“Ibana Mbobakonzya Kukomena Kumuuya”

MU December 9, 2008, kucikolo Cilanganya Lwaanguluko Lwamwana caku Sweden, kwakali muswaangano wakajisi mutwe wakuti “Ibana Mbobakonzya Kukomena Kumuuya.” Itwaambo tunji twakabandikwa abaabo bakali kwiiminina Cikombelo caku Sweden, bamuzikombelo zimbi zya Bunakristo bwanyika, iba Mozilemu akabunga kabantu batasyomi mucikombelo cili coonse.

Akati kabasikupa makani kwakali musololi wacikombelo iwakaamba kuti: “Cilakatazya kubapanduluda mbobakonzya kukomena kabotu kumuuya bana ambobakonzya kugwasyigwa atwaambo tamu Bbaibbele.” Ino mbuti zibalo zyamu Magwalo mbozibagwasya kukomena kumuuya ibana?

Musololi wacikombelo wakaamba kuti twaambo ootu tulabagwasya bana akuzinzibala kuyeeya nobali balikke. Wakaamba “makani aaba Adamu a Eva, Kaini a Abelo, Davida a Goliati, aakuzyalwa kwa Jesu, Zakaliya simutelo, cikozyanyo camwana mutaka, acikozyanyo camuna Samariya uuli kabotu.” Eezyi zyakaambwa kuti zyakali “zikozyanyo izikonzya kubagwasya bana kuyeeya mumakani mbuli ikweenwa, kulekelela, kutalilemeka akumvwana abeenzinyina.” Wakayungizya kuti: “Aaya makani alakonzya kubelesyegwa mubuumi akucita mbubakali kuzicita zyintu.”

Masimpe, cilayandika kubala Bbaibbele. Nokuba boobo, sena bana balakonzya “kuzinzibala kuyeeya” nzyobabala mu Magwalo alimwi akusala kabotu?

Abalo bapati bayandika kupanduludwa ncaamba Magwalo. Mucikozyanyo, Ibbaibbele litwaambila muntu watakali kukamvwisya kasimpe kamumagwalo kwiinda “[mu]kuzinzibala kuyeeya kali alikke.” Ooyu muntu wakali mweendelezi waku Etiopiya. Wakali kubala businsimi bwa Isaya pele tanaakali kucimvwa ncaakali kubala. Mbwaanga tanaakali kubumvwa businsimi oobu wakazumina kuti Filipo amupandulwide. (Inc. 8:26-40) Ooyu muna Etiopiya tali alikke iwakali kuyandika kugwasyigwa kumvwisya Magwalo. Toonse—ikapati bana—tweelede kupanduludwa ncaamba magwalo.

Ibbaibbele litwaambila kuti: “Bufubafuba bulaangidwe mumoyo wamwana.” (Tus. 22:15) Ibana bayandika kusololela akubatondezya zyakucita alimwi bazyali balijisi mukuli wakubayiisya mbobeelede kupona kabotu alimwi akubayiisya zyintu zyakumuuya izizwa mu Bbaibbele akumbungano ya Banakristo. Ibana beelede kuyiisyigwa. Kuzwa kubwana, bana bayandika kugwasyigwa kutegwa bakomene akuba “amiyeeyo iyakaiisigwa kusala cibotu ecibi.”—Heb. 5:14.