Kusyomeka Kwanu Kulamukkomanisya Yehova
Kusyomeka Kwanu Kulamukkomanisya Yehova
“Songwaala, mwanaangu, ukondezye moyo wangu, kuti mbe aluvwiilo kuliyooyo uundisampaula.”—TUS. 27:11.
1, 2. (a) Ino nkukazya kuli buti nkwaakacita Saatani nkolyaamba bbuku lya Jobu? (b) Ino ncinzi citondezya kuti Saatani ucizumanana kusampaula Jehova kuzwa kuciindi ncaakali kupona Jobu?
JEHOVA wakazumizya Saatani kuti asunke lusyomo ndwaakajisi Jobu imubelesi wa Leza uusyomeka. Akaambo kaceeci, Jobu wakasweekelwa banyama bakwe mbaakavwubide, bana bakwe alimwi abuzumi bwakwe. Pele Saatani naakadooneka lusyomo ndwaakajisi Jobu, tanaakajisi buyo muntu omwe mumizeezo. Saatani wakaamba kuti: “Wakalivuna lukanda lwakwe mwini! Muntu uyakupa zyoonse kuti akabe abuumi bwakwe mwini.” Kutamikizya ooku kwakatalisya kaambo kalo kakabikkilizya abantu bambi kunze buyo lya Jobu alimwi kazumanana kwaciindi cilamfwu kuzwa naakafwa.—Job. 2:4.
2 Nokwakainda myaka iitandila ku 600 kuzwa ciindi Jobu naakasukusigwa, Solomoni wakasololelwa amuuya kuti alembe kuti: “Songwaala, mwanaangu, ukondezye moyo wangu, kuti mbe aluvwiilo kuliyooyo uundisampaula.” (Tus. 27:11) Aaka kaambo katondezya kuti aaciindi eeci, Saatani wakacili kukazya Jehova. Kunze lyaboobo, mwaapostolo Johane wakabona Saatani mucilengaano kabejelezya babelesi ba Leza ciindi naakatandwa kujulu kakwiindide buyo ciindi cisyoonto kuzwa Bwami bwa Leza nobwakatalisyigwa mu 1914. Masimpe, naaba mazuba aano, mazuba eeni aakumamanino aabweende bubyaabi oobu, Saatani ucidooneka kusyomeka kwababelesi ba Leza.—Ciy. 12:10.
3. Ino nziiyo nzi zibotu nzyotukonzya kwiiya kuzwa mubbuku lya Jobu?
3 Lino amulange-lange ziiyo zyotatwe ziyandika kapati nzyotwiiya mubbuku lya Jobu. Cakusaanguna, masukusyo ngaakacitikilwa Jobu atugwasya kuti tumuzyibe sinkondoma mwini-mwini alimwi akuzyiba kwini nkwaazwa mapenzi aacitikila bantu ba Leza. Sinkondoma ooyu, ngu Saatani Diabolosi. Cabili, kunyina makani amasukusyo aakonzya kutusikila, ikuba acilongwe ciyumu a Leza kuyootugwasya kuzumanana kusyomeka. Catatu, ciindi nokuli masukusyo alimwi ikuti twasunkwa munzila iili yoonse, Leza ulatugwasya kuliyumya mbubwenya mbwaakacita kuli Jobu. Mazuba aano, Jehova ulacita oobu kwiinda mu Jwi lyakwe, mbunga yakwe alimwi amuuya wakwe uusalala.
Kamumuyeeya Sinkondoma Mwini-mwini Lyoonse
4. Ino nguni uujisi mulandu akaambo kabukkale bwamunyika buliko mazuba aano?
4 Bantu banji tabasyomi kuti Saatani nkwali. Aboobo, nokuba kuti balakonzya kukatazyigwa abukkale bwamunyika, tabazyi kuti muntu mwini-mwini uupa kuti kube bukkale buli boobu ngu Saatani Diabolosi. Nokuba boobo, mapenzi manji aacitikila bantu alacitika akaambo kazyintu nzyobacita beni. Bazyali besu bakusaanguna, ba Adamu a Eva, bakasala kulyeendelezya kakunyina kusololelwa a Mulengi wabo. Mpoonya kuzwa ciindi eeco, bantu banji bacita zyintu cabufwubafwuba. Saatani ngonguwe wakeena Eva kuti azangile Leza. Ngonguwe wakatalisya bweende bwanyika eeyi iijisi bantu batalondokede alimwi ibafwa. Akaambo kakuti Saatani “[ngoleza] waansi ano,” bantu batondezya bube mbubwenya buyo mbuli mbwajisi—kulisumpula, kukazyanya, ibbivwe, bulyatu, lweeno abuzangi. (2 Kor. 4:4; 1 Tim. 2:14; 3:6; amubale Jakobo 3:14, 15.) Bube oobu bwapa kuti kube mazwanga, lusulo, kutasyomeka alimwi alupyopyongano mutwaambo twacisi amuzikombelo, calo icaletela bantu mapenzi manji.
5. Ino mbuti mbotuyoolubelesya luzyibo ndotujisi?
5 Elo kaka swebo tobabelesi ba Jehova tulijisi luzyibo luyandika kapati! Inzya, tulimuzyi uupa kuti bukkale bwamunyika bubije kapati. Aboobo, eeci ceelede kutupa kutola lubazu mumulimo wamumuunda kutegwa tubazyibye bantu kujatikizya sinkondoma mwini-mwini. Sena taceelede kutukkomanisya ikuba kulubazu lwa Leza wakasimpe, Jehova, alimwi akupandulwida bantu mbwaayoomugwisya Saatani amapenzi aacitikila bantu?
6, 7. (a) Ino nguni uupa kuti bakombi bakasimpe kabapenzyegwa? (b) Ino mbuti mbotukonzya kwiiya cikozyanyo ca Elihu?
6 Saatani taleti buyo mapenzi munyika, pele alimwi nguupa kuti bantu ba Leza kabakazyigwa. Ulikanzide kutusunka. Jesu Kristo wakaambila mwaapostolo Petro kuti: “Simoni, Simoni, langa, Saatani wazumizigwa kuti akuyunge [naa kukupupulula] mbuli maila.” (Lk. 22:31) Mbubwenya buyo andiswe aumwi kumugama uutobela mukondo wa Jesu uyoosukusigwa munzila imwi. Petro wakakozyanyisya Diabolosi kuli “syuumbwa wabutambo [u]uya buyandaula ngwati lume.” Awalo Paulo wakati: “Boonse abo bayanda kupona cakululama muli-Kristo Jesu mbobayoopenzegwa.”—1 Pet. 5:8; 2 Tim. 3:12.
7 Ciindi mukombima nacitikilwa ntenda, tatweelede kuyeeya kuti Jehova nguwapa kuti ntenda eeyi icitike. Mbuli mbotwaiya kale, Saatani ngosinkondoma mwini-mwini. Aboobo, muciindi cakumutantamuka mukwesu uuli muntenda mbuli mbobakacita basikuumbulizya Jobu bakubeja, tweelede kucita mbuli Elihu, iwakabandika a Jobu kali mweenzinyina mwini-mwini. Atumugwasye mukwesu ikulwana sinkondoma, Saatani. (Tus. 3:27; 1 Tes. 5:25) Makanze eesu ngakucita kufwumbwa ncotukonzya kucita kutegwa tugwasye mubelesima kuzumanana kusyomeka, eelyo, tulamukkomanisya Jehova.
8. Ino nkaambo nzi Saatani ncaatakazwidilila mukukasya Jobu kulemeka Jehova?
8 Zyintu nzyaakajisi Jobu nzyaakasaanguna kunyonyoona Saatani, mbanyama mbaakavwubide. Banyama aaba bakali kuyandika kapati mbokunga kulangilwa kuti ndolubono lwalikke ndwaakajisi. Pele alimwi Jobu wakali kubabelesya mubukombi. Amana kusalazya bana bakwe, Jobu “[wakali ku]fuma, kabacitila umwi aumwi cipaizyo cuumpe; nkaambo Jobu wakati, Atene bana bangu balibijide akusowelezya Leza mumyoyo yabo. Lyoonse Jobu wakali kucita boobo.” (Job. 1:4, 5) Aboobo, Jobu wakali kutuula banyama kuli Jehova lyoonse. Masukusyo naakatalika buyo, eeco tiicakali kukonzyeka kucitika. Jobu wakanyina “mbono” zyakubelesya mukulemeka Jehova. (Tus. 3:9) Pele wakali kukonzya—alimwi wakacita oobo—kulemeka Jehova amulomo wakwe.
Amube Acilongwe Ciyumu a Jehova
9. Ino ncintu nzi ciyandika kapati mubuumi bwesu?
9 Kufumbwa naa tulivwubide naa tuli bacete, bakubusi naa bapati, tujisi buumi bubotu naa pe, tulakonzya kuba acilongwe ciyumu a Jehova. Kufwumbwa naa mmasukusyo aali buti ngotujana, kuba acilongwe cibotu a Leza kuyootugwasya kuzumanana kusyomeka alimwi akukkomanisya Jehova. Nobaba bantu ibakajisi luzyibo lusyoonto lwakasimpe bakaliyumya akuzumanana kusyomeka.
10, 11. (a) Ino mbuti mucizyi wesu umwi mbwaakacita ciindi lusyomo lwakwe nolwakasunkwa? (b) Ino mbwiinguzi nzi bubotu mucizyi ooyu mbwaakapa Saatani?
10 Amulange cikonzyanyo camucizyi uujisi zyina lyakuti Valentina Garnovskaya, balo ibali akati ka Bakamboni banji bakucisi ca Russia ibakazumanana kusyomeka mumasukusyo mapati mbubwenya mbwaakacita Jobu. Mumwaka wa 1945, kabajisi myaka yakuzyalwa iisika ku 20, mukwesu wakabakambaukila. Wakapiluka nyendo zyobile kutegwa babandike makani aajatikizya Bbaibbele, pele kuzwa waawo kunyina nobakabonana alimwi. Nokuba boobo, ba Valentina bakatalika kukambaukila basimukobonyina. Akaambo kaceeci, bakaangwa kwamyaka iili lusele. Mumwaka wa 1953, bakaangununwa, mpoonya bakazumanana alimwi amulimo wakukambauka. Kumane, bakaangwa alimwi—lino kwamyaka iili kkumi. Nobakakkala kwamyaka iili mbwiibede muntolongo yomwe, bakalonzyegwa akutolwa kuntolongo iimbi. Muntolongo oomu, mwakali bacizyi bambi ibakajisi Bbaibbele. Bumwi buzuba mucizyi umwi wakabatondezya Bbaibbele ba Valentina. Elo kaka eeci cakali ciindi cikkomanisya kapati! Amuciyeeyele buyo, Ibbaibbele lyomwe buyo ndyobakabona mubuumi bwabo kunze kwaleeli, ndeelyo ndyaakajisi mukwesu iwakabakambaukila mumwaka wa 1945!
11 Mumwaka wa 1967, ba Valentina bakaangununwa, mpoonya bakatondezya kulyaaba kwabo kuli Jehova kwiinda mukubbapatizyigwa. Bakabelesya lwaanguluko oolu kutola lubazu mumulimo wakukambauka kusikila mumwaka wa 1969. Pele mumwaka ooyu, bakaangwa alimwi, ciindi eeci kwamyaka yotatwe. Nokuba boobo, ba Valentina bakazumanana kukambauka. Kuzoosika mumwaka wa 2001, imwaka nobakafwa, bakagwasya bantu bali 44 kwiiya kasimpe. Myaka yoonse aantoomwe njobakakkala muntolongo yakali 21. Bakalilisungwide kusweekelwa zyintu nzyobakajisi, kubikkilizya alwaanguluko lwabo, kutegwa bazumanane kusyomeka. Kumamanino aabuumi bwabo, ba Valentina bakaamba kuti: “Kunyina nondakajisi busena bwakukkala. Zyintu zyangu zyoonse zyakali mucibbekke comwe buyo, pele ndakalikkomene akukkutila mukubelekela Jehova.” Elo kaka oobu bwakali bwiinguzi bubotu ba Valentina mbobakapa kuli Saatani, walo iwakatamikizya bantu boonse kuti tabakonzyi kuzumanana kusyomeka ciindi nobasukusigwa! (Job. 1:9-11) Tulakonzya kuba masimpe kuti bakamukkomanisya Jehova alimwi akuti awalo ulalangila caluyandisisyo kuyoobabusya ba Valentina alimwi abantu bambi ibakafwa kabasyomeka.—Job. 14:15.
12. Ino luyando lutugwasya buti kuba acilongwe a Jehova?
12 Cilongwe cesu a Jehova ciyeeme aluyando ndotujisi kulinguwe. Tulabulombozya bube mbwajisi Leza eelyo tulacita kufumbwa nzyotukonzya kutegwa katupona kweelana amakanze aakwe. Kwiimpana ambwaamba Diabolosi, tulamuyanda Jehova akaambo kakulisungula alimwi camoyo woonse. Luyando oolu ilucitwa camoyo woonse lulatuyumya kuti tuzumanane kusyomeka mumasunko. Jehova ilwakwe, “ulabamba myuuya yabasalali bakwe.”—Tus. 2:8; Int. 97:10.
13. Ino mbuti Jehova mbwazibona zyintu nzyotumucitila?
13 Luyando lutukulwaizya kulemeka zyina lya Jehova, nokuba kuti zimwi ziindi inga twalimvwa kuti tatukonzyi. Ulabona makanze eesu mabotu alimwi tatubeteki ikuti naa twakakilwa kucita zyintu zyoonse nzyotuyanda. Walo tabikkili buyo maanu kuzyintu nzyotucita, pele ulabona akaambo ncotuzicitila. Nokuba kuti Jobu wakali mubuumba alimwi wakaliyumya kapati, wakaambila basikumukazya kujatikizya mbwaakali kuuyandisya mulawo wa Jehova. (Amubale Jobu 10:12; 28:28.) Mucaandano camamanino cabbuku lya Jobu, Leza wakaamba kuti wakabanyemena ba Elifazi, Bilidadi alimwi Zofari akaambo kakuti tiibakaamba bwini. Pele, Jehova wakatondezya kuti ulamukkomanina Jobu kwiinda mukumwiita kuti “mulanda wangu” alimwi akumulailila kuti abakombele basikuumbulizya babeji aaba. (Job. 42:7-9) Andiswe atucite zyintu munzila iikonzya kupa kuti Jehova atukkomanine.
Jehova Ulabagwasya Babelesi Bakwe Basyomeka
14. Ino mbuti Jehova mbwaakagwasya Jobu kuti acince mbwaakali kuyeeya?
14 Jobu wakazumanana kusyomeka nokuba kuti tanaakalondokede. Zimwi ziindi, akaambo kakukatazyigwa kapati, zyintu tanaakazibona bweelede. Mucikozyanyo, wakaambila Jehova kuti: “Tokoondivwiila kuti ndalila kulinduwe . . . Anguzu zyajanza lyako ulandikwapaula.” Kunze lyaboobo, Jobu wakabikkila maanu kapati kulikwabilila naakaamba kuti: “Nsijisi mulandu,” alimwi akuti “nsinabijide amaanza, amajwi aangu alisalalide.” (Job. 10:7; 16:17; 30:20, 21) Nokuba boobo, Jehova wakamugwasya Jobu calubomba kwiinda mukumubuzya mibuzyo iili mbwiibede yalo yakapa kuti Jobu aleke kulibikkila maanu kapati. Alimwi yakamugwasya kubona kabotu kuti Leza ulisumpukide kapati cakuti muntu takonzyi kweelanyizyigwa anguwe. Jobu wakabuzumina busolozi oobu akucinca mbwaakali kuyeeya.—Amubale Jobu 40:8; 42:2, 6.
15, 16. Ino mbuti Jehova mbwagwasya babelesi bakwe mazuba aano?
15 Jehova alimwi ulapa busolozi bubotu alimwi alulayo kubabelesi bakwe mazuba aano. Kunze lyaboobo, tulagwasyigwa munzila zinji. Mucikozyanyo, Jesu Kristo wakapa cituuzyo cacinunuzyo calo icakapa kuti kube bubambe bwakulekelelwa zibi. Kwiinda mucipaizyo eeci, tulakonzya kuba acilongwe ciyumu a Leza nokuba kuti tatulondokede. (Jak. 4:8; 1 Joh. 2:1) Alimwi ciindi notusukusigwa, tulapaila kuti muuya uusalala wa Leza utugwasye akutuyumya. Kuyungizya waawo, tujisi Bbaibbele, aboobo ikuti katulibala akuzinzibala kuyeeya zyintu nzyotubala, tulibambila kuliyumya mumasunko. Ciiyo cesu tobeni cilatugwasya kumvwisya kaambo kapati kajatikizya bweende lezi bwakoonse-koonse alimwi akusyomeka kwesu.
16 Kunze lyaboobo, tulagwasyigwa akaambo kakuba cibeela cabunyina bwanyika yoonse Jehova mbapa cakulya cakumuuya kwiinda “[mu]muzike musyomesi uucenjede.” (Mt. 24:45-47) Mumbungano aimwi akati kambungano zisika ku 100,000 zya Bakamboni ba Jehova, miswaangano ilacitwa yalo iitupa malailile alimwi akutuyumya kujatikizya masunko aakonzya kutucitikila. Kaambo aaka kalalibonya kuli cakacitikila Sheila, imucizyi mukubusi uukkala kucisi ca Germany.
17. Ino mbuti cakuluula camusimbi umwi mbocitondezya mbocili cabusongo kujanika lyoonse kumiswaangano ya Bunakristo?
17 Bumwi buzuba, mucikolo mwaakali kwiiya Sheila mwakanyina uubalanganya kwakaindi kasyoonto. Basicikolonyina bakatalika kusobanya cintu ncobabelesya mukusonda ncobaita kuti Ouija board. Mpoonya Sheila wakafwambaana kuzwa mucikolo, eelyo cintu ncaakazoomvwa cakamukkomanisya kuti wakabweza ntaamu eeyi cakufwambaana. Ciindi nobakali kusobanya Ouija board eeyi, basicikolonyina bamwi bakalimvwa kuti basikilwa madaimona mpoonya bakatalika kuccija. Aboobo ino ncinzi cakamugwasya Sheila kufwambaana kuzwa mucikolo? Sheila upandulula kuti: “Mazuba masyoonto musyule, twakalibandikide kumuswaangano ku Ŋanda ya Bwami kujatikizya ntenda zijatikizya ma Ouija board. Aboobo ndakalicizyi cakucita. Ndakali kuyanda kukkomanisya Jehova, kweelana ancolyaamba Bbaibbele kulugwalo lwa Tusimpi 27:11.” Elo kaka cakabota kuti Sheila wakaliko kumuswaangano akuswiilila kapati kumapulogilamu!
18. Ino ncinzi ncomukanzide kucita nywebo kumugama?
18 Toonse aumwi kumugama atukanze kutobela malailile ngotupegwa mumbunga ya Leza. Kwiinda mukujanika kumiswaangano lyoonse, kubala Bbaibbele, kwiiya mabbuku aamba zyamu Bbaibbele, kupaila alimwi akuyanzana a Banakristo basimide, tulajana busolozi alugwasyo ndotuyandika. Jehova uyanda kuti tuzumanane kusyomeka alimwi ulatusyoma kuti tuyoocita oobo. Elo kaka ncoolwe cipati kutembaula zyina lya Jehova, kuzumanana kusyomeka alimwi akukkomanisya Jehova!
Sena Muciyeeyede?
• Ino mbukkale alimwi amasukusyo aali buti Saatani ngaletela bantu?
• Ino ncintu nzi ciyandika kapati ncotujisi?
• Ino mpaanzi mpociyeeme cilongwe cesu a Jehova?
• Ino mmuunzila nzi Jehova mbwatugwasya mazuba aano?
[Mibuzyo yaciiyo]
[Cifwanikiso icili apeeji 8]
Sena mulakulwaizyigwa kwaambila bambi kujatikizya luzyibo ndomujisi?
[Cifwanikiso icili apeeji 9]
Tulakonzya kubagwasya bakombima kuti bazumanane kusyomeka
[Cifwanikiso icili apeeji 10]
Ba Valentina bakalilisungwide kusweekelwa zyintu zyoonse kutegwa bazumanane kusyomeka