Ikupa Calumwemwe Kuzwa Kunsi Amoyo

NAAKALI Kwaamba kupa, mwaapostolo Paulo wakalemba kuti: “Umwi aumwi uleelede kupa mbuli mbwayanda mumoyo wakwe,” mpoonya wakayungizya kuti: “Kutabi cakunyonosya moyo nanka cakusinikizigwa, nkaambo oyu uupa calumwemwe nguuyandwa kwa-Leza.” (2 Kor. 9:7) Jehova tasinikizyi muntu uuli woonse kuti agwasilizye mubukombi bwakasimpe pe. Uyanda kuti babelesi bakwe batondezye kuti balilyaabide kwiinda mukusanga cakuliyandila alimwi cakukondwa. Kuzwa kaindi, bantu bakwe balalisungula kucita oobo. Atubone zikozyanyo zyotatwe.

Naakasololela bana Israyeli kuzwa mu Egepita, Jehova wakabaambila kuti bayake tente lyakubunganina. Kwakali kuyandika zibelesyo, aboobo bantu bakalombwa kuti basange. Mpoonya, “muntu umwi aumwi, na moyo wakwe wakamubusya” wakaleta ngolida ansiliva, ngale azyintu zimbi zyakali kukonzya kubelesyegwa. Bantu bakali lyaabide kapati kusanga cakuti kwakaba kwaambilizya kwakuti baleke kuleta zyakusanga.—Kul. 35:5, 21; 36:6, 7.

 Nocakasika ciindi cakuyaka tempele, kakwiindide myaka minji, bantu ba Leza alimwi bakaba acoolwe cakugwasyilizya bukombi wakasimpe. Mwami Davida wakasanga lubono lwakwe lunji kumulimo ooyu akutamba bantu kuti abalo basange. Bakacita oobo cakulisungula. Muulo wangolida ansiliva nzyobakasanga ulakonzya kwiinda ku $100,000,000,000, mali aaku Amelika. Bantu bakakkomana kapati akaambo kakuti bakalisungula kusanga kuli Jehova.—1 Mak. 29:3-9; 2 Mak. 5:1.

Mbubwenya buyo, abalo basikumutobela Jesu Kristo bakusaanguna bakali kukkomana kusanga. Ibuzuba bwa Pentekosite 33 C.E., bantu basika ku 3,000 bakabbapatizyigwa, ibanji akati kabo tiibakali bamu Jerusalemu. Kutegwa bagwasye bakombinyina aabo ikukkala mumunzi ooyu kutegwa baiye zyintu zinji, Banakristo bakasanga mali aakubagwasya. Ibakwesu bakasambala zyintu zyabo akupa mali kubaapostolo kutegwa bagwasyilizye baabo ibakali kuyandika kugwasyigwa. Jehova wakakkomana kapati kubona kuti Banakristo aaba bakali alusyomo alimwi bakali kuyandana.—Inc. 2:41-47.

Mazuba aano, Banakristo balazumanana kugwasyilizya bukombi bwakasimpe kwiinda mukupa ciindi cabo, nguzu alubono lwabo cakulisungula. Ikabbokesi ikali mucibalo eeci kalatondezya nzila zimwi mbomukonzya kusanga.

Kabbokesi kali apeeji 18]

NZILA BAMWI NZYOBABELESYA MUKUSANGA

KUSANGA KUMULIMO WANYIKA YOONSE

Bantu banji balabikka mali ambali kutegwa bakaabikke mutubbokesi tulembedwe kuti: “Mulimo Wanyika Yoonse.”

Amwezi mbungano zilatumina mali aaya kuofesi yamutabi ya Bakamboni ba Jehova iili mucisi eeco. Alimwi bantu balakonzya kusanga mali kwiinda mukwaatuma ku Watch Tower Bible and Tract Society of Pennsylvania, Box 33459, Lusaka 10101. (Izyakusanga zyilembedwe ansi aawa zilakonzya kutumwa kuofesi yamutabi mucisi cenu.) Macceki aatuminwa kukkeyala eeyi ayelede kulembwa kuti: “Watch Tower.” Ngale naa zyintu zimbi ziindene-indene azyalo zilakonzya kusangwa. Lugwalo lufwaafwi lusindikizya zyintu eezyi lulakonzya kulembwa kupandulula kuti eeci ncipego.

IKULIBAMBILA NZYOMUKONZYA KUSANGA

Kunze lyakusanga buyo mali, kuli nzila zimbi nzyomukonzya kubelesya ikupa zyintu mukugwasilizya mulimo wa Bwami uucitwa nyika yoonse. Nzila eezyi zibikkilizya:

Bukwabilizi (Insurance): Watch Tower Bible and Tract Society of Pennsylvania ilakonzya kulembwa kuti njiiya kubweza mali aabukwabilizi bwa buumi (Life insurance policy) naa aalya aapegwa kumuntu wasika aciimo cakuleka mulimo (retirement/pension plan).

Nkomo Yamali Aakubbanga: Nkomo yamali aakubbanga, mapepa aatondezya mali ngaakabikka, naa nkomo yamali ngapegwa muntu wasika aciimo cakuleka mulimo alakonzya kupegwa ku Watch Tower Bible and Tract Society of Pennsylvania muntu afwa, kweelana aziyandika kubbanga lyakubusena nkwakkede.

Mali Ngomujisi Mukkampani (Stocks and Bonds): Mali ngomujisi mukkampani alakonzya kusangwa ku Watch Tower Bible and Tract Society of Pennsylvania kacili cipego buyo naa Watch Tower Bible and Tract Society of Pennsylvania ilakonzya kulembwa kuti njiiya kwaabweza mali muntu aakufwa.

Nyika Amayake (Real Estate): Nyika amayake izikonzya kusambalwa zilakonzya kusangwa, ikuti naa mpakkala wakusanga, inga wazumanana kukkala aawo ciindi nacipona. Mweelede kubandika abakuofesi yamutabi iili mucisi cenu kamutanalemba pepa neliba lyomwe lijatikizya nyika amayake.

Mali Aapegwa Amwaka (Gift Annuity): Oobu bubambe bulacitwa kwiinda mukupa mali kumbunga iibelesyegwa a Bakamboni ba Jehova. Eelyo muntu ooyu wasanga mali aaya naa muntu uumbi buyo ngwaasala, unakupegwa mali amwaka kusikkila akafwe.

Bwaapauzi Bwazyintu (Wills and Trusts): Zyintu naa mali alakonzya kupegwa ku Watch Tower Bible and Tract Society of Pennsylvania kwiinda mukubelesya pepa lyamalailile aabwaapauzi bwazyintu ilizumizyidwe amulawo naa kuti Watch Tower Bible and Tract Society of Pennsylvania ilakonzya kulembwa kuti njiyeelede kupegwa mali aajanika mubwaapauzi bwazyintu. Izyintu naa mali aapegwa kugwasya mbunga yabukombi alakonzya kujana bubotu bumwi kumakani aamutelo.

Kweelana ancaapandulula mabala aakuti “kulibambila nzyomukonzya kusanga,” nzila eezyi zyakusanga ziyanda kuti uusanga alibambile kabotu.

Kuti kamuyanda twaambo tumbi, inga mwabonana abaku Ofesi Ilanganya Mali, ambweni kwiinda mukubalembela kukkeyala nokuba kutumina luwaile anamba yaluwaile zitondezyedwe aansi aawa, antela mulakonzya kubuzya bakuofesi yamutabi iibelekela mucisi canu. Lyoonse kamutanatuma zyakusanga zilembedwe atala aawa, mweelede kubazyibya baku Ofesi Iilanganya Mali.

Treasurer’s Office

Watch Tower Society

Box 33459

Lusaka 10101

Farm 23a, Makeni, Lusaka

Luwaile: (021) 1 272062