“Ikuti ba Kingsley kabacikonzya, andime inga ndacikonzya!”
KWIINDA mukubauma-uma agwezyo kubatondezya kuti batalike kubala, ba Kingsley batalika kubala Bbaibbele—makani aabo aakusaanguna mumbungano mu Cikolo Camulimo Weendelezyegwa a Leza. Babala kabotu kakunyina kusotoka mabala. Pele balagambya! Nkaambo nzi ncobatalangi mu Bbaibbele lyabo ciindi nobabala?
Ba Kingsley, balo ibakali kukkala ku Sri Lanka, bakali boofwu. Alimwi matwi aabo taakali kumvwisya, kunze lyaboobo bakali kweendela akacinga. Mbuti mbobakaiya kujatikizya Jehova alimwi akweelela kulembwa mu Cikolo Camulimo Weendelezyegwa a Leza? Amuleke ndimwaambile.
Ciindi cakusaanguna nondakabaswaanganya ba Kingsley, ndakakkomana kapati kubona mbobakali kuyandisya kwiiya kasimpe kamu Bbaibbele. Bakaliyiide kale Bbaibbele a Bakamboni ibali mbobabede, alimwi bbuku lyabo lyaboofwu lya Luzibo Lutola Kubuumi Butamani lyakalimanide. * Bakazumina nondakabalomba kuti tutalike kwiiya ambabo, pele kwakali buyumuyumu bobilo mbondakajana.
Buyumuyumu bwakusaanguna mbwakuti, ba Kingsley bakali kukkala abantu ibali mbobabede mumaanda mobalanganya bacembeede alimwi abalema. Akaambo kakuti mubusena oobu kwakali coongo alimwi ba Kingsley tiibakali kumvwisya, ndakeelede kutola jwi lyangu mujulu akwaamba cakupozomoka. Alimwi buya, boonse ibakali kukkala mumaanda aaya bakali kumvwa nzyotwakali kwiiya nsondo ansondo!
Buyumuyumu bwabili mbwakuti, ba Kingsley bakali kukonzya buyo kubala alimwi akumvwa buyo asyoonto makani ngotwakali kwiiya aciiyo cimwi acimwi. Kutegwa kabagwasyigwa kapati ciindi nobaiya, ba Kingsley bakali kulibambila kabotu. Kakucili ciindi, bakali kubala cakwiinduluka-induluka nzyotwakali kuyakwiiya, kulanga magwalo mu Bbaibbele lyabo lyaboofwu, mpoonya akupeta bwiinguzi bwamibuzyo. Nzila eeyi yakagwasya kapati. Notwakali kwiiya, bakali kukkala acisaka ansi kabapetede maulu, kumwi kabayangayanga ansi ciindi nobapandulula ncobaiya ajwi kalili mujulu kapati . Tiilyakalampa pe, twakatalika kwiiya ziindi zyobilo nsondo ansondo, ciiyo cimwi acimwi cakali kutola mawoola obilo!
KUJANIKA KUMISWAANGANO ALIMWI AKUTOLA LUBAZU
Ba Kingsley alimwi aba Paul
Ba Kingsley bakali kuyandisya kapati kujanika ku Ŋanda ya Bwami, pele tiicakali cuuba-uba pe. Bakali kuyandika kugwasyigwa kukkwela akuseluka akacinga , mumootokala, alimwi amu Ŋanda ya Bwami. Pele banji mumbungano bakali kwiinzyanya kubagwasyilizya, alimwi bakali kucibona kuti ncoolwe kucita boobu. Lyamiswaangano, ba Kingsley bakali kukkala munsi-munsi amasipika, akubikkila maano kuswiilila, alimwi buya akutola lubazu!
Nobakaiya kwaciindi cili mbocibede, ba Kingsley bakasala kulilembya mu Cikolo Camulimo Weendelezyegwa a Leza. Kakuceede nsondo zyobilo kuti bape makani aabo aakubala Bbaibbele, ndakababuzya naa bakali kulibambila. Bakavwiila cakusinizya kuti: “Inzya Mukwesu, ndainduluka-induluka kulibambila ziindi zili 30.” Ndakabalumbaizya akaambo kakusolekesya kwabo akubalomba kuti babale kandimvwide. Bakajalula Bbaibbele lyabo lyaboofwu akubikka minwe kutegwa babale. Nokuba boobo, ndakabona kuti kunyina nobakali kunyanyaasya minwe yabo kuccililizya mizila yamabala ciindi nobakali kubala mbuli mbobakali kucita lyoonse. Bakalicipetede cibalo coonse camu Bbaibbele ncobakapegwa kubala!
Kayeenda misozi, ndakali kwiile kulangilila akugambwa kapati. Ndakababuzya kujatikizya mbobakacikonzya kuciyeeya cibalo mumutwe kakuli bakainduluka kulibambila ziindi izili buyo 30. Bakandiingula kuti: “Peepe, kutali ziindi zili 30 pe, pele ndali kwiinduluka ziindi zili 30 buzuba abuzuba.” Kwamazuba aainda kumwezi omwe ba Kingsley bakali kukkala akubala cakwiinduluka-induluka makani aabo kusikila limwi bakacikonzya kucipeta cibalo.
Mpoonya bwakasika buzuba bwakupa makani aabo ku Ŋanda ya Bwami. Ciindi nobakamanizya kupa makani aabo, bantu bakabakambilila kapati, alimwi banji bakalila nobakabona busungu bwabo. Sikumwaya umwi mucizyi, iwakacilekede kupa makani akaambo kakuyoowa, wakalomba kuti alembwe alimwi mucikolo. Ino nkaambo nzi? Wakaamba kuti: “Ikuti ba Kingsley kabacikonzya, andime inga ndacikonzya!”
Mu September 6, 2008, nobakamana kwiiya Bbaibbele myaka yotatwe, ba Kingsley bakatondezya kulyaaba kwabo kuli Jehova kwiinda mukubbapatizyigwa. Bakali Kamboni uusyomeka kusikila ciindi nobakafwa mu May 13, 2014, ba Kingsley bakalijisi lusyomo lwakuti munyika ya Paradaiso bayoozumanana kubeleka cakusyomeka kabajisi nguzu alimwi kabajisi buumi bubotu. (Is. 35:5, 6)—Akaluulwa aba Paul McManus
^ par. 4 Lyakamwaigwa mu 1995, pele lino talicisimbwi.
