Makani Mabotu Kubantu Boonse
Makani Mabotu Kubantu Boonse
Bubuke bwa Jesu bwakapa kuti basikwiiya bakwe babe alusyomo alimwi akuba basungu. Mwaapostolo Paulo kumugama wakeenda mu Asia Minor moonse alimwi amucooko ca Mediterranean, kubamba mbungano alimwi akuyumya-yumya Banakristo kuti batazungaani nobapenzyegwa. Nokuba kuti kwakali buyumuyumu oobu, bantu banji bakaba Banakristo.
Mukuya kwaciindi Paulo wakabikkwa muntolongo. Neliba leelyo, wakazumanana kulemba magwalo aakulwaizya alimwi aalulayo kumbungano zya Banakristo. Wakabacenjezya kujatikizya ntenda mpati, nkokuti luleyo. Keendelezyegwa amuuya uusalala wa Leza, Paulo wakabona kuti “baumpe babutambo” baamba “zyintu zipilingene” bayoonjila akati kabo ‘akulikwelela basikwiiya.’—Milimo 20:29, 30.
Kumamanino aamwaanda wamyaka wakusaanguna, busiluleyo bwakalitalikide kale. Aciindi eeco, Jesu walo iwakabukide kale, wakapa mwaapostolo Johane Ciyubunuzyo, cilengaano cazyintu ziyoocitika kumbele. Pele Johane wakalemba kuti, kunyina sikukazya, nobaba bamayi bakubeja ibayookasya Leza kuzuzikizya makanze aakwe aakusaanguna aajatikizya nyika alimwi abantu. Bantu ‘bamasi oonse, misyobo yoonse alimwi amikowa yoonse’ bayoomvwa makani mabotu aa Bwami bwa Leza. (Ciyubunuzyo 14:6) Nyika iyoobambwa kuba Paradaiso, alimwi kufwumbwa muntu uuyanda kucita kuyanda kwa Leza ulakonzya kuyookkala munyika eeyi!
Sena aaya “makani mabotu” kulindinywe? Ikuti kacili boobo, amwiiye azimbi kujatikizya mulumbe Leza ngwaakalembela bantu uujanika mu Bbaibbele alimwi amboukonzya kumugwasya sunu alimwi akumbele.
Mulakonzya kubala Bbaibbele a Intaneti a Web site ya www.ps8318.com. A Web site eeyi, mulakonzya kulanga-langa mumwaambo wa Chitonga broshuwa yakuti Makani Mabotu Aazwa Kuli Leza! alimwi abbuku lyakuti Ino Ncinzi Cini Bbaibbele Ncoliyiisya? alimwi amabbuku aamwi aamba ncotweelede kulisyoma Bbaibbele alimwi ambotukonzya kutobela lulayo lwandilyo lubeleka mumukwasyi wesu alimwi amubuumi bwesu. Alimwi mulakonzya kubuzya umwi wa Bakamboni ba Jehova kutegwa muzyibe zinji.
—Cibalo eeci ciyeeme aamagwalo aaya Milimo, Baefeso, Bafilipi, Bakolose, Filimoni, 1 Johane, Ciyubunuzyo.
[Cifwanikiso icili apeeji 7]
[Cifwanikiso icili apeeji 7]
