Amube Acilongwe A Leza

“O Jehova, . . . Ulindizi”

“KUNYINA cintu cikonzya kukatazya muntu mbuli kuzyiba kuti kunyina uumubikkila maano naa uumuswiilila.” * Sena mbomulimvwa oobo? Sena kuli nomwakalimvwide kuti kunyina muntu uumubikkila maano naa kuti kunyina uuzyi mbolibede penzi ndyomujisi? Ikuti kacili boobo, mulakonzya kuumbulizyigwa kwiinda mukuzyiba kuti: Jehova ulababikkila maano kapati bakombi bakwe cakuti ulizizyi zyoonse zyintu zibacitikila mubuumi bwabo buzuba abuzuba. Majwi aa Davida aali mubbuku lya Intembauzyo 139 mbwaatusyomezya oobu.

Kasyomede kuti Leza ulamubikkila maano, Davida wakaamba kuti: “O Jehova, wandilingula alimwi ulindizyi.” (Kapango 139) Davida aawa wakabelesya cikozyanyo cibotu. Ibbala lyamu Chihebrayo lisandulwidwe kuti “kulingula” mukapango aaka lilakonzya kwaamba kusya lubulo (Jobu 28:3), kubona nyika mbwiibede (Babetesi 18:2), naa kulingula makani (Deuteronomo 13:14). Masimpe, Jehova ulituzyi kabotu-kabotu cakuti cili mbuli kuti wabulingula buumi bwesu boonse. Davida utuyiisya kuti Leza ulababikkila maano babelesi bakwe. Ulabalingula alimwi ulabazyiba umwi aumwi kumugama.

Davida wakayungizya kwaamba boobu kujatikizya Leza mbwalingula naakati: “Ulizi kukala kwangu akubuka kwangu. Ulibwene miyeeyo yangu noli kule.” (Kapango 2) Mubwini, Jehova ‘uli kule,’ ukkala kujulu. Pele ulizyi ciindi notukkala aansi, ndiza bwamana buzuba boonse, alimwi aciindi notubuka mafwumofwumo anzyotucita mubuumi bwesu buzuba abuzuba. Alimwi ulizyi nzyotuyeeya, nzyotulombozya, alimwi anzyotukanza kucita. Sena Davida wakalimvwa kuyoowa akaambo kakulingulwa kuli boobu? Peepe, wakalikkomene kulingulwa. (Kapango 23, 24) Ino nkaambo nzi?

Davida wakalizyi kuti Jehova ujisi makanze mabotu ciindi nalingula bakombi Bakwe. Davida wakaamba makanze aaya naakalemba kuti: “Kweenda kwangu akoona kwangu, zyoonse ulazilingula. Ulizi inzila zyangu zyoonse.” (Kapango 3) Buzuba abuzuba, Jehova ulazibona ‘inzila zyesu zyoonse’—kulubizya kwesu alimwi amilimo yesu mibotu. Sena ubikkila maano kuzyintu zibi naa zibotu? Ibbala lyamu Chihebrayo ilyakasandululwa kuti ‘kulingula’ mukapango aaka lilakonzya kwaamba “kupupulula,” mbubwenya mbuli mulimi mbwapupulula bungu kutegwa kusyaale maila mabotu. Ibbala lyakuti “ulizi” mu Chihebrayo lisandulula bbala ilikonzya kwaamba kuti “kubikkila maano.” Nalingula zyintu nzyobaamba akucita bakombi bakwe buzuba abuzuba, Jehova ubikkila maano kuzyintu zibotu. Nkaambo nzi? Ulakukkomanina kusoleka kwabo kwakuyanda kumukkomanisya.

Ibbuku lya Intembauzyo 139 lituyiisya kuti Jehova ulababikkila maano kapati bakombi bakwe. Ulabalingula alimwi akubakwabilila muzyintu nzyobacita buzuba abuzuba. Aboobo ulaazyi mapenzi ngobaswaanganya, alimwi ulizyi mbobapenga mumizeezo amumoyo akaambo kamapenzi aaya. Sena mulakulwaizyigwa kukomba Leza uuli boobu uubikkila maano? Ikuti kacili boobo, mulakonzya kusyoma kuti: Jehova ‘takailubi milimo yanu alimwi aluyando ndomwakatondezya kuzyina lyakwe.’—Bahebulayo 6:10.

[Bupanduluzi buyungizidwe]