Muswaangano Uutakalubwi

“NDISYOMA kuti kumamanino aamuswaangano ooyu, muyooamba kuti, ‘Ncobeni ooyu, muswaangano weendelezyegwa a Leza uutakalubwi!’” Aaya ngamajwi ngobakaamba ba Stephen Lett bamu Kabunga Keendelezya ka Bakamboni ba Jehova ikugwasya baswiilizi kulangila makani aakali kuyoopegwa kumuswaangano ooyu. Ooyu wakali muswaangano wanamba 126 waba Watch Tower Bible and Tract Society of Pennsylvania, iwakacitwa mu October 2, 2010, ku Ŋanda Yakucitila Miswaangano Mipati ya Bakamboni ba Jehova mudolopo lya New Jersey, mu U.S.A. Ino ntwaambo nzi tupati-pati twakabandikwa kumuswaangano ooyu?

Makani aakusaanguna aa Mukwesu Lett akalikubandika kujatikizya nkalaki ya Jehova yakujulu iyaambwa mubbuku lyamu Bbaibbele lya Ezekiele. Eeyi nkalaki mpati iiminina mbunga ya Leza iyeendelezyegwa a Jehova mwini. Mukwesu Lett wakaamba kuti, cibeela cakujulu, calo cibambidwe azilenge zyamuuya, cilabalika kapati mbuli lulabo—mbubwenya mbwayanda Jehova. Cibeela caanyika cambunga ya Jehova Leza acalo cilabalika mbubwenya buyo. Mukwesu Lett wakaamba kucinca kwacitika mumbunga ya Leza munyika mumyaka misyoonto yainda.

Mucikozyanyo, mitabi imwi yakabikkwa antoomwe kutegwa banji bakali kubelekela mumaanda aa Bbeteli mumasi aayo babikkile maano kumulimo wakukambauka. Mukwesu Lett wakakulwaizya baswiilizi kuzumanana kubapailila ba Kabunga Keendelezya, baiminina ciinga camuzike musyomesi, kuti bazumanane kucenjela kutali buyo kusyomeka.—Mt. 24:45-47.

Malipooti Alimwi Azyakuluula Zikulwaizya

Mukwesu Tab Honsberger, uubeleka mu Kkomitii ya Mutabi ku Haiti, wakapa lipooti yeetezya kapati iijatikizya muzuzumo wanyika wakacitika mu January 12, 2010, yalo yakajaya bantu bainda ku 300,000 mucisi eeci. Wakaamba kuti basololi bazikombelo bakali kwaambila bantu kuti Leza nguwakabasubula bantu bakafwa akaambo kakuti bakanyina lusyomo, pele bantu bakajisi lusyomo wakabakwabilila. Pele cigambya ncakuti zigwebenga zinji zyakaangidwe zyakaloboka akaambo kakuti bwaanda bwantolongo bwakawa akaambo kamuzuzumo wanyika ooyu. Bantu banji babombe myoyo balaumbulizyigwa ciindi nobaiya kasimpe kaamba ncokuli mapenzi manji boobu imazuba aano. Mukwesu Honsberger wakazubulula majwi ngaakaamba mukwesu umwi waku Haiti iwakafwidwa mukaintu wakwe muntenda kuti: “Ndakalila kapati buzuba oobo. Tandizyi naa ndiyooleka lili kulila, pele ndilikkomene akaambo kaluyando luli mumbunga ya Jehova. Ndilijisi  bulangizi alimwi ndililibambilide kwaambila bamwi zyabulangizi oobu.”

Ba Mark Sanderson, bacibeela camukwasyi wa Bbeteli waku Brooklyn, bakapa lipooti yaku Philippines. Ba Sanderson, ibakali mu Kkomiti ya Mutabi ku Philippines, bakalikkomene kwaambilizya myeelwe yaatala yakatobelana iili 32 yabasikumwaya ba Bwami yamucisi eeci alimwi akuti ziiyo zya Bbaibbele nzinji kwiinda basikumwaya. Bakaamba kujaigwa kwamwana musankwa muzyukulu wamukwesu Miguel. Ba Miguel bakabeleka canguzu kutegwa sikujaya aangwe. Nikwakainda ciindi kuzwa muntu ooyu naakaangwa, ba Miguel bakaswaangana asikujaya ooyu ciindi nibakali kukambauka muntolongo. Nokuba kuti bakalilibilikide, bakaambaula anguwe caluyando alimwi cakukkazika moyo. Mpoonya bakatalika kwiiya amwaalumi ooyu, walo wakatondezya luyandisisyo alimwi akuyanda Jehova. Lino wakabbapatizyigwa. Ba Miguel balindila kuti mulongwe wabo akazwe ino-ino muntolongo. *

Cibeela cakatobela cakali cakubuzya-buzya, calo cakacitwa aba Mark Noumair bayi babelekela ku Cibeela ca Zikolo Zyeendelezyegwa a Leza. (Theocratic Schools Department) Bakabuzya-buzya mikwasyi yotatwe—ba Alex aba Sarah Reinmueller, ba David aba Krista Schafer alimwi aba Robert aba Ketra Ciranko. Ba Alex Reinmueller babeleka mu Kkomitii Iilanganya Zimwaigwa, bakaamba mbuli mbobakali kukayanda kasimpe ciindi nibakali kucita mulimo wabupainiya kucisi ca Canada kabajisi myaka iili 15, balo ziindi zinji bakali kubeleka balikke mumulimo wa mumuunda. Ciindi nibakabuzigwa bakali kubayumya-yumya nibakali ku Beteli, ba Reinmueller bakaamba baalumi botatwe basyomeka. Alimwi bakaamba mbuli umwi aumwi wabaalumi aaba mbwaakabagwasya kuti bakomene kumuuya. Bakaintu babo ba Sarah, bakaamba kujatikizya cilongwe cabo amucizyi wakaliyumya kwamyaka minji ciindi naakali muntolongo ku China akaambo ka lusyomo lwakwe. Ba Sarah bakaamba kuti bakaiya kuba alusyomo muli Jehova kwiinda mukupaila.

Ba David Schafer, ibakali kugwasyilizya mu Kkomitii Iilanganya Ziyiisyigwa, bakabalumbaizya banyina akaambo kalusyomo lwabo luyumu alimwi bakaamba bakwesu bakali kubeleka mulimo wakutema masamu alimwi ambobakabagwasya kuba mupainiya bakugwasyilizya nibakacili bakubusi. Bakaintu babo ba Krista, bakaamba kuti bakagwasyigwa abamukwasyi wa Bbeteli ibakkala ciindi cilamfwu ‘ibakasyomeka mutuntu tusyoonto’ kweelana a Jesu mbwaakaamba.—Lk. 16:10.

Ba Robert Ciranko babelekela kucibeela ca Kkomiti Iilanganya Zilembwa bakali kwaamba bamakaapanyina boonse kuli bausyi abanyina bana Hungary bazangalisi alimwi Banakristo  bananike. Nibakacili bana bakali kukkomana kujanika kumiswaangano mipati-pati yakali kucitika muma 1950 kwalo nkobakaiya kuti mbunga ya Jehova nimbunga mpati kwiinda mbungano nkobakali kuzulilwa. Bakaintu babo ba Ketra bakaamba mbobakaiya kusyomeka nibakali kubeleka kabali bapainiya mumbungano mwakali basiluleyo alimwi amapenzi aambi. Bakaliyumya amane bakalonzyegwa kwaakubelekela mumbungano imwakali lukamantano kabali bapainiya baalubazu kwalo nkobakakulwaizyigwa.

Ba Manfred Tonak mpoonya bakapa lipooti yakucisi ca Ethiopia. Eeci cisi ncakaindi alimwi lino cilijisi basikumwaya makani mabotu basika ku 9,000. Bunji bwabo bakkala munsi-munsi naa mudolopo lipati lya Addis Ababa. Aboobo masena aali kulamfwu adolopo ayandika basikumwaya banji. Kutegwa bamane penzi eeli, Bakamboni bana Ethiopia bali mumasi aambi bakatambwa kuti bazyikukambauke mumasena aali kulamfwu aamucisi eeci. Ibanji bakaboola bakabakulwaizya Bakamboni bamucisi eeci alimwi bakabajana bantu bakali kuyanda kuswiilila.

Cibeela ciyandika kapati capulogilamu eeyi akali makani akusiilana ajatikizya Bakamboni ba Jehova ku Russia alimwi amapenzi ngobajisi. Ba Aulis Bergdahl bamu Komiti Yamutabi mu Russia bakaamba makani ambobakali kupenzyegwa kaindi Bakamboni mu Russia, ikapati mudolopo lya Moscow. Ba Philip Brumley ba Cibeela Cilanganya Mulawo ku mutabi waku United States bakaamba makani aakkomanisya aakacitika mumyezi yainda ciindi ba European Court of Human Rights (ECHR) nobakaiswiilila milandu iili fwuka yakapegwa Bakamboni. Mu Milandu iili fwuka njobakapegwa, baku Nkuta bakapandulula kabotu-kabotu milandu eeyi ncoyatakali yamasimpe. Nokuba kuti mulandu taunakosolwa, Mukwesu Brumley wakaamba kuti, ikuti naa Nkuta ikaabandike kabotu makani aaya ciyakugwasya abali muzisi zimwi.

Naakamana kwaambwa makani aaya aakkomanisya, Mukwesu Lett wakaambilizya kuti ibamu ECHR bazumina kuswiilila mulandu wakatola ciindi cilamfwu akati kamfwulumende ya France a Bakamboni ba Jehova. Inkuta eeyi iilemekwa kapati kanji-kanji taizumini kuswiilila twaambo twamusyobo ooyu. Kusika lino bamu ECHR bakalanga-langa kale milandu iili 39 iijatikizya Bakamboni ba Jehova alimwi iili 37 aakati kayeeyi bakakosola kuti Bakamboni bakazunda. Mukwesu Lett wakakulwaizya bantu ba Leza kabapailila makani aayo kuli Jehova Leza.

Lipooti yamamanino yakapegwa aba Richard Morlan ibakali bayi mu Cikolo ca Baalu Bambungano. Bakaamba kabakkomene kwaamba cikolo  eeci alimwi ambobakalimvwa baalu bakanjila mucikolo eeci.

Makani Amwi Aakaambwa Abamu Kabunga Keendelezya

Ba Guy Pierce bamu Kabunga Keendelezya bakapa makani aakayeeme alugwalo lwamwaka wa 2011, ‘Amuccijile kuzyina lya Jehova.’ (Zef. 3:12) Bakabona kuti nokuba kuti eeci nciindi cikkomanisya munzila zinji kubantu ba Jehova, nciindi ciyandika kubikkila maano. Buzuba bupati bwa Jehova bulaafwaafwi, pele bantu bacizumanana kuyubila mubukombi bwakubeja, twaambo twacisi, lubono zyakulikkomanisya azimwi zili boobo. Kutegwa tujane mayubilo aali kabotu, tweelede kwiita muzyina lya Jehova, cipandulula kumuzyiba, kumulemeka kapati alimwi akumusyoma Muntu wiimininwa azyina eelyo, kumuyanda azyintu zyoonse nzyotujisi.

Ba David Splane bamu Kabunga Keendelezya mbobakatobela amubandi uupa kuyeeya wakajisi mutwe wakuti: “Sena Mwakanjila Kale Mukulyookezya kwa Leza?” Bakatondezya kuti kunjila mukulyookezya kwa Leza tacaambi kutasungwaala, mbokunga Jehova a Mwanaakwe ‘bacibeleka’ mubuzuba bwa maambilambali bwa kulyookezya kutegwa makanze aa Leza kujatikizya nyika azuzikizyigwe. (Joh. 5:17) Aboobo, mbuti mbotukonzya kunjila mukulyookezya kwa Leza? Nkwiinda mukuleka kucita cibi alimwi akuba alusyomo muli Kristo. Tuyandika kuba alusyomo akupona kweelana amakanze aa Leza alimwi katucita kufwumbwa nzyotukonzya kutegwa tusumpule makanze aayo. Ziindi zimwi kucita boobo tacili cuuba-uba, pele tweelede kutobela lulayo abusolozi bupegwa ambunga ya Jehova. Mukwesu Splane wakakombelezya baswiilizi kuti kabasolekesya kutegwa banjile mukulyookezya kwa Leza.

Makani aamamanino akapegwa aba Anthony Morris bamu Kabunga Keendelezya akajisi mutwe wakuti: “Ino Tulindila Nzi?” Mukwesu Morris wakayeezya baswiilizi kujatikizya businsimi bulangilwa kuzuzikizyigwa, zyintu nzyobalangila kapati boonse basyomeka. Eeci cibikkilizya kwaambilizya “Luumuno akuliiba!” alimwi akunyonyoonwa kwabukombi bwakubeja. (1 Te. 5:2, 3; Ciy. 17:15-17) Notumvwa makani aacitika aatazuzikizyi businsimi buli boobo, Mukwesu Morris wakacenjezya kuti tatweelede kwaamba kuti, “Eeyi yeelede kuba Armagedoni.” Wakaamba kuti tweelede kukkomana, kukkazyika moyo alimwi akulindila kweelana ambokulembedwe kulugwalo lwa Mika 7:7. Aciindi mpamunya aawo wakalomba bantu boonse kuti kababelekela antoomwe aba Kabunga Keendelezya mbubwenya mbuli basikalumamba baya kunkondo. Wakaamba kuti: “Myoyo yanu ibe abukozu, nyoonse nomulangila Jehova.”—Int. 31:24.

Kumamanino kwakali zyakwaambilizya zikkomanisya zitakalubwi. Ba Geoffrey Jackson bamu Kabunga Keendelezya bakaambilizya kuti, bayanda kubona mboikonzya kubeleka magazini ya Ngazi Yamulindizi mpya nguba-uba yakwiiya yabaabo batacizyi kabotu kubala Cingisi. Bamane ba Stephen Lett bakaambilizya kuti Kabunga Keendelezya kalabikka bubambe bwakuti nyendo zyabweembezi kazicitwa kubalangizi bacooko abamakaintu babo mu United States. Bamane bakaamba kuti Cikolo Cakwiiya Mulimo cinakwiitwa kuti Cikolo Cakwiiya Bbaibbele ca Bakwesu Batakwete. Alimwi bakaambilizya cikolo cipya cinakwiitwa kuti Cikolo Cakwiiya Bbaibbele ca Banabukwetene Banakristo. Eeci cikolo ciyakugwasya banabukwetene kuti kababelesyegwa kapati mumbunga ya Jehova. Mukwesu Lett alimwi wakaambilizya kuti Cikolo ca Balangizi Beendeenda Alimwi a Bamakaintu Babo a Cikolo ca Bamukkomiti ya Mutabi Alimwi a Bamakaintu Babo cinakucitwa ziindi zyobilo amwaka ku Patterson, eeci ciyakupa kuti aabo bakanjila kale mucikolo eeci banjile alimwi.

Kumamanino aa muswaangano ooyu ba John E. Barr bali amyaka iili 97 ibali mu Kabunga Keendelezya kwaaciindi cilamfwu bakapaila mupailo uukkazyika moyo. * Niwakamana muswaangano ooyu boonse bakalimvwa kuti oobu mbuzuba butakalubwi.

[Bupanduluzi buyungizidwe]

[Majwi aakwelelezya sikubala aali apeeji 19]

Cibeela cakubuzya-buzya cakabakkomanisya boonse bakajanika

[Majwi aakwelelezya sikubala aali apeeji 20]

Jehova waulongezya mulimo wakukambauka mu Ethiopia