CIINDI ba Anita * nobakabbapatizyigwa akuba Kamboni wa Jehova, bakatalika kukazyigwa kapati abalumi babo. Ba Anita bakaamba kuti: “Balumi bangu bakandikasya kuunka kumiswaangano alimwi bakandikasya nokuba kwaamba zina lya Leza. Ikwaamba buyo zina lya Jehova kwakali kubanyemya kapati balumi bangu.”

Kuyiisya bana babo makani aajatikizya Jehova bwakali buyumuyumu bumbi mbobakajisi ba Anita. Bakaamba kuti: “Kukomba Jehova kwakali kukasyigwa muŋanda yangu. Tiindakali kukonzya kubayiisya bana bangu cakwaanguluka, alimwi tiindakali kukonzya kubatolelezya kumiswaangano.”

Izyakabacitikila ba Anita zitondezya kuti kukazyigwa abanamukwasyi kulakonzya kuba sunko ncobeni ku Munakristo. Masunko aambi alakonzya kuba aakuciswa bulwazi butasilikiki, kufwidwa mwana naa ngomukwetene limwi, alimwi akuba amunamukwasyi iwaleka kukomba Jehova. Aboobo, ino ncinzi cikonzya kugwasya Munakristo kuzumanana kusyomeka kuli Jehova?

Ciindi nomwasunkwa munzila eeyi, ino ncinzi ncomukonzya kucita? Mwaapostolo Paulo wakaamba kuti: “Muyandika kuliyumya.” (Heb. 10:36) Pele ino ncinzi cikonzya kumugwasya kuliyumya?

Nzila imwi mbotuyumizyigwa kuliyumya mumasunko nkusyoma Leza kwiinda mumupailo. Amubone cikozyanyo comwe. Bumwi buzuba mu Muhulo masyikati, mukwasyi waba Ana wakafwidwa. Balumi babo mbobakakwetene limwi kwamyaka iili 30 bakafwa cakutayeeyelwa. Ba Ana bakaamba kuti: “Taakwe nobakapiluka kuŋanda kuzwa kuncito, alimwi bakajisi buyo myaka yakuzyalwa iili 52.”

Ino ba Ana bakacita buti? Bakeelede kupiluka kuncito, kucita boobu kwakabagwasya nkaambo mulimo ngobakali kucita wakali kuyanda kubikkila maano kapati, pele kucita boobu tiikwakapa kuti buumba bwabo bumane. Bakati: “Ndakamwaambila Jehova zyoonse izyakali mumoyo wangu akumukombelezya kuti andigwasye kuliyumya mupenzi eeli lyakufwidwa.” Sena Jehova wakayiingula mipailo yabo? Basyoma kuti wakayiingula ncobeni. Bakaamba kuti: “Luumuno Leza alikke ndwakonzya kupa lwakanduumbulizya mumoyo akundigwasya kuyeeya kabotu. Ndili masimpe kuti Jehova uyoobabusya balumi bangu.”—Flp. 4:6, 7.

Ooyo ‘uuswiilila mipailo’ usyomezya kuti uyoobapa zyoonse nzyobayandika babelesi bakwe kutegwa bazumanane kusyomeka kulinguwe. (Int. 65:2) Sena cisyomezyo eeci tacitupi kuba aalusyomo luyumu? Sena tacimugwasyi kubona kaambo andinywe ncomukonzya kuliyumya?

Jehova wali kubagwasya bantu bakwe kwiinda mumbungano ya Bunakristo. Mucikozyanyo, ciindi Banakristo mumbungano yaku Tesalonika nobakali kupenzyegwa kapati, Paulo wakakulwaizya Banakristo aaba ‘kuzumanana kukulwaizyanya akuyakana umwi amweenzinyina, mbubonya mbobakali kucita.’ (1Tes. 2:14; 5:11) Kwiinda mukukamantana caluyando akugwasyanya, Banakristo baku Tesalonika bakali kukonzya kuzumanana kusyomeka. Mpuwo yabo yakuliyumya ncikozyanyo cibotu kapati kulindiswe mazuba aano alimwi ciyubununa cintu cimwi cikonzya kutugwasya kuliyumya.

Kuba azilongwe ziyumu a Banakristoma mumbungano kulakonzya kutugwasya kucita “zintu iziyaka umwi aumwi.” (Rom. 14:19) Kucita boobu kulayandika kapati kwaambisya muziindi zyamapenzi. Paulo lwakwe wakapenga munzila zinji, alimwi Jehova wakamupa nguzu izyakamugwasya kuliyumya. Zimwi ziindi, Leza wakali kuyumya Paulo kwiinda mubasyominyina. Mucikozyanyo, ciindi Paulo naakatuma myooni ku Banakristo mumbungano yaku Kolose, wakaamba kujatikizya mbabo kuti: “Mbambabo ibanduumbulizya kapati.” (Kol. 4:10, 11) Inzya, luyando ndobakajisi kuli Paulo lwakabakulwaizya kumuumbulizya akumuyumyayumya ciindi naakali mupenzi. Ambweni andinywe  mwakakulwaizyigwa kale akutambula lugwasyo luli boobu kuzwa ku Banakristonyoko mumbungano.

Nzila imwi alimwi Leza njatupede kutegwa tugwasyigwe nkwiinda mubaalu ibali mumbungano ya Bunakristo. Baalumi aaba ibasimide kumuuya balakonzya kuba ‘mbuli busena bwakutijila muwo, busena bwakuyusila mvwula mpati yamuwo, mbuli tulonga twamaanzi mucisi cinyina maanzi, mbuli cimvwule camwala mupati kapati munyika yacimpayuma.’ (Is. 32:2) Eelo kaka cisyomezyo eeci cilakatalusya! Sena mulabubelesya bubambe oobu bwaluyando? Kuyumizyigwa alimwi akugwasyigwa abaalu kulakonzya kumugwasya kuliyumya.

Tulizyi kuti baalu tabali babelesi ibabeleka munzila yamaleele. Mbantu batalondokede, ‘ibalezya mbubonya mbuli ndiswe.’ (Mil. 14:15) Nokuba boobo, mipailo yabo njobatupailila ilakonzya kutugwasya kapati. (Jak. 5:14, 15) Mukwesu umwi waku Italy iwali kuciswa bulwazi bwakutebela milambi (muscular dystrophy) kwamyaka minji wakaamba kuti: “Luyando lwabakwesu alimwi akundiswaya nkobacita lyoonse zyandigwasya kapati kuliyumya.” Mulakonzya kugwasyigwa kapati abaalu—icipego caluyando icizwa kuli Jehova.

Kuli zintu azimbi nzyotukonzya kucita kutegwa tuliyumye. Cimwi ncotukonzya kucita nkuba abubambe busitikide bwakucita zintu zyakumuuya. Amubone cikozyanyo caba Johane, ibajisi myaka yakuzyalwa iili 39 ibakajanwa abulwazi bwakkansa. Bakaamba kuti: “Ndakalimvwa kubula coolwe nkaambo ndakacili mwana.” Aciindi eeco, mwana musankwa waba John wakajisi buyo myaka yotatwe yakuzyalwa. Ba John bakaamba kuti: “Eeci cakali kwaamba kuti bakaintu bangu bakeelede kulanganya mwaneesu musyoonto alimwi akulanganya ndime, kubikkilizya akundigwasya kuunka kucibbadela.” Misamu njondakali kunywa yakandipa kulimvwa kukatala kapati akuvwundauka kumoyo. Kuyungizya waawo, Bausyi baba John bakaciswa kapati alimwi bakali kuyandika kulanganizyigwa amukwasyi.

Ino ba John amukwasyi wabo bakacita buti mubukkale oobu bukatazya? Ba John bakaamba kuti: “Nokuba kuti ndakali kulimvwa kukatala kapati, ndakabikkila maano kubona kuti mukwasyi wesu wakali kucita zintu zyakumuuya lyoonse. Twakali kujanika kumiswaangano yoonse, twakali kutola lubazu mumulimo wakukambauka nsondo ansondo, alimwi twakali kukomba mumukwasyi cakusitikila nokuba muziindi nocakali kukatazya kucita boobo.” Masimpe, ba John bakabona kuti kuzumanana kuyuma kumuuya cakali kuyandika kutegwa baliyumye. Sena kuli lulayo luliloonse ndobapa baabo ibali mubukkale bukatazya? Bakaamba kuti: “Nowamana kunyongana mumizeezo, nguzu zya Jehova aluyando lwakwe zilakugwasya kuba aluumuno lwamumizeezo. Jehova ulakonzya kumugwasya kuyuma mbubwenya mbwaandigwasya andime.”

Cakutadooneka, kwiinda mukugwasyigwa a Leza tulakonzya kuliyumya mumasunko aakatazya naa mubukkale motukonzya kulijana, ecino ciindi naa kumbele. Atusyome Jehova kwiinda mukupaila kulinguwe, atube azilongwe ziyumu a Banakristoma mumbungano, atugwasyigwe abaalu Banakristo, alimwi atuzumanane kuba abubambe busitikide bwakucita zintu zyakumuuya. Kwiinda mukucita boobu, tunoocita kweelana amajwi aamwaapostolo Paulo aakuti: “Muyandika kuliyumya.”