Amube Acilongwe A Leza

Luumbulizyo Kuli Baabo Bawizukide Mumoyo

‘JEHOVA takonzyi kundiyanda mebo.’ Mbwaakaamba oobu mukaintu umwi Munakristo wakatyompedwe kwaciindi cilamfwu mubuumi bwakwe. Wakali kuyeeya kuti Jehova wakali kule anguwe. Sena masimpe Jehova uli kule abakombi bakwe batyompedwe? Bwiinguzi buumbulizya bulajanika mumajwi asintembauzyo Davida aakasololelwa amuuya, aalembedwe mu Intembauzyo 34:18.

Davida wakalizyi mapenzi aakonzya kuboola kumukombi wa Jehova uusyomeka akaambo kakutyompwa kapati. Kacili mulombe, Davida wakali simutuntuli ciindi naakali kuyandaulwa amwami Saulo simunyono iwakakanzide kumujaya. Davida wakayandaula mayubilo kubusena nkwaakali kuyeeyela kuti Saulo takonzyi kuyoomuyandaula—mumunzi wabasinkondonyina waku Gati, mucilawo caba Filisti. Pele Davida naakabona kuti wazyibwa, wakafutuka kwiinda mukulicengeezya kusondoka. Davida wakamulumba Leza akaambo kakumufwutula alimwi eeci cakamucitikila ncecakapa kuti alembe Intembauzyo 34.

Sena Davida wakali kusyoma kuti Leza uli kule kulibaabo batyompedwe akaambo kamapenzi naa ibalimvwa kuti Leza tabalanganyi? Davida wakalemba kuti: “Jehova uli afwaafwi kubawizukide mumoyo, Ulafutula batete myuuya.” (Kapango 18) Atubone majwi aaya mbwaapa luumbulizyo abulangizi.

“Jehova uli afwaafwi.” Bbuku limwi lyaamba kuti majwi aaya “ninzila yakwaamba kuti Mwami ulabikkila maano, ulatulanganya, alimwi lyoonse ulilibambilide kubagwasya akubafwutula bantu bakwe.” Cilakkazika moyo kuzyiba kuti Jehova ulabalanganya bantu bakwe. Ulaabona mapenzi aabacitikila ‘muziindi zino zikatazya,’ alimwi ulizyi mbobalimvwa.—2 Timoteyo 3:1; Milimo 17:27.

“[Kulibaabo] bawizukide mumoyo.” Mumasena amwi, “kuwizuka moyo” caamba kuti toyandwi. Pele sikwiiya zyamu Bbaibbele umwi wakaamba kuti majwi asintembauzyo aamba “mapenzi woonse aamumoyo.” Masimpe, nobaba bakombi ba Leza basyomeka balakonzya kuba amapenzi aataambiki aakonzya kubawizula moyo zimwi ziindi.

“[Kulibaabo] batete myuuya.” Batyompedwe balakonzya kuusa kapati cakunga batalika kulimvwa kuti tabacijisi abulangizi. Ibbuku limwi lya basanduluzi ba Bbaibbele lyaamba kuti majwi aaya alakonzya kwaambwa kuti “aabo banyina cintu cibotu ncobakonzya kulangila kumbele.”

Ino Jehova ubacita buti aabo“bawizukide mumoyo” alimwi “abatete myuuya”? Sena uli kule ambabo, akulimvwa kuti tabeelede kuyandwa akubikkilwa maano? Peepe. Mbuli muzyali siluyando uujatilila akuumbulizya mwana uli mumapenzi, Jehova ulaafwaafwi kubakombi bakwe bamulomba lugwasyo. Ulayandisisya kubaumbulizya akubakkazika myoyo yabo aabo bawizukide alimwi abatete myuuya. Ulakonzya kubapa busongo anguzu ziyandika kutegwa bakonzye kuzunda kufumbwa mapenzi ngobakonzya kujana.—2 Bakolinto 4:7; Jakobo 1:5.

Sena inga tiimwayanda kuzyiba mbomukonzya kuba acilongwe a Jehova? Leza ooyu siluzyalo usyomezya kuti: “Pele mubombumoyo uupengede alakwe ndikede awe. Ndime uubusya muuya wamuntu uubombede akukatalusya moyo.”—Isaya 57:15.