Sena Muciyeeyede?

Sena cakamukkomanisya kubala mamagazini aa Ngazi Yamulindizi aalino-lino? Amubone naa inga mwayiingula mibuzyo eeyi iitobela:

• Ino ninzila nzi zyotatwe zikonzya kutugwasya kuti katusyomeka?

Ooku: (1) Nkuyoowa kubisizya Leza. (1 Pe. 3:12) (2) Kuba amanjezyeezya aayiisyidwe njiisyo zyamu Bbaibbele. (3) Kukkutila.—4/15, mapeeji 6-7.

• Ino tuzyiba buti kuti kubelekela Leza cakumaniina tacaambi kuciindilizya kucita zyintu naa kutaba aciindi cakulyookezya akukkomana abamwi?

Tulakonzya kubona cikozyanyo ca Jesu. Wakali kukkomana kulya abamwi. Tulizyi kuti tanaakali kuciindilizya kucita zyintu. Bantu ibamwi abana bakali kukkomana kuba anguwe.—4/15, peeji 10.

• Ino ‘ncinunuzyo’ nzi caambwa mulugwalo lwa Jobu 33:24 alimwi ino Jobu cakamugwasya buti?

Ibbala lyakuti cinunuzyo aawa lyaamba “kusisa.” Kuli Jobu cinunuzyo cakali kwaamba kutuula munyama kutegwa Leza amulekelele Jobu kuzibi zyakwe. Jehova wakacitambula cinunuzyo ca Jobu icakapa kuti cibi cakwe cilekelelwe akujula nzila yakuti Leza amuponye akumulongezya. (Job. 1:5; 42:12-17)—7/1, peeji 19.

• Ino ncinzi ncociiminina cisamu camaolifa cili kucaandano 11 calugwalo lwa Baloma?

Cisamu camaolifa ciiminina cibeela calunyungu lwa Abrahamu, Israyeli wakumuuya. Muyanda wiiminina Jehova alimwi cisamu camaolifa cacikozyanyo ciiminina Jesu. Ba Juda nobakamukaka Jesu, Bamasi bakaba basyomi bakalumikizyigwa, aboobo bakapa kuti mweelwe woonse wacibeela calunyungu lwa Abrahamu ukkwane.—5/15, mapeeji 22-25.

• Ino mbuti mbotuzyiba kuti Gehena tabuli busena bwakupenzyela bantu buyaka mulilo?

Muzeezo wakuumpa bantu ulamunyemya Jehova. (Jer. 7:31) Kuyungizya waawo, njiisyo yakuti bantu balapenzyegwa bafwa tayeendelani ambwabede Leza siluyando alimwi ancoliyiisya Bbaibbele kuti bafwide “tabezi cintu niciba comwe.” (Muk. 9:5,10)—7/1, peeji 23.

• Ino Jehova ubacita buti aabo “bawizukide mumoyo” alimwi “abatete myuuya”? (Int. 34:18)

Mbuli muzyali siluyando uujatilila akuumbulizya mwana uuli mumapenzi, Jehova ulaafwaafwi kubakombi bakwe ibalomba lugwasyo. Ulayandisya kubaumbulizya akubakkazika myoyo yabo aabo bawizukide alimwi abatete myuuya. Ulakonzya kubapa busongo anguzu ziyandika kutegwa bakonzye kuzunda kufumbwa mapenzi ngobakonzya kujana. (2 Ko. 4:7; Jak. 1:5)—7/1, peeji 32.

• Sena bantu aabo bakeelede kuti kabalondokede akaambo ka Jesu bakaba cibeela cacinunuzyo?

Peepe. Jesu akaambo kakuti wakalilondokede naakapa kuti bantu boonse balondoke, pele aaba bantu bakeelede kuti kabalondokede tabali cibeela cacinunuzyo. Kulondoka kwa Jesu alikke nkukwakeelene akwa Adamu. (1 Ti. 2:6)—6/15, peeji 13.

• Ino mbuti Banakristo mbobatondezya kuti balakubikkila maano kucenjezya kulembedwe mulugwalo lwa Milimo 20:29, 30 kujatikizya bamayi bakubeja?

Tababatambuli mumaanda aabo naa kubaanzya bamayi bakubeja. (Lom. 16:17; 2 Jo. 9-11) Banakristo tabatambuli mabbuku aaba siluleyo, kubeebelela mucipeku-peku naa kubala nzyobayiisya a Intaneti.—7/15, mapeeji 15-16.

• Kweelana ambokutondezyedwe kulugwalo lwa Luka 10:40-42, nkaambo nzi kapati ncotweelede kuyanzana abasyomima?

Tulayanzana abasyomima kutegwa tuyumizyanye alimwi akupana zipego zyakumuuya, kutali kuyanda kubapa naa kutambula zyakulya zyakumubili buyo. (Lom. 1:11,12) Muziindi zyakuyumizyanya zili boobu, kuyandika buyo cakulya cisyoonto.—7/1, peeji 13.