KULIDA antoomwe cakulya cakumuuya aatebulu lya Jehova cali cintu cikkomanisya kuzwa kaindi. Ciindi bantu ba Leza nobaswaangana kutegwa balye pobwe lyakumuuya, kwaabana cakulya cakumubili akwalo kulakkomanisya.

Mu September 1919, Basikwiiya Bbaibbele bakajisi muswaangano wacooko wamazuba aali lusele ku Cedar Point, Ohio, mu U.S.A. Basimuswaangano bakeelede kukkala akulya Mumahotela, pele bantu ibakasika bakali banji kwiinda bakali kulangilwa kuti inga basika. Akaambo kakuvwula kwabantu ibakasika, basikwaabila zyakulya bakabelekela antoomwe. Mweendelezi wakafiteliya wakabuzya naa basimuswaangano bakubusi bakali kukonzya kugwasyilizya, ibanji bakalyaaba kuti bagwasyilizye. Ba Sadie Green bakali bamwi babaabo. Bakati: “Mebo cakali ciindi cakusaanguna kwaabanya zyakulya, pele cakali ciindi cikkomanisya.”

Mumyaka yakatobela, bubambe bwakafiteliya lyamiswaangano yacooko bwakapa kuti basikulisungula banji bakonzye kukutaukila bakwesu abacizyi calukkomano. Kubeleka abasyominyina alimwi kwakapa kuti bakubusi banji balibikkile mbaakani zyakumuuya. Ba Gladys Bolton bakabeleka mukafiteliya lyamuswaangano wacooko mu 1937. Bakaamba kuti: “Ndakaswaangana abantu ibakazwida mumasena ambi, alimwi ndakamvwa mbobakali kwaazunda mapenzi ngobakajisi. Cakali ciindi eeci nondakatalika kuba aamakanze aakuba mupainiya.”

Simuswaangano umwi uutegwa Beulah Covey wakati: “Kulyaaba kwababelesi kupa kuti bubambe boonse bweende kabotu.” Nokuba boobo, mulimo ooyu wakajisi buyumuyumu bumwi. Ciindi ba Angelo Manera nobakasika ku Dodger Stadium mu Los Angeles, California, mu 1969 nobakazyiba kuti bakasalwa kuba mubelesi mukafiteliya. Bakaamba kuti: “Oobu mbobuzuba mbondakagambwa mubuumi bwangu!” Kulibambila muswaangano wacooko ooyu kwakali kubikkilizya akusya mugelo uulampa mamita aali 400 mwakwiinzya paipi iyakali kutola gaasi yakujikila kuncikini!

Mu Sierra Leone mumwaka wa 1982, basikulisungula basungu bakasaanguna kusalazya myuunda mpoonya akuyaka kafiteliya kubelesya zibelesyo izyakaliko aciindi eeco. Ku Frankfurt, mucisi ca Germany, mu 1951 bakwesu basungu mukujana nzila izyakali kukonzya kubelesyegwa mukucita zintu zimwi bakabbadelela mutwe wacitima kutegwa kaukonzya kuumpa maanzi munketulo izili 40. Basikwaabila zyakulya bakali kwaabila bantu zyakulya ibasika ku 30,000 muwoola lyomwe. Kutegwa ubaubile-ubile mulimo babelesi  ibakali kubelekela mudipatimenti iyakali kusanzya mitiba, basimuswaangano bakali kuletelezya manaifi amafoloko aabo aakulisya. Mu Yangon, Myanmar, basikujika babikkila maano tiibakali kuvwuzya mpilibili muzyakulya nzyobakali kujikila basimuswaangano ibazwa kuzisi zimbi.

Ba Annie Poggensee bakalongezyegwa ciindi nobakaimvwi muzuba mumulaini wakutambwida zyakulya kukafiteliya lyamuswaangano wacooko mu United States mu 1950. Bakaamba kuti: “Ndakabikkila maano kuswiilila nzyobakali kubandika bacizyi bobilo ibakazwa ku Europe kubelesya bwato.” Boonse bobilo bakaamba mbobakagwasyigwa a Jehova kutegwa bajanike kumuswaangano. Ba Annie bakati: “Kunyina muntu wakakkomene kwiinda bacizyi aaba bobilo. Taakwe mbobakali kulimvwa kulindila kwaciindi cilamfwu amulaini kumwi kababalwa zuba.”

Lyamiswaangano yacooko mipati minji, kwakali matente mobakali kubikka matebulu malamfwu kutegwa bantu kabalya bwiimvwi, eeci cakali kupa kuti kabafwambaana kumanizya kulya akusiila bambi busena kutegwa abalo balye. Muunzila nzi imbi mobakali kukonzya kusaninwa basimuswaangano sikati? Muntu umwi iwatakali Kamboni wakati: “Eeci ncikombelo cigambya. Balalya kumwi kabaimvwi.”

Beendelezi babasikalumamba abeendelezi bamwi bamfwulumende bakali kugambwa kujatikizya bubambe mbobakali kubona alimwi ambozyakali kweendelezyegwa zintu. Nobakamana kulanga-langa kafiteliya yesu ku Yankee Stadium mu New York City, beendelezi babasikalumamba bamu United States bakakulwaizya mupati wabasikalumamba wazina lya Faulkner wamudipatimenti iilanganya zyankondo ku Britain kuti awalo alange-lange mbobakali kucita Bakamboni. Aboobo, mu 1955 walo amukaintu wakwe bakaboola ku England ku Muswaangano wacooko iwakajisi mutwe wakuti “Triumphant Kingdom” (Kuzunda kwa Bwami). Wakaamba kuti wakali kukonzya kubona kuti luyando ndolwakali kweendelezya bubambe bwakafiteliya.

Kwamyaka minji, babelesi basikulisungula caluyando bakali kwaabila zyakulya zijisi busani, zitaduli kutegwa basimuswaangano balye. Pele kanji-kanji mulimo ooyu mupati wakali kuyandika basikulisungula banji kababeleka mawoola manji alimwi akwiindwa mapulogilamu amwi naa oonse buya. Kumamanino aamuma 1970, kwakaba kuubya-ubya bubambe bwazyakulya lyamuswaangano wacooko. Mpoonya, kutalikila mu 1995, basimuswaangano bakaambilwa kunooletelezya zyakulya zyabo kumiswaangano. Eeci cakapa kuti ibakali kubeleka mulimo wakujika akwaabila zyakulya kabaswiilila pulogilamu yakumuuya akugwasyigwa akuyanzana kwa Bunakristo. *

Kweelede kuti Jehova ulabakkomanina aabo ibakali kubeleka canguzu kutegwa basanine bakombinyina! Bamwi balakonzya kulimvwa kubijilwa kuti bubambe oobu bwakamana ciindi nobayeeya mazuba aayo nobakali kubelekela mukafiteliya. Pele masimpe ngakuti: Luyando lwazumanana kweendelezya miswaangano yesu kusikila sunu.—Joh. 13:34, 35.