JESU KRISTO wakaamba kuti: “Koya kumunzi kuli bamukwasyi wako, ukabaambile zyintu zyoonse Jehova nzyaakucitila ambwaakufwida luzyalo.” Ciindi eeco kuboneka mbuli kuti wakali ku Gadara, kumusanza lwaajwe ku Lwizi lwa Galilaya, naakali kwaambila mwaalumi iwakali kuyanda kuba sikumutobela. Majwi aa Jesu atondezya kuti wakali kucimvwisya cilengwa cabantu—kuyandisisya kwaambila banamukwasyi makani aakkomanisya alimwi aayandika kapati.—Mk. 5:19.

Kanji-kanji aalo mazuba aano tulacibona cilengwa eeci, nokuba boobo mumasena amwi cilengwa eeci cilidumide kapati kwiinda masena amwi. Nkakaambo kaako, ciindi muntu naaba mukombi wa Leza wakasimpe, Jehova, kanji-kanji ulayanda kwaambila banamukwasyi nzyasyoma. Pele ino weelede kucita buti? Ino inga wabasika buti amoyo banamukwasyi ibanjila cikombelo cimbi—naa ibatali basyomi? Bbaibbele lilapa lulayo lusyomeka alimwi lugwasya.

Mumwaanda wamyaka wakusaanguna, Andreya wakali umwi wabaabo bakasaanguna kumuzyiba Jesu kuba Mesiya. Alimwi ino nguni ngwaakasaanguna kwaambila makani aaya? ‘Kusaanguna Anduleya wakajana munyina, Simoni, akumwaambila kuti: “Twamujana Mesiya” (izyina ilyaamba kuti Kilisito lyasandululwa).’ Andreya wakatola Petro kuli Jesu, calo cakapa kuti Petro abe acoolwe cakuba umwi wabasikwiiya ba Jesu.—Joh. 1:35-42.

Nokwakainda myaka iibalilwa kucisambomwe Petro naakali kukkala ku Jopa, wakatambwa kuunka kunyika ku Kaisareya kutegwa akaswaye mukwasyi wa Korneliyo, mweendelezi wabasikalumamba. Ino mbaani mbaakajana Petro ibakabungene muŋanda? ‘Koneliyo wakali kubalangila ba Petro abaabo mbaakaunka limwi alimwi wakatambide basazinyina abeenzinyina mbocakali kumvwana kapati.’ Aboobo,  Korneliyo wakapa basazinyina coolwe cakumvwa Petro kaambaula alimwi akusala kweelana anzyobakamvwa.—Mil. 10:22-33.

Ncinzi ncotukonzya kwiiya kuli Andreya alimwi a Korneliyo kujatikizya mbobakabalanganya banamukwasyi?

Ba Andreya alimwi a Korneliyo kunyina nobakalekela kuti zintu zilicitikile zilikke. Andreya lwakwe nguwakatola Petro kuli Jesu, alimwi Korneliyo wakabikka bubambe bwakuti basazinyina bamvwe ncaakali kuyanda kwaamba Petro. Pele ba Andreya a Korneliyo kunyina nobakasinikizya basazinyina naa cabucenjezu kubasungilizya kuba basikutobela Kristo. Ncinzi ncomukonzya kwiiya kumakani aaya? Inga cainda kubota kuti twacita oobo andiswe. Tulakonzya kubaambila zintu zimwi banamukwasyi akubapa coolwe cakujana kasimpe kamu Bbaibbele alimwi akuzyiba basyomima. Nokuba boobo, tulalulemeka lwaanguluko lwakulisalila zyakucita ndobajisi alimwi akutantamuka kubasinikizya. Kutondezya mbotukonzya kubagwasya banamukwasyi, amulange-lange cikozyanyo caba Jürgen aba Petra, banabukwetene baku Germany.

Ba Petra bakaiya Bbaibbele a Bakamboni ba Jehova alimwi mukuya kwaciindi bakabbapatizyigwa. Balumi babo ba Jürgen, bakali beendelezi babasikalumamba. Kumatalikilo, ba Jürgen tiibakakkomene akusala kwabakaintu babo. Pele mukuya kwaciindi bakabona kuti Bakamboni bakambauka kasimpe kamu Bbaibbele. Abalo bakaaba buumi bwabo kuli Jehova, alimwi mazuba aano mbaalu mumbungano. Ino ndulayo nzi ndobapa kujatikizya kumusika amoyo munamukwasyi uunjila cikombelo cimbi?

Ba Jürgen bakaamba kuti: “Tatweelede kubasinikizya akubaambila makani manji aakumuuya banamukwasyi. Kucita boobo inga capa kuti batakulwaizyigwi. Mukuya kwaciindi inga cabota kuti cabupampu katubaambila buyo zintu zisyoonto ciindi aciindi. Inga cagwasya alimwi kuti banamukwasyi bazyibana abakwesu ibamusela wabo alimwi ibayanda zintu nzyobayanda abalo. Kucita boobo kulakonzya kujalula nzila yakubasika amoyo.”

Mwaapostolo Petro alimwi abasazinyina Korneliyo bakabweza ntaamu cakufwambaana kumulumbe wamu Bbaibbele. Bamwi mumwaanda wamyaka wakusaanguna ibakajana kasimpe bakali kuyandika ciindi cinji kutegwa basale cakucita.

Basazinyina Jesu ibali mbobabede bakatondezya lusyomo mulinguwe ciindi naakali mumulimo wakwe wakubuleya. Mucikozyanyo, kulibonya kuti baapostolo mbuli Jakobo alimwi a Johane bakali beeninyina Jesu alimwi akuti banyina, ba Salome bakali banabokwabo abanyina Jesu. Ambweni ba Salome bakali akati ‘kabamakaintu banji aabo ibakali kubakutaukila kwiinda mukubelesya lubono lwabo.’—Lk. 8:1-3.

Nokuba boobo, banamukwasyi bamwi ba Jesu tiibakatondezya lusyomo mpoonya-mpoonya. Mucikozyanyo, ciindi cimwi nokwakainda mwaka omwe kuzwa naakabbapatizyigwa Jesu, makamu aabantu akabungana muŋanda kutegwa bamuswiilile. “Pele bamukwasyi nobakamvwa zyakali kucitika, bakaunka kuyoomujata, nkaambo bakali kwaamba kuti: ‘Wasondoka.’” Nokwakainda ciindi banabokwabo Jesu nobakamubuzya kujatikizya lweendo lwakwe, tanaakabaingula cacigaminina. Ino nkaambo nzi? Akaambo kakuti “banabokwabo tiibakali kumusyoma.”—Mk. 3:21; Joh. 7:5.

Ncinzi ncotukonzya kwiiya kuli Jesu kujatikizya mbwaakabalanganya banamukwasyi? Tanaakanyema  ciindi bamwi nobakali kwaamba kuti wasondoka. Noliba leelyo naakajaigwa alimwi anaakabusyigwa, Jesu wakabakulwaizya alimwi banamukwasyi kwiinda mukulibonya kuli Jakobo mwanookwabo. Kulangilwa kuti kulibonya ooku kwakamugwasya Jakobo alimwi abanabokwabo Jesu bambi kusyoma kuti wakali Mesiya. Aboobo, bakali antoomwe abaapostolo alimwi abamwi muŋanda yamujulu mu Jerusalemu alimwi kulibonya kuti bakatambula muuya uusalala. Mukuya kwaciindi, Jakobo alimwi a Juda, banabokwabo Jesu bambi, bakalongezyegwa kapati.—Mil. 1:12-14; 2:1-4; 1 Ko. 15:7.

Mbubwenya mbocakabede mumwaanda wamyaka wakusaanguna, banamukwasyi bamwi bayandika ciindi cili mbocibede kabatananjila munzila iitola kubuumi. Amubone cikozyanyo caba Roswitha, balo ibakali basungu mucikombelo ca Katolika ciindi balumi babo nobakabbapatizyigwa kuba Bakamboni ba Jehova mu 1978. Kumatalikilo akaambo kazintu nzyobakali kusyoma kapati, ba Roswitha bakali kubakazya balumi babo. Pele nokwakainda myaka, kukazya kwabo kwakamana alimwi bakazikubona kuti Bakamboni bayiisya kasimpe. Mumwaka wa 2003 bakabbapatizyigwa abalo. Ino ncinzi cakabagwasya kutegwa bacince? Muciindi cakunyema nobakali kukazyigwa, balumi babo bakali kupa coolwe kuli ba Roswitha cakucinca mizeezo. Ino ndulayo nzi ba Roswitha ndobapa? Bakaamba kuti: “Kuzumanana kukkazika moyo kulakonzya kugwasya kapati.”

Ba Monika bakabbapatizyigwa mumwaka wa 1974, alimwi bana babo basankwa bobilo bakaba Bakamboni nokwakainda myaka iibalilwa kukkumi. Nokuba kuti balumi babo ba Hans tiibakali kukazya nzyobakali kusyoma, balo bakabbapatizyigwa mu 2006. Kwiinda muzintu izyakabacitikila, ino ndulayo nzi banamukwasyi ndobapa? Bakati: “Amukakatile cakusyomeka kuli Jehova, alimwi tamweelede kuubya-ubya lusyomo.” Nokuba boobo, cakali kuyandika lyoonse kubatondezya luyando ba Hans. Alimwi bakazumanana kulangila kuti mukuya kwaciindi bayakutalika kusyoma nzyobasyoma.

Ciindi cimwi Jesu wakapandulula mulumbe wakasimpe kuti uli mbuli maanzi aapa buumi butamani. (Joh. 4:13, 14) Tuyanda kuti banamukwasyi bakatalusyigwe kwiinda mukunywa maanzi mabotu aakasimpe. Masimpe inga tiitwayanda kuti batingwe akaambo kakuti basungilizyigwa kunywa maanzi manji cakufwambaana. Kutegwa bakatalusyigwe naa kutingwa, ciyeeme ambotubapanduluda kasimpe. Bbaibbele lyaamba kuti: “Moyo wamululami ulayeeya kabotu mbweelede kuvuwa” alimwi akuti “moyo wamusongo ulasongwaazya milomo yakwe, alimwi ulayungizya luzibo kukwaamba kwakwe.” Ino inga twalubelesya buti lulayo oolu?—Tus. 15:28; 16:23.

Mukaintu ulakonzya kuyanda kupandulwida mulumaakwe nzyasyoma. Kuti ‘wayeeya kabotu mbweelede kuvuwa,’ ulakonzya kusala kabotu mabala akutaamba cakubinda. Teelede kutondezya mbuli kuti uliluleme naa kumwiinda mulumi. Kusala kabotu mabala ngaamba kulakonzya kukatalusya alimwi akupa kuti kube luumuno. Ndilili mulumaakwe nalikwayide naa nocili cuuba-uba kumusikila? Ino makani aamusyobo nzi ngayandisya kubandika naa kubala? Sena ulabikkila maano makani aamba zyasayansi, twaambo twacisi naa zisobano? Ino inga wabusya buti luyandisisyo lwakwiiya Bbaibbele kumwi kalemeka mbwalimvwa mulumi alimwi amizeezo yakwe? Kuyeeya munzila eeyi kuyakumugwasya mukaintu kwaamba alimwi akucita zintu cabusongo.

Kubasika amoyo banamukwasyi ibatali Bakamboni takubikkilizyi buyo kupandulula nzyotusyoma mubufwaafwi. Nzyotwaamba zyeelede kutondezyegwa mukulilemeka kabotu.

Ba Jürgen ibaambidwe musyule oomu, bakaamba kuti: “Amuzumanane kubelesya njiisyo zyamu Bbaibbele abuzuba. Eeyo njenzila iigwasya munamukwasyi kubikkila maano, nokuba kuti takonzyi kutambula zinji.” Ba Hans ibakabbapatizyigwa myaka iinda ku 30 kuzwa bakaintu babo nobakabbapatizyigwa balakazumina kaambo aaka. Bakaamba kuti: “Kulilemeka kabotu mbuli Banakristo kulayandika, kutegwa munamukwasyi abone mbokakonzya kumugwasya kasimpe mubuumi bwakwe.” Banamukwasyi beelede kubona kuti lusyomo lwesu lulatwiindanya abantu bamwi, munzila iigwasya kutali iityompya.

Mwaapostolo Petro wakapa lulayo lugwasya kubamakaintu ibajisi bamaalumi ibatali basyominyina lwakuti: “Amulibombye kubalumi banu, ikutegwa naa kuli bataliswiilili ijwi, bakonzye kukwelelezyegwa kakunyina kubelesya jwi pele kwiinda mubukkale bwabakaintu babo, akaambo kakulibonena bukkale bwanu busalala antoomwe akuba abulemu kapati. Kulisakatizya kwanu kutabi buyo kwaatala—kwakuluka masusu  akusama zintu zyangolida naa zisani zidula kapati—pele akube kulisakatizya kwamuntu wamukati kamoyo uusamide cisani citanyonyooki camoyo uukkede alimwi mubombe, ooyo uuyandika kapati mumeso aa Leza.”—1 Pe. 3:1-4.

Petro wakalemba kuti mwaalumi ulakonzya kujatikizyigwa acikozyanyo cibotu camukaintu wakwe. Kwiinda mukuyeeya njiisyo eeyi yamu Magwalo, mucizyi umwi wazina lya Christa, wali kusolekesya kubasika amoyo balumi bakwe kwiinda mukulilemeka kwakwe kuzwa naakabbapatizyigwa mu 1972. Nokuba kuti balumi bakwe ciindi cimwi bakali kwiiya a Bakamboni, tabanakatambula kasimpe kuti kabe kabo. Balajanika kumiswaangano imwi ya Bunakristo alimwi akuzyibana kabotu abantu mumbungano. Ba Christa abalo balazilemeka nguzu zyakulisalila nzyobajisi balumi babo. Ino basoleka buti kubasika amoyo?

Ba Christa bakaamba kuti: “Ndilikanzide kukakatila kunzila Jehova njayanda kuti nditole. Kulubazu lumwi, ndilasola kukwelelezya balumi bangu ‘kakunyina kubelesya jwi’ kwiinda mukulilemeka kwangu kubotu. Ciindi njiisyo zyamu Bbaibbele nozitasotokwi ndilasolekesya kucita zyoonse nzyobayanda. Kunze lyaboobo, ndilalulemeka lwaanguluko lwabo lwakulisalila zyakucita alimwi akusiya makani mumaanza aa Jehova.”

Nzila njobabelesya ba Christa itondezya mbociyandika kunyoneka. Balazumanana kuba abubambe bubotu bwakucita zintu zyakumuuya, kubikkilizya akujanika kumiswaangano lyoonse alimwi akusungwaala mumulimo wa Bunakristo wakukambauka. Pele balatondezya kumvwisya, alimwi balizyi kuti ngobakwetene limwi weelede kuyandwa, kujana ciindi cakubandika anguwe alimwi akubikkilwa maano. Kunyoneka alimwi akumvwisya ncintu ciyandika kulindiswe toonse notujisi banamukwasyi ibatali basyomima. Bbaibbele lyaamba kuti: “Zintu zyoonse zilijisi ciindi cazyo.” Eeci cilabikkilizya aciindi cakuba abanamukwasyi, kwaambisya mbotukwetene limwi, balo ibatali basyomima. Ciindi ncotuba ambabo cipa kuti kube kubandika. Kweelana azintu zicitika kubandika kabotu kucesya kulimvwa kulendelelwa, kutalekelezyegwa naa kuba abuzuba.—Muk. 3:1

Ba Holger ibajisi bausyi ibakabbapatizyigwa nokwakainda myaka iili 20 kuzwa ciindi banamukwasyi wabo nobakabbapatizyigwa bakaamba kuti: “Cilayandika kutondezya luyando alimwi akumupailila munamukwasyi uutali musyomima.” Ba Christa bakayungizya kwaamba kuti ‘balazumanana kulangila kuti balumi babo bayakuba kulubazu lwa Jehova akukatambula kasimpe.’ Bube mbotutondezya kuli banamukwasyi ibatali basyomima bweelede kuba bube bubotu alimwi akuba abulangizi.

Makanze eesu ngakuzumanana kuba acilongwe ambabo, kubapa coolwe cakuti bakazyibe kasimpe alimwi akubasika amoyo amulumbe wamu Bbaibbele. Alimwi muzintu zyoonse tweelede kuba “amoyo mubombe alimwi abulemu kapati.”—1 Pe. 3:15.