Sena cakamukkomanisya kubala mamagazini aa Ngazi Yamulindizi aalino-lino? Amubone naa inga mwayiingula mibuzyo eeyi iitobela:

Sena cileelela ku Banakristo kuumpa mutunta wamuntu?

Aaya makani aakulisalila. Nokuba kuti kunyina Bbaibbele mpolyaamba cacigaminina kujatikizya makani aaya, cilakonzya kugwasya kuzyiba kuti Mwami Saulo amwanaakwe Jonatani mitunta yabo yakaumpwa mpoonya akuzikkwa. (1Sam. 31:2, 8-13)—6/15, peeji 7.

Mbuti mbotukonzya kusinizya kuti Leza talinguwe uupa kuti zintu zibi kazicitika?

Leza uliluleme munzila zyakwe zyoonse. Mululami, uliluzi alimwi ulasyomeka. Jehova ngusilubomba alimwi ngusiluse. (Dt. 32:4; Int. 145:17; Jak. 5:11)—7/1, peeji 4.

Mbuyumuyumu nzi umwi mbwakonzya kujana ciindi naalongela kucisi cimbi kuyakubelekela kubusena bubulide basikumwaya?

Kuli buyumuyumu botatwe: (1) kuzyibila bukkale bwakubusena oobo, (2) kuyeeya kuŋanda, alimwi (3) kuzyibilana abantu alimwi akujana balongwe. Banji ibacikonzya kulwana buyumuyumu oobu bajana zilongezyo zinji kapati.—7/15, mapeeji 4-5.

Ino nkaambo nzi banabokwabo Josefa ncobakamubukila?

Kaambo kamwi nkakuti, Jakobo wakali kumuyanda kapati Josefa, cakuti wakamupa jansi lilibedelede. Banabokwabo Josefa bakamufwida munyono alimwi akumusambala mubuzike.—8/1, mapeeji 11-13.

Nkaambo nzi matulakiti mapya ncaatakatazyi kubelesya alimwi ncaagwasya?

Oonse abambidwe munzila yomwe. Katulakiti kamwi akamwi kakulwaizya kubelesya Bbaibbele alimwi kajisi mubuzyo ngomukonzya kubuzya mwini ŋanda. Kufwumbwa bwiinguzi mbwaapa, tulakonzya kukajalula akumutondezya ncolyaamba Bbaibbele. Alimwi tulakonzya kumutondezya mubuzyo ngotukonzya kuyakwiingula mulweendo lwakupilukila.—8/15, mapeeji 13-14.

Ino Syriac Peshitta ncinzi?

Ci Syriac, imwaambo umwi iwakakozyene amwaambo waci Aramaic, wakali kubelesyegwa abantu banji mumwaanda wamyaka wabili naa watatu C.E. Kuboneka kuti zibeela zimwi zya Magwalo aa Banakristo aa Chigiriki zyakasaanguna kusandululwa mumwaambo waci Syriac. Bbaibbele lyamuci Syriac lyakazyikwiitwa kuti Peshitta.—9/1, mapeeji 13-14.

Ncinzi bazyali Banakristo ncobakonzya kucita kutegwa bacikonzye kweembela bana babo?

Cilayandika kapati kubaswiilila bana kutegwa mucikonzye kubazyiba. Amusolekesye kubasanina kumuuya. Amubasololele caluyando, mucikozyanyo, ciindi nobazidooneka nzyomusyoma.—9/15, mapeeji 18-21.

Nzintu nzi zitakabiko mu Bwami bwa Leza?

Kuciswa, lufwu, kubula mulimo, nkondo, kubula cakulya, alimwi abucete tazikabiko.—10/1, mapeeji 6-7.

Ncizuminano nzi cijanika mu Bbaibbele cipa bamwi coolwe cakuyakulela antoomwe a Kristo?

Naakatalisya Mulalilo wa Mwami, Jesu wakapanga cizuminano abasikwiiya bakwe basyomeka, cizuminano kanji-kanji iciitwa kuti cizuminano ca Bwami. (Lk. 22:28-30) Cakabapa bulangizi bwakuyakuba basikulelanyina Jesu kujulu.—10/15, mapeeji 16-17.

Amupe zikozyanyo zyobilo zisinizya kuti Saatani nkwali ncobeni.

Magwalo aamba kuti Saatani wakabandika a Jesu ciindi naakali kumusunka. Alimwi amumazuba aa Jobu, Saatani wakabandika a Leza. Zibalo eezyi zisinizya kuti Saatani muntu mwini-mwini.—11/1, mapeeji 4-5.

Kweelana alugwalo lwa Milimo 15:14, ino “bantu bazina lyakwe” mbaakaamba Jakobo bakali bani?

Bakali ba Juda alimwi abamasi ibakali kusyoma balo Leza mbaakasala kuba musyobo uusalidwe kutegwa ‘baambilizye koonse-koonse bulemu’ bwayooyo wakabaita. (1Pet. 2:9, 10)—11/15, mapeeji 24-25.

Ino dolopo lya Timgad lyakali mucisi nzi, alimwi mbube nzi bantu bamwi bamudolopo eeli mbobakajisi?

Timgad lyakali dolopo lipati lyabana Roma ilyakali Kunyika aa Africa (mucisi ciitwa kuti Algeria mazuba aano). Kutondezya bantu bamwi ibakali kukkala mubusena oobu nzyobakali kusyoma, malembe amwi aakavwukkulwa aamba kuti: “Kuvwima, Kusamba, Kusobana, Kuseka—Oobu Mbobuumi!” Twaambo ootu tulikozyene acaambwa kulugwalo lwa 1 Bakorinto 15:32.—12/1, mapeeji 8-10.