Bbaibbele Lilakonzya Kubacinca Bantu

NCINZI cakapa kuti musimbi umwi apilukile kunjiisyo zyabukombi nzyaakaiya naakacili mwana? Amubale ncaakaamba.

“Lino Ndijisi Buumi Bulaampindu Ncobeni.”—LISA ANDRÉ

MWAKA WAKUZYALWA: 1986

KUCISI NKWAZWA: LUXEMBOURG

MBWAAKABEDE KAINDI: MWANA MUTAKA

MBONDAKABEDE KAINDI: Ndakakomenena mu Bertrange, idolopo lisyoonto linyina tombe, litayoosyi, alimwi livwubide ilili munsi-munsi akucisi ca Luxembourg. Ndendime musyoonto akati kabana bosanwe. Bazyali bangu Mbaakamboni ba Jehova, alimwi bakabeleka canguzu kutuyiisya njiisyo zya Bunakristo toonse tobana.

Nindakaba buyo mukubusi, ndakatalika kuzidooneka kapati zyintu nzyobayiisya Bakamboni ba Jehova. Kumatalikilo, tiindakali kukubikkila maano kudooneka ooku, pele mukuya kwaciindi lusyomo lwangu lwakali kuyabumanina limwi. Bazyali bangu bakacita zyoonse nzyobakali kukonzya kundigwasya kuti ndibe munzila yeelede, pele ndakalukaka lugwasyo lwabo. Kabatazyi, ndakali kusobana abana batakajisi bulemu kubweendelezi. Ndakali kuyanda kujana lwaanguluko lwakali kulibonya kuti luzwa muzyintu nzyobakali kucita. Twakali kupobola kapati, kucita bwaamu, kubelesya misamu iikola alimwi akunywa bukoko. Kumatalikilo ndakali kukkomana kuba abantu bakali kuboneka mbuli kuti bakalikkomene kapati mubuumi.

Pele mubwini, tiindakakkomene pe. Buumi bwakuyanzana abantu bali boobu bwakanyina mpindu, nkaambo kunyina wakali kuzibikkila maano zyintu zyakali kucitika. Pele mebo kuli twaambo tunji twakali kundikatazya mbuli kutalulama ncokuvwulide munyika. Mukuya kwaciindi, ndakali kuyaabutyompelwa limwi.

BBAIBBELE MBOLYAKANDICINCA: Nindakali amyaka iili 17, bumwi buzuba ndakalimvwa kutyompwa kapati. Baama nobakabona kuti tandikkomene, bakandilomba kuti nditalike kwiiya Bbaibbele alimwi. Bakandikulwaizya kuti ndilange-lange ncoliyiisya kumane ndilisalile kuti naa ndiyanda kupona kweelana ancoliyiisya naa pe. Mubandi uukulwaizya ooyu ngotwakajisi wakandipa kucinca. Ndakazumina kwiiya Bbaibbele amucizyi wangu mupati Caroline abalumi bakwe ba Akif. Ba Akif tiibakakomenena mumukwasyi wa Bakamboni ba Jehova pele bakaiya kabali bapati kale. Akaambo kabukkale bwaba Akif bwakaindi, ndakalimvwa kwaanguluka kuti inga ndabandika ambabo zyintu zyakali kuyandika kapati kulindime.

 Ndakalizyi kuti bukkale bwangu tiibwakali kweendelana abwa Kamboni, pele kumatalikilo ndakali kulimvwa kuti nzyondakali kucita mubuumi, cakali cakulisalila cangu. Nokuba boobo, kwiinda mukwiiya Bbaibbele, ndakazyiba kuti bukkale bwangu bulamujatikizya Jehova. (Intembauzyo 78:40, 41; Tusimpi 27:11) Alimwi ndakazoozyiba kuti abamwi bantu bulabajatikizya.

Mbondakali kuyaabulanga-langa zili mu Bbaibbele, ndakajana kuti kwakali twaambo tubotu twakusyoma kuti ndi Jwi lya Leza. Mucikozyanyo, ndakaiya businsimi bunji bwamu Bbaibbele bwakazuzikizyigwa kweelana ambokwakasinsimwa. Luzyibo oolu lwakandigwasya kuti ndileke kudooneka nkondakajisi kusaanguna.

Nikwakainda mwaka omwe kandiiya Bbaibbele, mebo abazyali bangu twakaunka kuyooswaya mupati wangu musankwa wakali kubelekela kuofesi yamutabi ya Bakamboni ba Jehova ku Germany. Nindakabona mupati wangu mbwakakkomene, ndakakulwaizyigwa kapati. Oolu ndolukkomano ndondakali kuyandaula. Alimwi abalo Bakamboni bamwi bakali kubelekela mpawo bakandikkomanisya. Bakaliindene kapati abantu batasyomeki mbondakali kuyanzana limwi. Nikwakainda buyo ciindi cisyoonto, ndakapaila kuli Jehova kuzwa ansi aamoyo, kumusyomezya kuti ndiyakumubelekela mubuumi bwangu boonse. Nindakakkwanya myaka iili 19, ndakatondezya kulyaaba kwangu kuli Jehova kwiinda mukubbapatizyigwa.

MBONDAGWASYIGWA: Lino ndijisi buumi bulaampindu ncobeni. Cilandikkomanisya kuyiisya bamwi Bbaibbele, kubagwasya kwiiya kujatikizya Jehova alimwi azisyomezyo zyakwe zyakumbele. Mukwasyi wangu awalo wagwasyigwa—tabacilibiliki kujatikizya ndime.

Ndilaziyeeya zyintu zibi nzindakali kucita kaindi, pele ndilasoleka kutazibikkila maano. Muciindi caboobo, ndibikkila maano kukulekelela kwa Jehova alimwi aluyando ndwajisi kulindime. Ndilaazumina camoyo wangu woonse majwi aali mulugwalo lwa Tusimpi 10:22, aakuti: “Lulongezyo lwa-Jehova lulavubya, alimwi tayungizyi mause kulindulo.”

[Majwi aakwelelezya sikubala aali apeeji 10]

“Twakali kupobola kapati, kucita bwaamu, kubelesya misamu iikola alimwi akunywa bukoko”

[Majwi aakwelelezya sikubala aali apeeji 11]

“Ndilaziyeeya zyintu zibi nzindakali kucita kaindi, pele ndilasoleka kutazibikkila maano”