1, 2. (a) Ino nguni kamboni wa Jehova wiinda boonse? (b) Ino izina lyakuti Jesu lyaamba nzi, alimwi mbuti Mwana wa Leza mbwaakapona kweelana ancolyaamba izina lyakwe?

“EECI ncindakazyalilwa alimwi ncindakaboolela munyika, ikuti ndilungulule kasimpe.” (Amubale Johane 18:33-37.) Ciindi naakali kubetekwa, Jesu Kristo wakaamba majwi aaya kumweendelezi muna Roma waku Judaya. Jesu wakazwide akuliyubununa kuti mwami. Myaka yakatobela, mwaapostolo Paulo wakaaamba citondezyo ca Jesu eeci icikulwaizya, “kali kamboni wakalyaambilila kabotu antangalala kumbele lya Pontiyo Pilato.” (1 Ti. 6:13) Masimpe, kuba “kamboni uusyomeka alimwi wamasimpe,” munyika ya Saatani iizwide bubi, inga cayandika kuba basicamba.—Ciy. 3:14.

² Mbwaanga wakali mu Juda, Jesu wakazyalwa kali kamboni wa Jehova. (Is. 43:10) Masimpe, wakazikuba kamboni wa Leza mupati iwiiminina izina lyakwe. Jesu wakali kubikkila maano kapati kuli ncolyaamba izina lyakwe ndyaakapegwa a Leza. Ciindi mungelo naakaambila bausyi Jesu bakujana ba Josefa kuti ncaakamitide Mariya cakali camuuya uusalala, mungelo wakayungizya kuti: “Uyoozyala mwana musankwa alimwi weelede kumuulika zyina lyakuti Jesu, nkaambo uyoofwutula bantu bakwe kuzibi zyabo.” (Mt. 1:20, 21) Basikwiiya zyamu Bbaibbele balazumina kuti izina lyakuti Jesu lizwa kubbala lya Chihebrayo lyakuti Jeshua, alimwi lyaamba kuti: “Jehova Ndufwutuko.” Kweelana ancolyaamba zina lyakwe, Jesu wakagwasya “mbelele zisweekede zyamukowa  waba-Israyeli” kuti beempwe kuzibi zyabo kutegwa bakkomaninwe a Jehova alimwi. (Mt. 10:6; 15:24; Lk. 19:10) Akaambo kaceeci, Jesu wakali musungu kupa bumboni bujatikizya Bwami bwa Leza. Sikulemba Makani Mabotu Maako wakaamba kuti: “Jesu wakaunka ku Galilaya kakambauka makani mabotu aa Leza kati: ‘Ciindi cibikkidwe cazuzikizyigwa, alimwi Bwami bwa Leza bwaswena. Amweempwe alimwi amube alusyomo mumakani mabotu.’” (Mk. 1:14, 15) Alimwi cabusicamba, Jesu wakasinganya basololi bacikombelo caba Juda, calo cakapa kuti bamujaye acisamu.—Mk. 11:17, 18; 15:1-15.

3. Ncinzi cakacitika mubuzuba bwatatu kuzwa ciindi naakabusyigwa Jesu?

³ Masimpe, milimo yakwe ilagambya! Mubuzuba bwatatu kuzwa ciindi Jesu naakajaigwa calunya, Jehova wakamubusya, kutali mbuli muntu, pele mbuli cilenge camuuya citafwi. (1 Pe. 3:18) Kusinizya kaambo aaka, Mwami Jesu wakasama mubili wabuntu alimwi akupa bumboni bwakuti wabusyigwa. Mubuzuba mbubwenya mbwaakabusyigwa, wakalibonya kuli basikwiiya bakwe ziindi zyosanwe.—Mt. 28:8-10; Lk. 24:13-16, 30-36; Joh. 20:11-18.

4. Muswaangano nzi Jesu ngwaakacita mubuzuba mbwaakabusyigwa, alimwi ncinzi ncaakabaambila kucita basikwiiya bakwe?

⁴ Ciindi casanu Jesu naakalibonya wakayanda kuti alibonye kuli basikwiiya bakwe alimwi akubantu bamwi buyo ibakabungene ambabo. Aciindi eeco citalubiki, wakayiisya Jwi lya Leza. “Wakajalula mizeezo yabo kutegwa bamvwisye ncaamba Magwalo.” Eeci cakapa kuti bazyibe kuti kujaigwa abasinkondonyina Leza alimwi akubusyigwa munzila yamaleele, zyakalaambidwe kale mu Magwalo. Kumamanino aamuswaangano ooyu iwakacitika mubuzuba naakabusyigwa, Jesu wakabaambila basikumuswiilila cakutainda mumbali ncobakeelede kucita. Wakabaambila kuti “kwiinda muzyina lyakwe, kweempwa kutegwa zibi zilekelelwe kwakali kuyookambaukwa muzisi zyoonse—kutalikila mu Jelusalemu.” Wakayungizya kuti: “Muyooba bakamboni bazyintu eezyi.”—Lk. 24:44-48.

5, 6. (a) Nkaambo nzi Jesu ncaakaambila kuti: “Muyooba bakamboni bangu”? (b) Ncibeela nzi cipya camakanze aa Jehova ncobakali kuyakuzyibya basikwiiya ba Jesu?

⁵ Aboobo, nokwakainda mazuba aali 40 kuzwa naakalibonya kamamanino, baapostolo bakwe kweelede kuti bakamvwisya ncaakali kwaamba malailile aakwe aajisi nguzu aakuti: “Muyooba bakamboni bangu mu Jelusalemu, mu Judaya moonse amu Samaliya, alimwi mane akusikila kumagolelo aanyika.” (Mil. 1:8) Nkaambo nzi Jesu ncaakaambila kuti: “Muyooba bakamboni bangu,” kutali iba Jehova? Jesu wakali kukonzya kwaamba kuti bayooba bakamboni ba Jehova, pele bantu mbaakali kwaambila bakali bana Israyeli ibakali kale bakamboni ba Jehova.

⁶ Lino basikwiiya ba Jesu bakeelede kwaambilizya cibeela cipya camakanze aa Jehova—cintu cipati ciinda akufwutulwa kwabana Israyeli kuzwa mubuzike mu Egepita alimwi akumbele kuzwa kuli bana Babuloni. Lufwu abubuke bwa Jesu Kristo bwakapa kuti kube kwaanguluka kuzwa kucintu cakali cibi kapati, nkokuti cibi alufwu. Mu Pentekoste 33 C.E., basikwiiya ba Jesu bananike bapya bakazyibya bantu “milimo mipati ya Leza,” alimwi banji ibakali kuswiilila bakazitobela nzyobakamvwa. Aboobo, kuzwa kujanza lyalulyo lya ba Usyi kujulu, Jesu wakatalika kubona izina lyakwe mbolyakaba ampindu kapati kubantu banji ibakeempwa akuba aalusyomo mulinguwe mbwali nenzila ya Jehova yakufwutula bantu.—Mil. 2:5, 11, 37-41.

7. Ino zintu zyakacitika mu Pentekoste 33 C.E zyakatondezya nzi?

⁷ Zintu zyakacitika mubuzuba bwa Pentekoste mu 33 C.E. zyakatondezya kuti Jehova  wakaitambula mpindu yacituuzyo camubili wa Jesu uulondokede kuba cakumanya milandu naa kuvwumba cibi. (Heb. 9:11, 12, 24) Kweelana ambwaakaamba Jesu, tanaakaboola “kuzyoobelekelwa, pele kuzyoobeleka, akupa buumi bwakwe ikuba cinunuzyo cabanji.” (Mt. 20:28) “Banji” ibakali kuyakugwasyigwa acinunuzyo ca Jesu tiibakali buyo ba Juda ibakali kuyakweempwa. Muciindi caboobo, nkuyanda kwa Leza kuti “bantu boonse bafwutulwe” mbwaanga cinunuzyo “ncocigwisya zibi zyanyika!”—1 Ti. 2:4-6; Joh. 1:29.

8. Ino bwakayaambele kusikila aali bumboni mbobakapa basikwiiya ba Jesu, alimwi ino eeci cakakonzyeka buti?

⁸ Sena basikwiiya ba Jesu bakusaanguna aabo bakalijisi busicamba buyandika kutegwa bazumanane kupa bumboni bujatikizya nguwe? Masimpe bakacita oobo, pele tiibakacita kwiinda munguzu zyabo beni. Nguzu zyamuuya uusalala wa Jehova zyakabakulwaizya akubapa nguzu kuti bazumanane kupa bumboni. (Amubale Milimo 5:30-32.) Nokwakainda myaka iili 27 kuzwa nowakainda mwaka wa Pentekoste 33 C.E., cakali kukonzya kwaambwa kuti “mulumbe wakasimpe kamakani mabotu” wakabasikila ba Juda a Bamasi ‘muzilenge zyoonse zili ansi aajulu.’—Kol. 1:5, 23.

9. Mbubwenya mbokwakaambidwe, ncinzi cakacitika kumbungano ya Bunakristo yakusaanguna?

⁹ Nokuba boobo, cuusisya ncakuti mbungano ya Bunakristo yakusaanguna asyoonto-syoonto yakatalika kunyongana. (Mil. 20:29, 30; 2 Pe. 2:2, 3; Jud. 3, 4) Kweelana ambwaakatondezya Jesu, luleyo lwalo ilwakali kukulwaizyigwa ‘amubi,’ Saatani, lwakali kuyakuvwula akusinkila Bunakristo bwakasimpe kusikila “kumamanino aabweende bwazyintu.” (Mt. 13:37-43) Mpoonya Jehova wakali kuyakubikka Jesu kuba Mwami wanyika yoonse. Eeci cakacitika mu October 1914, aaya akali matalikilo ‘aamazuba aamamanino’ aabweende bwa Saatani bubyaabi.—2 Ti. 3:1.

10. (a) Ino mwaka nzi Banakristo bananike bamazuba aano ngobakali kwaamba? (b) Ncinzi cakacitika mu October 1914, alimwi mbuti eeco mbocakaba bumboni bulibonya?

¹⁰ Banakristo bananike bamazuba aano bakaambila limwi kuti mu October 1914 cakali kuyakuba ciindi caalubazu. Nzyobakali kwaamba zyakayeeme abusinsimi bwa Daniele bujatikizya cisamu cipati icakagonkwa alimwi icakali kuyakukomena kwaakwiinda “myaka iili musanu aibili.” (Dan. 4:16) Jesu wakali kwaamba ciindi ncimunya eeci kuti “ciindi cibikkidwe cabamasi” mubusinsimi  bwakwe bujatikizya kubako kwakwe kwakumbele alimwi “acamamanino aabweende bwazyintu.” Kuzwa ciindi nowakatalika mwaka wa 1914, ‘citondezyo cakubako kwa Kristo’ mbuli Mwami mupya wanyika cilalibonya caantangalala kubantu boonse. (Mt. 24:3, 7, 14; Lk. 21:24) Aboobo, kuzwa leelyo, “milimo mipati ya Leza” ilabikkilizya akubikkwa kwa Jesu acuuno cabwami kuba Mwami wabantu aanyika.

11, 12. (a) Ncinzi Mwami wanyika mupya ncaakatalika kucita mumwaka wa 1919 iwakatobela kuzwa nkondo noyakamana? (b) Mbumboni nzi bumbi bwakalibonya akati-kati kamyaka yamuma 1930 kuyakumbele? (Amubone cifwanikiso icili kumatalikilo aacibalo.)

¹¹ Mbwali Mwami mupya wanyika, Jesu Kristo wakatalika kufwutula basikumutobela bananike kuzwa mubuzike bwa “Babuloni Mupati.” (Ciy. 18:2, 4) Mwaka wa 1919 iwakatobela kuzwa nkondo noyakamana, wakapa kuti kube zyoolwe zyakupa bumboni nyika yoonse kujatikizya nzila Leza njaabelesya yakufwutula bantu alimwi amulumbe mubotu uujatikizya kutalisyigwa kwa Bwami. Banakristo bananike bakacibona kuti ncoolwe cakupa bumboni calo cakapa kuti bananike banji babunganizyigwe kuba basikukonanyina ba Kristo.

¹² Kuzwa akati-kati kamyaka yamuma 1930 kuyakumbele, cakalibonya kuti Kristo wakalitalikide kubunganya mamiliyoni ‘aambelele zimbi,’ alo aakali kuyakupanga ‘nkamu mpati’ yabantu bazwa muzisi zyoonse. Kwiinda mukusololelwa a Banakristo bananike, eeyi nkamu mpati ayalo ilatobela cikozyanyo ca Jesu cakuba sicamba alimwi caantangalala balatondezya kuti lufwutuko lwabo luzwa kuli Leza akuli Kristo. Kwiinda mukuliyumya mumulimo ooyu wabukamboni alimwi akuzumanana kutondezya lusyomo mucinunuzyo ca Kristo, aaba bayakuba acoolwe cakufwutuka ‘kumapenzi mapati,’ calo caamba kunyonyoonwa kwanyika ya Saatani.—Joh. 10:16; Ciy. 7:9, 10, 14.

13. Mbotuli Bakamboni ba Jehova, ino tukanzide kucita nzi, alimwi mbuti mbotukonzya kuba masimpe kuti inga twazwidilila?

¹³ Atuzumanane kucibikkila maano coolwe cakuba Bakamboni ‘bamilimo mipati’ njaacita Jehova Leza alimwi azisyomezyo zyakwe zyakumbele. Masimpe, kupa bumboni buli boobo talili lyoonse nocili cuubauba pe. Bakwesu banji babelekela muzilawo mwalo imuli bantu batabikkili maano, bafwubaazya, naa basikupenzya. Tulakonzya kucita mbubwenya mbwaakacita mwaapostolo Paulo abeenzinyina. Paulo wakati: “Leza wakatupa busicamba bwakuti tumwaambile makani mabotu aa Leza nokuba kuti twakali kukazyigwa kapati.” (1 Te. 2:2) Aboobo, tutaleki pe. Muciindi caboobo, atukanze kusyomeka kweelana akulyaaba kwesu mbotubwene kuti bweende bwa Saatani buyaabuya kulunyonyooko. (Is. 6:11) Tatukonzyi kucita oobo munguzu zyesu tobeni, pele tweelede kutobela cikozyanyo ca Banakristo bakusaanguna kwiinda mukupaila kutegwa Jehova kwiinda  mumuuya wakwe atupe “nguzu zigambya iziinda zyabantu.” —Amubale 2 Bakolinto 4:1, 7; Lk. 11:13.

14, 15. (a) Ino Banakristo bamumwaanda wamyaka wakusaanguna C.E. bakali kubonwa buti, alimwi ncinzi ncaakaamba mwaapostolo Petro kujatikizya mbabo? (b) Ino tweelede kulimvwa buti ikuti twapenzyegwa akaambo kakuba Bakamboni ba Jehova?

¹⁴ Mazuba aano, mamiliyoni aabantu balakonzya kulyaamba kuba Banakristo, ‘pele balamukaka Leza kwiinda mumilimo yabo, nkaambo balasesemya alimwi tabaswiilili eelyo tabeeleli kucita mulimo mubotu uuli woonse.’ (Tit. 1:16) Cilagwasya kuzyiba kuti mumwaanda wamyaka wakusaanguna, Banakristo beni-beni bakali kuzondwa abantu banji. Nkakaambo kaako mwaapostolo Petro wakalemba kuti: “Ikuti naa kamusampaulwa akaambo kazyina lya Kilisito, mulakkomana, nkaambo . . . imuuya wa Leza, uli alindinywe.”—1 Pe. 4:14.

¹⁵ Sena majwi aaya aakasololelwa amuuya uusalala alakonzya kubeleka kuli Bakamboni ba Jehova mazuba aano? Inzya, nkaambo tulapa bumboni kujatikizya bwami bwa Jesu. Aboobo, kuzondwa abantu akaambo kakwiitwa azina lya Jehova cili mbuli ‘kusampaulwa akaambo kazyina lya Jesu Kilisito,’ walo wakaambila basikumukazya kuti: “Ndaboola muzyina lya Taata, pele tiimwanditambula pe.” (Joh. 5:43) Aboobo, ikuti bakamukazye ciindi ciboola mumulimo wanu wakukambauka, amukabe basicamba. Kupenzyegwa kuli boobo kutondezya kuti Leza ulamukkomanina alimwi akuti muuya wakwe “uli alindinywe.”

16, 17. (a) Ino zintu nzi zibapa kukkomana bantu ba Jehova mumasena manji munyika? (b) Ino mujisi makanze nzi?

¹⁶ Aciindi ncimunya, mutalubi kuti kuli kuyaambele kubotu alimwi kukondelezya mumasena manji munyika. Nomuba muzilawo mowakasika kale mulumbe wamakani mabotu, kucili bantu bayanda kuswiilila alimwi mbotukonzya kubandika limwi kujatikizya mulumbe wesu mubotu walufwutuko. Atupilukile kubantu bakatondezya luyandisisyo alimwi akutalisya ziiyo zya Bbaibbele ikuti kacikonzyeka, kubagwasya kuti bakomene kumuuya kusikila bakalyaabe akubbapatizyigwa. Cakutadooneka, andinywe mulimvwa mbuli mbobakalimvwa ba Sarie bakucisi ca South Africa, balo ibali basungu mumulimo wakukambauka kwamyaka iinda ku 60. Bakaamba kuti: “Ndilalumba kapati kuzwa ansi aamoyo kwiinda mucinunuzyo ca Jesu, ndilakonzya kukkomana ikuba aacilongwe a Jehova, Mwami mupati wabubumbo boonse, alimwi ndilikkomene kuzyibya izina lyakwe lili abulemu.” Balo abalumi babo ba Martinus, bagwasya bantu banji, kubikkilizya abana babo botatwe, kuba bakombi ba Jehova. Ba Sarie bakayungizya kwaamba kuti: “Taakwe mulimo uumbi uupa kukkutila , alimwi kwiinda mumuuya wakwe uusalala, Jehova watupa nguzu nzyotuyandika kuti tuzumanane amulimo ooyu uuyakufwutula buumi bwabantu.”

¹⁷ Kufwumbwa naa tuli Banakristo babbapatizyidwe naa tuyanda kuyakuzuzikizya mbaakani eeyi, tulijisi twaambo tulimvwisya ncotweelede kulumba akaambo kacoolwe cakuyanzana ambungano ya Bakamboni ba Jehova nyika yoonse mbwiizulwa. Aboobo, amuzumanane kupa bukamboni cakulomya ciindi nomubeleka canguzu kutegwa muzumanane kusalala munyika ya Saatani iisofweede. Mukucita boobo, muyakupa kuti Taateesu wakujulu, uujisi izina lyabulemu ndyotwiitwa alyalo, alemekwe.