Elisha Wakabona Nkalaki Ziyaka Mulilo—Sena Andinywe Mulazibona?

Mwami waku Aramu wakali kuyandaula musinsimi wa Leza Elisha. Wakamvwa kuti Elisha wakali ku Dotani munzi iwakali atala aacilundu iwakayakilidwe lubaya. Masiku, mwami wa Aramu wakatuma mabbiza, nkalaki zyankondo, alimwi abasikalumamba ku Dotani. Nobwakaca, bakaluuzingulukide kale munzi.—2 Bam. 6:13, 14.

Ciindi mulanda wa Elisha naakabuka akuya anze, wakabona impi yabasikalumamba bana Aramu. Kumane wakalila kuti: “Maawe, simalelo wangu! Tucite buti?” Elisha wakamwaambila kuti: “Utayoowi pe, nkaambo abo mbetuli abo mbanji kwiinda mbabo.” Mpoonya musinsimi wakatalika kupaila akwaamba kuti: “O Jehova, kovumbulula meso aakwe, kuti abone.” Cibalo cilazumanana kwaamba kuti: “Nkabela Jehova wakavumbulula meso aamulanda, elyo wakabona kuti cilundu cakalizwiide mabbiza ankalaki zyamulilo zizyungulukide Elisha.” (2 Bam. 6:15-17) Ncinzi ncotukonzya kwiiya kuliceeci alimwi akuzyintu zimbi izyakacitika mubuumi bwa Elisha?

Nokuba kuti wakazingulukidwe ampi yabana Aramu, Elisha wakakkazika moyo akaambo kakuti wakali kusyoma muli Jehova alimwi wakabona kuti Leza wakali kumukwabilila. Mazuba aano tatulangili kucitikilwa maleele, pele tulizyi kuti Jehova ulabakwabilila bantu bakwe kabali nkamu. Munzila imwi, andiswe tulizingulukidwe amabbiza alimwi ankalaki zyamulilo. Ikuti naa tulaalusyomo lwakuti Jehova ulabakwabilila bantu bakwe alimwi akumusyoma lyoonse, tuyakulimvwa kukwabililwa alimwi uyakutulongezya. (Int. 4:8) Atubone mbotukonzya kugwasyigwa kuzyintu zimbi izyakacitika mubuumi bwa Elisha.

ELISHA WATALIKA KUKUTAUKILA ELIYA

Aciindi cimwi Elisha naakali kulima mumuunda, musinsimi Eliya wakaunka kulinguwe akumusowela cisani cakwe cabusinsimi. Kwiinda mukucita boobo, Eliya wakali kumutamba kuti abe mulanda wakwe, nkokuti mubelesi wakwe. Elisha wakabamba pobwe, akulaya bausyi abanyina, kumane wakasiya munzi ookwabo akutobela Eliya akutalika kumukutaukila. (1 Bam. 19:16, 19-21) Akaambo kakuti Elisha wakalilyaabide kucita kufwumbwa Leza ncaakali kuyanda kuti acite, Jehova wakali kukonzya kumubelesya munzila zinji alimwi  mukuya kwaciindi wakamusala kuba musinsimi kunjila mubusena bwa Eliya.

Elisha wakakutaukila Eliya ambweni kwamyaka iili cisambomwe. Ciindi eeco, Elisha “ngonguwe iwakali kutila maanzi amaanza aa-Eliya.” (2 Bam. 3:11) Ino eeci caamba nzi? Mumazuba aayo, cakali cilengwa bantu kulya amaanza. Bamana kulya, mubelesi wakali kutila maanzi mumaanza aasimalelaakwe kwaasanzya. Aboobo, milimo imwi njaakali kucita Elisha yakali kulibonya kuti misyoonto naa iitayandiki kapati. Nokuba boobo, wakali kucibona kuti ncoolwe kuba mulanda wa Eliya.

Mbubwenya buyo, abalo Banakristo banji mazuba aano balalyaaba kubeleka milimo yaciindi coonse iisiyene-siyene. Kwiinda mukucita boobo, balakulwaizyigwa alusyomo alimwi akuyandisisya kubelesya nguzu zyabo cakumaninina mukubelekela Jehova. Milimo imwi iyanda kuti basiye minzi yabo akuyakubelekela ku Bbeteli, mumayake, amilimo imwi buyo—milimo banji njobakonzya kubona kuti taiyandiki kapati. Taakwe Munakristo weelede kubona milimo iili boobu kuti taiyandiki naa kuti milimo yaansi, nkaambo kuli Jehova ilayandika kapati.—Heb. 6:10.

ELISHA WAKAKAKATILA KUMULIMO WAKWE

Leza ‘katanamutola Eliya kujulu mukambizi,’ wakatuma musinsimi ooyu kuzwa ku Giligala kuya ku Beteli. Eliya wakaambila Elisha kuti tanaakali kuyandika kuunka anguwe, pele Elisha wakaingula kuti: “Nsikooanzaana ayebo.” Nobakali mulweendo, Eliya wakamwaambila alimwi ziindi zyobilo Elisha kuti acaale, pele taakwe naakazumina pe. (2 Bam. 2:1-6) Mbubwenya mbuli Rute mbwaakakakatila kuli Naomi, awalo Elisha wakakakatila kuli Eliya. (Rut. 1:8, 16, 17) Nkaambo nzi? Cakutadooneka akaambo kakuti Elisha wakali kuukkomanina mulimo ngwaakapegwa a Leza wakukutaukila Eliya.

Elisha wakatusiila cikozyanyo cibotu. Ikuti twapegwa mukuli umwi mumbunga ya Leza, tuyakuubikkila maano kapati ikuti lyoonse katuyeeya kuti tubelekela Jehova. Taakwe coolwe cipati kwiinda ceeco.—Int. 65:4; 84:10.

“KUMBILA NCOYANDA KUTI NKUCITILE”

Baalumi bobilo aaba nobakali kuyaabweenda, Eliya wakati kuli Elisha: “Kumbila ncoyanda kuti nkucitile, nentana kutolwa kuzwa kulinduwe.” Mbubwenya mbuli Solomoni mbwaakalomba cintu cijatikizya zyintu zyakumuuya, awalo Elisha wakacita mbubwenya oobo. Wakalomba kuti ‘zibeela zyobilo zyamuuya wa Eliya zibe alinguwe.’ (1 Bam. 3:5, 9; 2 Bam. 2:9) Mu Israyeli, mwana musankwa mutaanzi kuzyalwa wakali kupegwa zibeela zyobilo zyalukono. (Dt. 21:15-17) Aboobo, Elisha wakali kulomba kubweza busena bwa Eliya, kuba musinsimi. Kuyungizya waawo, Elisha wakali kuyanda kuba sicamba mbubwenya mbuli Eliya, walo iwakali ‘kusungwaalila Jehova cakumaninina.’—1 Bam. 19:13, 14.

Ino Eliya wakaingula buti kukulomba kwamulanda wakwe? Musinsimi wakaamba kuti: ‘Cintu ncokumbila nciyumu, nekubaboobo naa undibone nensi tolwe kuzwa kulinduwe, cilaba mbubonya, pele kuti utandiboni, tacikooyooba obo pe.’ (2 Bam. 2:10) Bwiinguzi bwa Eliya bwakali kwaamba zyintu zyobilo. Cakusaanguna, Leza alikke nguwakali kukonzya kusala kupa Elisha ncaakali kulomba. Cabili, ikuti Elisha wakali kuyanda kutambula ncaakalomba wakeelede kukakatila kuli Eliya, ziyume zitete.

NCAAKABONA ELISHA

Ino Leza wakakubona buti kulomba kwa Elisha kwazibeela zyobilo zyamuuya wa Eliya? Cibalo caamba kuti: “Nibakacili kuya bweenda akwaambaula, kwakaboneka inkalaki yamulilo amabbiza aamulilo, yakabaanzaanya. Mpawo Eliya wakatanta mukambizi kuya kujulu.” * Oobo mbobwakali bwiinguzi bwa Jehova kukulomba kwa Elisha. Elisha wakabona Eliya katolwa kuzwa kulinguwe, wakatambula zibeela zyobilo zyamuuya wa Eliya, alimwi wakaba musinsimi wa Leza mubusena bwa Eliya.—2 Bam. 2:11-14.

Nocakaloka cisani cabusinsimi ca Eliya, Elisha wakacibwezela akucisama. Cisani eeci cakali kumuzyibya Elisha kuti lino musinsimi wa Leza. Bumboni abumbi bwakuti wakasalwa kuba musinsimi bwakalibonya ciindi naakacita maleele kwiinda mukwaandaanya maanzi mu Mulonga wa Jordano.

Ncaakabona ciindi Eliya naakatolwa kujulu akambizi cakutadooneka cakamujatikizya kapati Elisha. Kayi muntu takonzyi kubona nkalaki yankondo amabbiza aamulimo abuzuba. Eezyi zyakali kutondezya bumboni bwakuti Jehova waingula kulomba kwa Elisha. Ciindi Leza naingula mipailo yesu, inga tatuboni nkalaki yankondo naa mabbiza aamulilo mucilengaano. Pele  tulizyi kuti Leza ubelesya nguzu kutegwa kuyanda kwakwe kucitwe. Alimwi ciindi notubona Jehova mbwailongezya mbunga yakwe yaanyika, munzila imwi ‘tubona’ nkalaki yakwe kaibeleka.—Ezk. 10:9-13.

Kuli zyintu zinji izyakamucitikila Elisha izyakali kusinizya kuti Jehova ulaanguzu kapati. Alimwi buya muuya uusalala wa Leza wakapa kuti musinsimi acikonzye kucita maleele aali 16—ziindi zyobilo kwiinda ngaakacita Eliya. * Ciindi cabili Elisha naakabona mabbiza ankalaki zyankondo zyamulilo kwakali ku Dotani ciindi nokwakacitika makani aambidwe kumatalikilo aacibalo eeci.

ELISHA WAKASYOMA JEHOVA

Nokuba kuti wakazingulukidwe abasinkondonyina ku Dotani, Elisha wakazumanana kukkazyika moyo. Nkaambo nzi? Akaambo kakuti wakajisi lusyomo luyumu muli Jehova. Andiswe tuyandika lusyomo luli boobo. Aboobo, tweelede kupailila muuya uusalala wa Leza kutegwa utugwasye kutondezya lusyomo alimwi amicelo iimwi yamuuya.—Lk. 11:13; Gal. 5:22, 23.

Icakacitika ku Dotani alimwi cakapa Elisha twaambo tubotu twakusyoma muli Jehova alimwi ampi yakwe iitalibonyi iikwabilila. Musinsimi wakazikuzyiba kuti Leza wakabikkide bangelo kuzinguluka munzi alimwi abasinkondonyina. Kwiinda mukoofwaazya basinkondonyina, Leza munzila yamaleele wakafwutula Elisha amubelesi wakwe. (2 Bam. 6:17-23) Mbubwenya mbwaakali kucita amubukkale bumbi, Elisha wakasyoma muli Jehova cakumaninina amubukkale oobu bukatazya.

Mbubwenya mbuli Elisha, andiswe atusyome muli Jehova Leza. (Tus. 3:5, 6) Ikuti twacita oobo, ‘Leza uyakutufwida luzyalo, akutulongezya.’ (Int. 67:1) Masimpe kuti tatuzingulukidwe ankalaki amabbiza aamulilo eeni pe. Nokuba boobo, ‘lyamapenzi mapati,’ Jehova uyakutukwabilila katuli bunyina bwanyika yoonse. (Mt. 24:21; Ciy. 7:9, 14) Kusikila ciindi eeco, katuyeeyede lyoonse kuti “Leza mayubilo eesu.”—Int. 62:8.

[Bupanduluzi buyungizidwe]

[Kabbokesi kali apeeji 30]

KUZUNDA KWAMUNKUTA KUMWI IKWAKACITIKA CAINO-INO

243 Mweelwe wamilandu njobakazunda Bakamboni ba Jehova munkuta mpati caino-ino munyika yoonse

K42,640,000

Mweelwe wamali woonse aakapilusyigwa kuli Bakamboni ba Jehova mu December 11, 2012, amfwulumende yaku France kakwiindide myaka iili 15 kuzwa mulandu nowakatalika kubetekwa

Greece—Council of State

Mbunga ya Council of State yakazumina mu November 2, 2012 kuti Bakamboni ba Jehova, ncikombelo ca Banakristo cizyibidwe kapati alimwi cilijisi lwaanguluko lwakuba amaanda aakukombela

20 Milandu njobakazunda munkuta mpati ya European Court of Human Rights kuzwa mu April 2000

South Korea—Mbobakaakosola Makani ba U.N. Human Rights Committee

Mu October 25, 2012 - Imfwulumende ya South Korea yakaambilwa kubbadela mali akaambo kakunyonganya lwaanguluko lwa Bakamboni ba Jehova kulibaabo ibali 388 ibakaka kucita mulimo wabusikalumamba akaambo kazyintu nzyobasyoma