IBBAIBBELE LILAKONZYA KUBACINCA BANTU

“Bakali kuyanda kuti ndilibonene ndelikke cini Bbaibbele ncolyaamba”

Akaluulwa aba Luis Alifonso

MWAKA WAKUZYALWA: 1982

KUCISI NKWAZWA: DOMINICAN REPUBLIC

MBWAAKABEDE KAINDI: WAKAKOMEZYEGWA MUCIKOMBELO CA MORMON

MBONDAKABEDE KAINDI: Ndakazyalilwa ku Santo Domingo, ku Dominican Republic, ndakali wamamanino kuzyalwa kubana bone. Bazyali bangu bakaliyiide kapati alimwi bakali kuyanda kutukomezya mubukkale buli kabotu. Myaka yone kanditanazyalwa, bazyali bangu bakaswaangana abamisyinali ba Mormon. Akaambo kakuti bakali kulibonya kabotu akulilemeka kabotu, bazyali bangu bakasala kuti mukwasyi wesu ube wakusaanguna kunjila cikombelo ca Church of Jesus Christ of Latter-day Saints, naa cikombelo ca Mormon akati kamikwasyi yakali kukkala ansumbu.

Nindakali kukomena, ndakali kukkomana azyintu zyakali kucitika kucikombelo alimwi ndakali kulemeka mbobakali kubikkila maano kubuumi bwamumukwasyi alimwi akulilemeka. Ndakalikkomene kuti ndakali mu Mormon alimwi ndakaba ambaakani yakuba misyinali.

Nindakajisi myaka iili 18 yakuzyalwa, mukwasyi wesu wakalongela ku United States kutegwa ndikaunke ku Yunivesiti mbotu. Nikwakainda mwaka omwe, basyoonto babaama bakaintu ibakali Bakamboni ba Jehova abalumi babo, bakaboola kutuswaya ku Florida. Bakatutamba kuti tukabungane ambabo kumuswaangano wacooko wakwiiya Bbaibbele. Ndakakkomana kubona kuti boonse bakandizingulukide bakali kwaabala magwalo alimwi akulemba twaambo. Aboobo, ndakalomba peeni akapepa, eelyo ambebo ndakatalika kulemba.

Niwakamana muswaangano, basyoonto babaama abalumi babo bakandaambila kuti mbwaanga ndakali kuyanda kuyooba misyinali, bakali kukonzya kundigwasya kwiiya Bbaibbele. Ndakaukkomanina muzeezo ooyu nkaambo aciindi eeci, ndakazyi zinji kujatikizya Bbuku lyaba Mormon kwiinda nzyondakazyi kujatikizya Bbaibbele.

BBAIBBELE MBOLYAKANDICINCA: Nitwakali kubandika zya Bbaibbele afooni, basyoonto babaama abalumi babo lyoonse bakali kundikulwaizya kweezyanisya nzyondakali  kusyoma kunjiisyo zyamu Bbaibbele. Bakali kuyanda kuti ndilibonene ndelikke cini Bbaibbele ncolyaamba.

Kwakali zyintu zinji kujatikizya lusyomo lwaba Mormon nzyondakazuminide, pele tiindakazyi twaambo ooto mbotwakali kweendelana a Magwalo. Basyoonto babaama bakanditumina magazini ya Sinsimuka! yamu November 8, 1995, yakamwaigwa a Bakamboni ba Jehova, iyakajisi zibalo zijatikizya lusyomo lwaba Mormon. Ndakagambwa kuti njiisyo zinji zyaba Mormon tiindakazizyi. Eeci cakandipa kuvwuntauzya a Web site yaba Mormon kutegwa ndisinizye kuti nzyondakabala mumagazini ya Sinsimuka! zyakali zyamasimpe. Ndakajana kuti zyakali zyamasimpe, alimwi ndakasinizya kuti zyakali zyamasimpe ciindi nindakaswaya mamiziyamu aaba Mormon ku Utah.

Lyoonse ndakali kusyoma kuti bbuku lyaba Mormon lyakali kweendelana a Bbaibbele. Pele nindakatalika kubala Bbaibbele cakusitikila, ndakabona kuti kuli kuteendelana akati kanjiisyo zyaba Mormon alimwi ancolyaamba Bbaibbele. Mucikozyanyo, mulugwalo lwa Ezekieli 18:4, Bbaibbele lyaamba kuti muntu ulafwa. Pele, Bbuku lyaba Mormon, mu Alma 42:9, lyaamba kuti: “Muntu tafwidilili.”

Kuyungizya akuteendelana kwanjiisyo, ndakali kukatazyigwa anjiisyo zyaba Mormon zijatikizya zyintu zyakali kucitika mucisi. Mucikozyanyo, ba Mormon bayiisyigwa kuti muunda wa Edeni wakali ku Jackson County, Missouri, U.S.A. Alimwi basololi bacikombelo bayiisya kuti bumwi buzuba “Leza uyoolela nyika kwiinda mumfwulumende ya United States.”

Kweelana anjiisyo eeyi yaba Mormon, ndakali kulibuzya kujatikizya cakali kuyoocitikila zisi zimwi mbuli cisi nkondakazyalilwa. Ndakatalisya mubandi uujatikizya makani aaya bumwi buzuba kumangolezya ciindi nindakatambula fooni kuzwa kumukubusi umwi iwakali kuyiisyigwa mulimo wabumisyinali mucikombelo ca Mormon. Ndakamubuzya naa wakali kukonzya kulwana ba Mormoninyina kuti cisi cokwabo kacilwana acisi cimbi muli ba Mormon. Ndakagambwa naakaamba kuti inga wacita oobo! Ndakavwuntauzya kujatikizya njiisyo zyacikombelo cesu alimwi ndakabuzya-buzya kubasololi bapati-pati bamu Cikombelo ca Mormon. Bakandaambila kuti bwiinguzi kumibuzyo yangu bwakali kukatazya kubumvwisya pele bumwi buzuba buyakumvwika mumuni mbuuyaabungwengwemuka.

Kandityompedwe abwiinguzi bwabo, ndakalilingula alimwi akuyeeya kaambo ncondakali kuyanda kuba misyinali waba Mormon. Ikaambo kamwi kakandipa kuyanda kuba misyinali nkuyanda kugwasya bantu, alimwi akuyanda kuti bantu kabandilemeka. Pele kwaamba masimpe, tiindakazyi zinji kujatikizya Leza. Nokuba kuti kaindi ndakali kulibala Bbaibbele ziindi zinji, tiindakali kulibikkila kapati maano. Alimwi tiindakazyi makanze aa Leza aajatikizya nyika naa bantu.

MBONDAGWASYIGWA: Akati kazyintu nzyondakaiya a Bakamboni ba Jehova muciiyo ca Bbaibbele, ndakaiya kujatikizya zyina lya Leza, cicitika muntu afwa, alimwi amulimo Jesu ngwajisi mukuzuzikizyigwa kwamakanze aa Leza. Mukuyakwaciindi ndakalizyiba bbuku eeli litaliboteli, alimwi cakali kundikkomanisya kwaambila bamwi kasimpe nkondakali kwiiya. Kuzwa kaindi ndakalizyi kuti Leza nkwali, pele lino ndakali kukonzya kwaambaula anguwe mumupailo mbuli mulongwe wangu. Ndakabbapatizyigwa akuba Kamboni wa Jehova mu July 12, 2004, mpoonya nokwakainda myezi iili cisambomwe ndakatalika mulimo wa Bunakristo waciindi coonse.

Kwamyaka yosanwe, ndakali kubelekela kumaofesi mapati aa Bakamboni ba Jehova ku Brooklyn, New York. Cakali kundikkomanisya kugwasyilizya mumulimo wakusimba ma Bbaibbele alimwi amabbuku aapandulula Bbaibbele aagwasya mamiliyoni aabantu nyika yoonse, alimwi ndazumanana kujana lukkomano mukugwasya bantu bambi kwiiya kujatikizya Leza.