Amube Acilongwe A Leza

Ciindi Bucembele Bwaakumana

NGUNI akati kesu uukkomanina mapenzi aaboola akaambo kabucembele—kukokonyana cikanda, kutabona kabotu, kutamvwisya alimwi akwaalilwa kweenda kabotu? Mulakonzya kulibuzya kuti, ‘Nkaambo nzi Leza ncaakatulengela kuti katukkomana buyo notucili bakubusi mpoonya akutupa kuba amapenzi aakucembaala?’ Cikkomanisya ncakuti Leza kunyina naakali kuyanda kuti katupona boobu pe. Pele caluyando wabikka bubambe bwakutunununa kuzwa kumapenzi aakucembaala. Amubone majwi ngakaambila Jobu ajanika kubbuku lya Jobu 33:24, 25.

Amubone bukkale bwa Jobu muntu wakali kusyomeka ngwaakali kuyanda Jehova. Jobu katazyi, Saatani wakatalika kudooneka kusyomeka kwakwe, akwaamba kuti Jobu wakali kubelekela Leza akaambo kazyintu nzyaakali kupegwa. Jehova wakamuzumizya Saatani kuti amusunke Jobu akaambo kakuti wakalizyi mbwakali kusyomeka. Mpoonya Saatani wakapa kuti Jobu azwe “zilonda kuzwa kumaulu kusikila kukatwikilo.” (Jobu 2:7) Mubili wa Jobu wakazula amvunyu, lukanda lwakwe lwakayuma, akusiya, alimwi akupampamuka. (Jobu 7:5; 30:17, 30) Amuyeeye buyo mbwaakapenga Jobu! Nokuba boobo, Jobu wakazumanana kusyomeka, aakwaamba kuti: “Mane kusikila ndikafwe nsikooleka kululama.”—Jobu 27:5, NW.

Nokuba boobo, Jobu wakalubizya kapati. Naakabona kuti wakali afwaafwi kufwa, wakabikkila kapati maano kukusalazya zyina lyakwe, “nkaambo wakali kulilulamika lwakwe kwiinda Leza.” (Jobu 32:2, BT) Mwaambilizi wa Leza Elihu wakamukalalila Jobu. Pele Elihu alimwi wakaambila Jobu mulumbe uukkomanisya kuzwa kuli Leza wakuti: “Avunwe [Jobu] kulufu, nkaambo wamujanina cinunuzyo. Lino inyama yakwe ilaba impya kwiinda yamwana; inguzu zyabulombe bwakwe bulajoka.” (Jobu 33:24, 25) Majwi aaya masimpe akamupa bulangizi Jobu. Taakeelede kuzumanana kupenga kusikila kulufwu lwakwe. Ikuti Jobu weempwa, Leza wakali yandide kuzumina cinunuzyo cakwe akumunununa kumapenzi ngaakajisi. *

Cakulicesya, Jobu wakalutambula lulayo alimwi wakeempwa. (Jobu 42:6) Jehova wakacitambula cinunuzyo ca Jobu icakapa kuti alekelelwe cibi cakwe akujalula nzila yakuti Leza amuponye akumulongezya. Jehova ‘wakaalongezya mamanino aabuumi bwa-Jobu kwiinda matalikilo.’ (Jobu 42:12-17) Amuyeeye buyo mbwaakakatalukwa Jobu ciindi naakapona bulwazi bwakwe bubyaabi akuba ‘anyama impya kwiinda yamwana’.

Cinunuzyo Leza ncaakatambula kuzwa kuli Jobu cakabeleka buyo ciindi cisyoonto nkaambo wakacili muntu uutalondokede alimwi wakazikufwa. Icinunuzyo ncotujisi lino ncibotu kapati. Caluyando Jehova wakatupa Mwanaakwe, Jesu, kuti cibe cinunuzyo. (Matayo 20:28; Johane 3:16) Boonse balaalusyomo mucinunuzyo balakonzya kulangila kuba abuumi butamani muparadaiso anyika. Munyika mpya iiboola, Leza uyoogusya kucembaala kubantu boonse basyomeka. Mulakonzya kwiiya zinji kujatikizya mbomukonzya kupona kutegwa mukabone ciindi bacembeede nobatikabe ‘anyama mpya kwiinda yamwana.’

[Bupanduluzi buyungizidwe]