Kulibambila Kabotu Mulimo Wakutamba Bantu Kwazyala Micelo

María Isabel ngusikumwaya musungu uucili mwana-mwana uukkala mudolopo lya San Bernardo mucisi ca Chile ku South America. Walo amukwasyi wakwe bazwa mumusyobo wabantu bamucilawo baitwa kuti Mapuche. Mukwasyi oonse mbasungu mukugwasyilizya kusoleka kwakuti kubambwe mbungano mpya mumwaambo waci Mapuche alimwi iwiitwa kuti Mapudungun.

Nokwakaambilizyigwa kuti Ciibalusyo calufwu lwa Kristo cilacitwa muci Mapudungun alimwi akuti tupepa tusimbidwe twakutamba bantu ku Ciibalusyo tusika ku 2,000 nkotuli mumwaambo ooyo kutegwa twaabilwe, María Isabel wakakkala aansi akuyeeya. Ncinzi ncaakali kukonzya kucita? Wakayeeya zyakuluula zya Bakamboni bakubusi balo ibakakkomana akaambo kakuzwidilila ciindi nobakali kukambaukila basicikolonyina alimwi abamayi. Wakabandika abazyali bakwe kujatikizya makani aaya, mpoonya antoomwe bakamvwana kuti María Isabel inga wasola kuyeeya nzila yakwaabila tupepa ootu kucikolo. Ninzila nzi njaakajana?

Cakusaanguna, María Isabel wakalomba beendelezi bacikolo kuti bamuzumizye kubikka kapepa kakutamba kumanjililo aalubuwa lwacikolo. Bakamuzumizya alimwi akumulumbaizya akaambo kabupampu bwakwe. Bumwi buzuba mafwumofwumo ciindi cakwiitwa mazyina, bapati bacikolo bakaambilizya kubelesya masipika kujatikizya kutamba ooko.

Mpoonya, María Isabel wakalomba kunjila mumakkilasi oonse. Nobakamuzumizya bamayi, wakabuzya basicikolo mukkilasi imwi aimwi kuti naa kwakali bamusyobo wa Mapuche. Wakaamba kuti: “Ndakali kuyeeya kuti ambweni kulajanika buyo basicikolo ibali 10 naa 15 kuzwa mumikwasyi yamusyobo waci Mapuche cikolo coonse. Pele bakali banji kwiinda waawo—ndakaabila tupepa twakutamba bantu tusika ku 150.”

“BAKALI KULANGILA MUNTU MUPATI”

Mukaintu umwi iwakabona kapepa kakutamba kumanjililo aacikolo wakabuzya ngwakonzya kwaambaula awalo kujatikizya kutamba ooku. Amuyeeye buyo mbwaakagambwa ciindi nobakamutola kumusimbi uujisi myaka yakuzyalwa iili 10. María Isabel wakaseka akwaamba kuti: “Bakali kulangila muntu mupati.” María Isabel wakamupa kapepa kakutamba bantu alimwi akumupandulwida asyoonto, kumane wakamulomba mukaintu ooyu kkeyala yakwe kutegwa walo abazyali bakwe bakamuswaye akumupandulwida zinji kujatikizya Bwami bwa Leza. Eelo kaka bakakkomana basikumwaya bali 20 ibabelekela mucilawo cibelesya mwaambo waci Mapudungun kubona mukaintu ooyu antoomwe abantu bambi bamusyobo wa Mapuche ibajisi luyandisisyo ibali 26 ku Ciibalusyo! Kabunga aako lino nimbungano iicita kabotu.

Kufwumbwa naa mujisi myaka yongaye, sena andinywe mulakonzya kutamba mbomwiiyalimwi naa mbomubelekalimwi ku Ciibalusyo, kumakani aabuleya naa kumuswaangano wacooko? Mulakonzya kuvwuntauzya mumabbuku eesu izyakuluula zikonzya kumugwasya kutegwa muzwidilile kucita oobo. Alimwi amupaile kuli Jehova kulomba muuya uusalala kutegwa umugwasye kuba basicamba kwaambaula kujatikizya nguwe. (Lk. 11:13) Kuti naa mwacita oobo, andinywe mulakonzya kukkomana alimwi akukulwaizyigwa azyintu zikonzya kucitika akaambo kakulibambila kabotu mulimo.