Sena Mulakonzya Kuyungizya Ciindi Cakucenjezya Bantu Mumulimo Wakukambauka?

Filimu imwi iitegwa A Trip Down Market Street iyakalekkoodwa mumyaka yamuma 1900 ilabakkomanisya bantu mbwaanga itondezya mbuli buumi mbobwakabede mudolopo lya San Francisco, lili mucisi ca U.S.A. Ibakapanga filimu eeyi bakabikkide muncini wakufwotozya kumbele aamootokala weendela munjanji iwakali kweenda alimwi akuyaabufwotola mumigwagwa mipati. Filimu eeyi ilatondezya zikkocci izikwelwa amabbiza amyootokala yakaindi, alimwi ilatondezya basikuula abana basankwa kabacita milimo yabo yabuzuba abuzuba.

Ikaambo kapa kuti filimu eeyi kaibacisizya moyo bantu bamwi nkakuti yakalekkodwa mu April 1906, kakuceede buyo ciindi cisyoonto kuti kucitike muzuzumo wanyika alimwi amulilo iwakajaya zyuulu zyabantu akunyonyoona cibeela cimwi cadolopo mu April 18. Ambweni, bantu bamwi ibatondezyedwe mufilimu eeyi bakaceede buyo amazuba masyoonto aakupona. Scott Miles muzyukulu waumwi wabaabo ibakapanga filimu eeyi wakaamba kuti: “Inga ndiide kubabona bantu mbabaya, kabatazyi ciyanda kubacitikila. Alimwi tokonzyi kubagwasya, ccita buyo kubeetelela.”

Kuli kukozyanya kupati ikuliko nkotujana ikweendelana amazuba eesu ngotupona. Andiswe tulakonzya kubeetelela basimukoboma. Balacita milimo yabo yabuzuba abuzuba kabatazyi ntenda iiboola kumbele—lunyonyooko lwabweende bwazyintu oobu alimwi abukkale bwambubo. Nokuba boobo, kwiindana amuzuzumo wanyika uutakonzyi kubonwa, kuli ciindi cisyoonto ciceede cakuti tucenjezye basimukoboma kujatikizya buzuba bwa Jehova bwalubeta. Cakutadooneka, kweelede kuti nsondo ansondo mulatola lubazu mumulimo wakukambauka kuŋanda aŋanda, pele sena mulakonzya kuyungizya ciindi ncomubelesya mumulimo wakucenjezya bantu?

JESU LYOONSE WAKALI KUYANDISISYA ALIMWI WAKALILIBAMBILIDE KUKAMBAUKA

Cikozyanyo ca Jesu ncibotu kapati mbwaanga kunyina naakali kubona kuti zimwi ziindi wakeelede kukkala buyo. Wakali kubakambaukila aabo mbaakali kuswaanganya, naakali kweenda munzila wakamukambaukila simitelo alimwi naakali kulyookezya ciindi camasyikati wakamukambaukila mukaintu amukalo. (Lk. 19:1-5; Joh. 4:5-10, 21-24) Cakuliyandila, Jesu wakali kukambauka nomuba muciindi ncaakabikkide ambali kutegwa alyookezye. Luzyalo ndwaakali kubafwida basimukobonyina lwakapa kuti abakambaukile kutali kwakwiinzya buyo mulawo pe. (Mk. 6:30-34) Mbuti bamwi mazuba aano mbobaiya cikozyanyo ca Jesu cakupakamana?

BALACIBELESYA COOLWE CILI COONSE NCOBAJANA

Ba Melika bakkala mubusena bukwabilidwe kapati. Basimukobonyina banji mbana bacikolo ibazwa mumasi  aambi alimwi mazyina aabo amanamba aamafooni taalembedwe mubbuku ligwasya bantu kuzyiba nkwakkala muntu. Balalumba kapati kucoolwe ncobajisi cakutalisya mibandi yamu Bbaibbele abaabo bacita leenti mubusena busikila beenzu alimwi amucikwepe. Bakaamba kuti: “Eeci ncecilawo cangu.” Ba Melika balabwezelezya amabbuku aapandulula Bbaibbele aamumyaambo minji, alimwi banji balatambula matulakiti amamagazini. Alimwi balabaambila bantu kuti kabalanga aa Web site yesu ya jw.org. Munzila eeyi ba Melika bacikonzya kutalisya ziiyo zya Bbaibbele zili mbozibede.

Ba Sonia abalo balipakamene kutegwa bape bumboni kuli baabo mbobakonzya. Ba Sonia balembedwe mulimo kucibbadela, alimwi bakabikka mbaakani yakuti kabapa bumboni cakulomya kubabelesinyina. Bakasaanguna kuzyiba zyintu nzyobayandisya, muntu umwi aumwi kumugama. Mpoonya, ciindi cakulyookezya masyikati bakali kubandika makani aamu Bbaibbele abantu, umwi aumwi kumugama. Kwiinda mukucita oobo, ba Sonia bakacikonzya kutalisya ziiyo zya Bbaibbele zyobilo. Ba Sonia alimwi bajisi makanze aakubandika abaabo ibaboola kusilikwa ciindi nobalindila kuti ciindi cabo cikkwane.

AMUCIBELESYE KABOTU CIINDI NCOMUJISI

Muntu umwi iwakafwutuka muzuzumo wanyika iwakacitika mu 1906 wakaamba kuti yakali “ntenda iinda zyoonse aali zyeezyo izyakacitikila kale dolopo.” Nokuba boobo, kunyina ntenda iiyakweezyanisyigwa abuzuba bwakupilusyizya “baabo batamuzyi Leza,” ibuzuba ibuli afwaafwi kusika. (2 Tes. 1:8) Jehova ulayandisisya kapati kuti bantu bacince mizeezo yabo amyoyo akutambula mulumbe wakucenjezya uuli mukwaambilizyigwa a Bakamboni bakwe.—2 Pe. 3:9; Ciy. 14:6, 7.

Mulijisi coolwe cakujalula meso aabantu kutegwa babone kuti tuli muziindi zikatazya alimwi akubagwasya kuti bacileke kulilangawida zyintu nzyobayanda bamukamwini akutalika kuyandaula Jehova. (Zef. 2:2, 3) Amucibelesye kabotu coolwe coonse ncomujisi akubakambaukila babelesinyoko, basimukobonyoko, alimwi abaabo mbomuswaanganya ciindi nomucita milimo yanu yabuzuba abuzuba. Sena mulakonzya kuyungizya ciindi cakucenjezya bantu mumulimo wakukambauka?

[Cifwanikiso icili apeeji 31]

Kakunyina kucenjezya, muzuzumo iwakacitika mu 1906 alimwi amulilo iwakaboola akaambo kamuzuzumo ooyu, cibeela cipati cadolopo lya San Francisco cakanyonyooka

[Kulumba]

U.S. National Archives photo

[Cifwanikiso icili apeeji 32]

Amucibelesye kabotu coolwe coonse ncomujisi cakukambauka ciindi nomucita milimo yanu yabuzuba abuzuba