Mibuzyo Yabasikubala

Ikuti mwana wafwa kacili mwida, sena ujisi bulangizi bwabubuke?

Kubantu aabo batanakufwidwa mwana munzila eeyi, inga cabakatazya kuyeeya mbobalimvwa aabo ibakafwidwa. Bazyali bamwi balalila cakulijaya buya akaambo kakufwidwa ooku. Mutumbu umwi wakali kutulubanya kusikila kubana bosanwe. Mukuya kwaciindi, wakaba acoolwe cakutumbuka akukomezya bana basankwa bobile. Nokuba boobo, ucikuyeeya kufwidwa bana nkwaakacitikilwa. Mubuumi bwakwe boonse, wakalizyi myaka njobakali kunoojisi bana bakaindilila ambaakatulubanya ikuti nobatakafwa. Sena Banakristo aaba bajisi bulangizi bwakuti bana mbobakafwidwa bayoobusyigwa?

Bwiinguzi buuba-uba kumubuzyo ooyu mbwakuti kunyina ncotuzyi pe. Bbaibbele kunyina nolyaamba cacigaminina kujatikizya makani aakubusyigwa kwabana ibakaindilila naa bakafwa akaambo kakutulubanya. Nokuba boobo, Ijwi lya Leza lijisi njiisyo ziyandika kapati kubwiinguzi oobu alimwi izikonzya kutugwasya.

Atulange-lange mibuzyo yobile iijatikizya kaambo aaka. Cakusaanguna, kweelana ambwazibona zyintu Jehova, ino ndilili muntu natalika kupona akwaambwa kuti mmuumi—ciindi cakumitwa naa cakutumbukwa? Cabili, ino Jehova ubabona buti bana bacili mwida—kuti mbantu naa tubeela-beela buyo twamubili ituli mwida lyamukaintu? Njiisyo zyamu Bbaibbele zilayiingula cakusalazya mibuzyo yobile eeyi.

Mulawo wa Musa cakusalazya wakayubununa kuti buumi tabutaliki ciindi cakutumbukwa, pele ciindi muntu kacili mwida. Ino muunzila nzi moutondezya boobo? Wakaamba kuti muntu wakali kukonzya kujaigwa akaambo kakujaya mwana uuli mwida. Amulange ncowaamba mulawo ooyu wakuti: “Kulaliigwa buumi kubuumi.” * (Kul. 21:22, 23) Aboobo, mwana uuli mwida mmuntu uupona alimwi mmuumi. Kuzyiba kaambo kamasimpe aaka kakuti mwana uuli mwida muntu uupona kwagwasya tuulunzuma twa Banakristo kutajatikizyigwa mucilengwa cakugwisya da, kucibona kuti ncibi cipati kuli Leza.

Masimpe, mwana uuli mwida mmuumi, pele ino buumi oobu Jehova ububona kuti buyandika kapati buti? Mulawo ooyu waambwa kale wakali kwaamba kuti muntu mupati wakali kweelede kujaigwa akaambo kakupa kuti mwana uuli mwida afwe. Aboobo, buumi bwamwana uuli mwida bulayandika kapati kuli Leza. Kuyungizya waawo, Magwalo manji amwi ayubununa kuti bana bali mwida Jehova ubabona kuti mbantu beni-beni. Mucikozyanyo, Mwami Davida wakasololelwa amuuya kwaamba boobu kujatikizya Jehova: “Nduwe wakandinunganya mwida lyabama. . . . Meso aako akandibona nkencili insalalila; mubbuku lyako zizo zyangu zyoonse kazilembedwe, izyakali kucitwa buzuba bumwi abumwi.”—Int. 139:13-16; Job. 31:14, 15.

Alimwi Jehova ulabona kuti bana bacili mwida bajisi bube alimwi inga balakonzya kubelesyegwa kapati kumbele. Ciindi Rabeka mukaintu wa Izaka naakaminsi bana bamaanga, Jehova wakaamba businsimi bujatikizya balombe bobile aaba kuti bakali kuzundana mwida lyakwe, kutondezya kuti wakalibwene kale bube mbobakajisi bwalo ibwakali kuyoogwasya bantu banji kumbele.—Matl. 25:22, 23; Rom. 9:10-13.

Aalo makani aajatikizya Johane Mubbapatizi alagwasya kapati. Cibalo ca Makani Mabotu caamba kuti: “Mpoonya awo Elizabeta amvwe buyo kwaanzya kwa-Mariya, mwana wasamba mwida lyakwe, alimwi Elizabeta wakazula Muuya Uusalala.” (Lk. 1:41) Mukupandulula cintu eeci cakacitika, musilisi Luka wakabelesya bbala lya Chigiliki ilyakali kukonzya kwaamba mwana uuli mwida naa mwana watumbukwa. Wakabelesya bbala ndilyonya eeli mukwaamba mwana mumvwanda Jesu kuti ulilede mucilido caŋombe.—Lk. 2:12, 16; 18:15.

Kwiinda mukulanga-langa twaambo ootu alimwi a Magwalo, sena Bbaibbele lyaamba kuti kuli  kwiindana kuliko akati kamwana uuli mwida alimwi ayooyo watumbukwa kale? Peepe. Alimwi eeci cileendelana anzyobajana basyaabusongo bamazuba aano mumakani aasayaansi. Mucikozyanyo, basikuvwuntauzya bajana kuti mwana uuli mwida ulakonzya kuzyiba zicitika anze. Aboobo, tacigambyi kuti mukaintu uuli afwaafwi akutumbuka ulaba acilongwe ciyumu amwana uuli mwida lyakwe.

Ciindi ncobatola bana kabali mwida kusikila ciindi ncobatumbukwa cilaindana-indana. Amulange-lange cikozyanyo eeci: Mukaintu umwi watumbuka mwana muumi uutanasisya myezi yakuti atumbukwe, mpoonya wafwa nokwainda mazuba masyoonto buyo. Aumbi mukaintu ujisi da kusikila ciindi nayelede kutumbuka, pele mwana wafwa kakuceede mazuba masyoonto kuti atumbukwe. Sena mukaintu wakusaanguna ujisi bulangizi bwakuti mwana wakwe uyoobusyigwa akaambo buyo kakuti mwana wakatumbukwa katanasisya myezi yakuti atumbukwe, kakuli mukaintu wabili tajisi bulangizi bwakuti mwana wakwe uyoobusyigwa?

Aboobo, mubufwaafwi Bbaibbele cakusalazya liyiisya kuti buumi butalika ciindi cakumitwa alimwi mwana uuli mwida Jehova umubona kuti mmuntu. Akaambo katwaambo ootu tuzwa mu Bbaibbele, bamwi inga bayeeya kuti nkukazya twaambo ootu kwaamba kuti bana bafwa kabacili mwida tabakabusyigwi. Masimpe, inga bayeeya kuti kaambo aaka kalakonzya kupa kuzumbauzya makani ngotusyoma aamu Magwalo kujatikizya kugwisya da, alo aayeeme atwaambo ntomunya ootu.

Myaka yamusyule oomu, magazini iino yakajisi mibuzyo kujatikizya mbobayoobusyigwa bana bakafwa kabatana kutumbukwa, alimwi mibuzyo eeyi yakali kulibonya kutondezya kuti bana aaba tabakabusyigwi. Mucikozyanyo, sena Leza uyoobikka nsalalila mwida lyamukaintu mu Paradaiso? Nokuba boobo, kubala, kuzinzibala kuyeeya alimwi amupailo zyapa ibali mu Kabunga Keendelezya kukosola makani kuti kuzilanga boobu zyintu takugwasyi kujatikizya bulangizi bwabubuke. Jesu wakaamba kuti: “Zintu zyoonse zilakonzeka kwa-Leza.” (Mk. 10:27) Eeco cakacitikila Jesu cilatondezya mbokali kamasimpe kaambo aaka; buumi bwakwe bwakalonzyegwa kuzwa kujulu kutolwa mwida lyanakalindu—masimpe, ncintu ncatakonzyi kuyeeyela muntu.

Aboobo, sena zyoonse eezyi zipandulula kuti Bbaibbele liyiisya kuti bana bakafwa kacitanasika ciindi cakutumbukwa bayoobusyigwa? Tweelede kukankaizya kuti Bbaibbele talipi bwiinguzi bwacigaminina kumubuzyo ooyu, aboobo taakwe twaambo tweelede kupa bantu kuzumanana kwaamba kuti bayoobusyigwa. Kaambo aaka inga kapa kuti kube mibuzyo yiindene-indene iminji kapati. Aboobo, cilagwasya kutayeeyala twaambo. Ncotuzyi ncakuti: Kaambo aaka kali mumaanza aa Jehova Leza, uuzwide luzyalo alimwi abuuya. (Int. 86:15) Kakunyina akuzumbauzya, ujisi makanze aakulumana lufwu kwiinda mukubusya bantu bafwide. (Job. 14:14, 15) Tulakonzya kusinizya kuti lyoonse ucita zyintu ziluleme. Uyootuumbulizya kumapenzi manji aatucitikila mubuumi obuno bwamubweende bwazyintu bubyaabi oobu nalailila Mwanaakwe “kuti ajaye milimo ya-Saatani.”—1 Joh. 3:8.

Bupanduluzi buyungizidwe

[Cifwanikiso icili apeeji 13]

Jehova uyootuumbulizya kumapenzi oonse aatucitikila