimwi akulibonya kubavwumbilila, Banakristo bakasimpe kunyina nobakali kunga bakozyanisyigwa kumuunda uuzyala micelo. Pele ciindi cakali kuyoosika eelyo bukombi bwakasimpe nobwakali kuyoosumpulwa alimwi. Bantu ba Leza bakali kuyoopilusyigwa kutegwa ‘baluleme babale mbuli izuba mu Bwami bwa Bausyi.’ (Matayo 13:24-30, 36-43) Eeco cakacitika ncobeni nokwakainda buyo myaka misyoonto kuzwa ciindi Bwami bwa Leza nobwakakkazyikwa kujulu. Alimwi mukwiinda kwamyaka minji, calibonya kuti bantu ba Leza bali muparadaiso yakumuuya, eeyo Paulo njaakabonena limwi mucilengaano eeco.

10, 11. Ino nkaambo nzi ncotukonzya kwaambila kuti tuli muparadaiso yakumuuya nokuba kuti tuli bantu batalondokede?

¹⁰ Masimpe, tulizyi kuti aumwi muntu talondokede, aboobo tacitugambyi pe kuti zimwi ziindi kulaba mapenzi mbubonya mbocakabede ku Banakristo bakuciindi ca Paulo. (1 Ba-Korinto 1:10-13; Ba-Filipi 4:2, 3; 2 Ba-Tesalonika 3:6-14) Nokuba boobo, amuyeeye paradaiso yakumuuya motubede lino. Twabweelanya abukkale bubyaabi motwakabede, twakaponesyegwa kumuuya. Alimwi amweelanye nzala njotwakajisi kaindi abudodoodo bwakumuuya lino mbotujisi. Muciindi cakupenga mbuli mucimpayuma camusenga cakumuuya, bantu ba Leza balazuminwa kulinguwe alimwi balijisi zilongezyo zitalivwulili kapati. (Isaya 35:1, 7) Muciindi cakoofwaazyigwa mumudima wakumuuya uusiya mbi, tulabona mumuni walwaanguluko alimwi akukkomaninwa a Leza. Ibanji ibatakali kumvwa ibusinsimi bwa Bbaibbele bakatalika kumvwisya ncaamba Magwalo. (Isaya 35:5) Mucikozyanyo, tuulunzuma twa Bakamboni ba Jehova munyika yoonse bakaiya businsimi bwa Daniele kapango akapango. Mpoonya bakatulanga-langa twaambo toonse alimwi azibeela zili mucaandaano cimwi acimwi cabbuku lyamu Bbaibbele  lya Isaya. Icakulya cakumuuya eeco cikazyikka moyo cipa bumboni bwaparadaiso yakumuuya motubede.

¹¹ Alimwi amuyeeye buyo ikucinca mubukkale nkobacita babombe myoyo bazwa kubukkale boonse mbobazumanana kumvwisya alimwi akulitobela Jwi lya Leza. Babeleka canguzu kusamununa bube bwabunyama mbobakajisi. Ambweni anywebo mwakacita oobo akuzwidilila kapati. Eeco ncobacita abalo ibanyoko abacizyi bakumuuya. (Ba-Kolose 3:8-14) Aboobo mbomuswaangana kumbungano ya Bakamboni ba Jehova, muli abantu ibakaba basiluumuno alimwi ibakkomanisya. Masimpe tabanalondoka pe, pele tabakonzyi kwaambwa kuti bali mbuli basyuumbwa naa banyama babutambo. (Isaya 35:9) Ino kuyanzana kwakumuuya ooku kubotu alimwi kwaluumuno kutondezya nzi? Cilisalede kuti tulijisi ciimo cakumuuya eeco cakweelela ncotwiita kuti paradaiso yakumuuya. Alimwi paradaiso yesu yakumuuya yiiminina paradaiso anyika mwalo motuyookkomana ikuti twazumanana kusyomeka kuli Leza.

12, 13. Ncinzi ncotweelede kucita kutegwa tuzumanane kuba muparadaiso yesu yakumuuya?

¹² Pele kuli cintu cimwi ncotuteelede kuluba. Leza wakaambila bana Israyeli kuti: “Amubambe malailile oonse ngendamulailila buzuba obuno, kuti muyume, munjile kuvuba nyika.” (Deuteronomo 11:8) Kubbuku lya Levitiko 20:22, 24, inyika njiyona eeyo ilaambidwe kuti: “Amubambe milao yangu yoonse ambeta zyangu zyoonse, muzicite, kuti nyika itamuluki oko nkonsi mutole kukukala mulinjiyo. Lino nywebo, ndamwaambila kuti muyoovuba nyika yabo; ndamupa njiyo kuti mwiivube, nyika iikunka malili abuci.” Ee, kuvwuba Nyika Yakasyomezyegwa kwakayeeme akuba acilongwe cibotu a Jehova Leza. Nkaambo kakuti bana Israyeli bakaalilwa kumutobela Leza, ncaakazumizya bana Babuloni kubazunda akubagusya mubusena mobakali kukkala.

¹³ Tulakonzya katujisi twaambo tunji itutukkomanisya kujatikizya paradaiso yesu yakumuuya. Cilakondelezya kukkala antoomwe, cikkazyika moyo. Tulijisi luumuno a Banakristo ibabeleka canguzu kusamununa bube bwabunyama. Balasolekesya kuba basiluse alimwi ibagwasya. Pele kuli zintu zinji ziyandika kutegwa tuzumanane kuba muparadaiso yesu yakumuuya kunze lyakuba acilongwe cibotu abantu aaba. Tweelede kuba acilongwe cibotu a Jehova alimwi akucita kuyanda kwakwe. (Mika 6:8) Twakaboola muparadaiso yakumuuya eeyi cakulisungula tobeni, pele bucebuce tulakonzya kuloba antela kutandwa buya ikuti katutabeleki canguzu kubambilila cilongwe cesu a Leza.

14. Ncinzi ciyootugwasya kuti tuzumanane kuba muparadaiso yakumuuya?

¹⁴ Icintu ciyandika kapati iciyootugwasya nkuzumanana kuyumizyigwa a Jwi lya Leza. Amubone mwaambo wacikozyanyo uubelesyedwe ku Intembauzyo 1:1-3: “Ngusicoolwe uuteendi mululayo lwababi . . . Pele ulakondelelwa Mulao wa-Jehova, amulao wakwe ulauyeeya lyoonse masiku asikati. Uyooba mbubonya mbuli musamu uuzikidwe kumbali atulonga twamaanzi, uuzyala micelo yawo kuciindi ceelede, uujisi matu aatayumi; zyoonse nzyacita ziyooba acoolwe.” Kuyungizya waawo, mabbuku aabandika zyamu Bbaibbele aapegwa aciinga camuzike musyomesi alimwi uucenjede alapa cakulya cakumuuya muparadaiso yakumuuya.—Matayo 24:45-47.

Ikuyumya Mbomwiibona Paradaiso

15. Ino nkaambo nzi Musa ncaatakakonzya kusololela bana Israyeli mu Nyika Yakasyomezyegwa, pele ino ncinzi ncaakabona?

¹⁵ Alimwi amulange-lange abumbi mbwiiyooba Paradaiso. Bana Israyeli nobakaingaila munkanda kwamyaka iili 40, Musa wakabasololela ku Cibanda naa Magezi aa Moabu kujwe kwa Mulonga wa Jordano. Akaambo kakulezya nkwaakatondezya Musa musyule, Jehova wakaamba kuti tanaakali kuyoosololela bana Israyeli mutala lya Jordano. (Myeelwe 20:7-12; 27:12, 13) Musa wakakombelezya Leza ulaamba: “Sa inga ndazubuka kuyoobona nyika imbotu iili mutala lya-Jordano?” Nokuba kuti tanaakali kuyooyinjila, naakatanta Cilundu ca Pisiga akubona zibeela zinji zyanyika eeyo, Musa weelede kuti wakabona kuti yakali “nyika imbotu.” Ino muyeeya kuti nyika eeyo yakali buti?—Deuteronomo 3:25-27.

16, 17. (a) Mbuti Nyika Yakasyomezyegwa muciindi cansiku mboyiindene anyika yamazubaano? (b) Ino nkaambo nzi ncotukonzya kusyoma kuti Nyika Yakasyomezyegwa cimwi ciindi yakali mbuli paradaiso?

¹⁶ Ikuti kamuyeeya mbocilibonya cooko eeco  mazubaano, mulakonzya kuyeeya kuti cakali cimpayuma camusenga, imampangala alimwi ibusena bupya nduli. Pele kuli kaambo kabotu ncotweelede kuyeeya kuti icooko eeco coonse cakaliindene kapati ambociboneka sunu ciindi Ibbaibbele nolyakali kulembwa. Mumagazini iitegwa Scientific American, haazibwene mulwiiyo lwabulimi abusani bwabulongo Dr. Walter C. Lowdermilk wakapandulula kuti inyika kubusena oobo “yakasampuka akaambo kakutabelesyegwa kabotu kwamyaka iili cuulu.” Ooyu haazibwene wakalemba kuti: “‘Icimpayuma’ cakabweza busena bwakali bubotu wakali mulimo wabantunsi ikutali wacilengwaleza pe.” Mubwini, mukuvwuntauzya kwakwe wakajana kuti “nyika eeyi cimwi ciindi yakali paradaiso yamacelelo mabotu.” Aboobo cilasalala kuti ikwiibelesya bubi kwabantunsi nkukwakanyonyoona ceeco cakali kutegwa “paradaiso yamacelelo mabotu.” *

¹⁷ Ikuti mwazinzibala kuyeeya azintu nzyomwakabala mu Bbaibbele, mulakonzya kubona ncaali aamasimpe makani aaya. Amuyeeye ncaakabasyomezya bantu Jehova kwiinda muli Musa naakati: “Nyika yamutala njimuyoovuba ninyika yazilundu amakuti, iiwidwa imvula yakujulu, nyika Jehova Leza wanu njabamba kabotu.”—Deuteronomo 11:8-12.

18. Mbuti izyaambwa kuli Isaya 35:2 mbozyakali kunga zyayeezya bana Israyeli bakali mubuzike mboyakabede Nyika Yakasyomezyegwa?

¹⁸ Nyika Yakasyomezyegwa yakali mbotu kapati alimwi iizyala micelo cakuti ikubanda buyo mazina aamasena amwi kwakali kuyeezya bukkale bwamu paradaiso. Eeco cilisalede kubusinsimi buli kuli Isaya caandaano 35, ibwakasaanguna kuzuzikizyigwa bana Israyeli nobakapiluka kuzwa ku Babuloni. Isaya wakasinsima kuti: “Kusyuuka liyoosyuuka loko, akusekelela liyoosekelela akwiimba. Liyoopegwa bulemu bwa-Lebano abweebesi bwa-Karimeli abwa-Saroni. Bayoobona bulemu bwa-Jehova, bweebesi bwa-Leza wesu.” (Isaya 35:2) Ikwaamba Lebano, Karimeli alimwi a Saroni kweelede kuti kwakayeezya bana Israyeli masena aakkazyika moyo alimwi azintu zikondelezya.

19, 20. (a) Amupandulule mbobwakabede busena bwakaindi bwa Saroni. (b) Ino ninzila nzi yomwe mbotunga twayumya bulangizi bwesu bwa Paradaiso?

¹⁹ Amulange-lange busena bwa Saroni, ibwakali mumbali-mbali alwizi alimwi akati kamalundu aa Samariya a Lwizi Lupati naa Mediterranean. (Amubone cifwoto apeeji 10.) Bwakali ampuwo kapati akaambo kambobwakali bubotu alimwi ibwakali kutebulwa zisyango zinji. Mbwaanga bwakalijisi maanzi manji, bwakali bubotu kucezyezya, pele bwakalijisi zisaka zyamasamu aasiya kuzyooko zyakali kunyika. (1 Makani 27:29; Lwiimbo lwa-Solomoni 2:1; Isaya 65:10) Aboobo Isaya 35:2 yakali kwaamba kupilusyigwa alimwi akusyuuka kwanyika kuba mbuli paradaiso. Alimwi businsimi oobo  bwakali kwaamba paradaiso yakumuuya iikondelezya, kweendelana ancaakabona kumbele mwaapostolo Paulo mucilengaano. Camamanino, ibusinsimi oobu alimwi abumbi buyumya bulangizi bwesu bwaparadaiso anyika kubantu.

²⁰ Mbotuzumanana kukkala muparadaiso yakumuuya, tulakonzya kuzumanana kulumba nkaambo kanjiyo alimwi akuyumya bulangizi bwesu bwa Paradaiso anyika. Munzila nzi? Nkwiinda mukuyungizya kuteelela kwesu kwazintu nzyotubala mu Bbaibbele. Ibupanduluzi bwa Bbaibbele alimwi abusinsimi kanji-kanji bulaamba masena aagaminide. Sena inga mwayanda kuzyiba kabotu nkwaakabede alimwi ambwaaswaangene amasena aambi? Mucibalo citobela, tulalanga-langa mbomunga mwacita oobo akugwasyigwa.

Bupanduluzi buyungizidwe

Sena Muciyeeyede?

• Ino “[ni]paradaiso” nzi njaakabona mwaapostolo Paulo mucilengaano?

• Kujatikizya Isaya caandaano 35, ino yakazuzikizyigwa buti kwaciindi cakusaanguna, alimwi mbuti mboiswaangene ancaakabona Paulo mucilengaano?

• Mbuti mbotunga twalumba akuyungizya kuteelela kwesu kwaparadaiso yesu yakumuuya alimwi akuyumya bulangizi bwesu bwaparadaiso anyika?

[Mibuzyo yaciiyo]

[Cifwanikiso icili apeeji 10]

Cibanda ca Saroni, ibusena bwakali kutebulwa zisyango zinji mu Nyika Yakasyomezyegwa

[Kulumba]

Pictorial Archive (Near Eastern History) Est.

[Cifwanikiso icili apeeji 12]

Musa wakabona kuti yakali “nyika imbotu”