Ndakazyalilwa mucilawo citakupukide cili mudolopo lya Bilbao, mucisi ca Spain nkocili kujwe. Ndakali wabili kuzyalwa mumukwasyi wabana bone. Mumukwasyi wesu twakali ba Katolika, alimwi abuzuba ndakali kujanika ku Misa. Nindakakkwanya myaka yakuzyalwa iili 23, ndakaba mwiiyi, imulimo ngondakali kuyanda kapati alimwi ndakaubeleka kwamyaka iili 40. Akati kaziiyo nzyondakali kuyiisya, ndakali kukkomana kuyiisya makani aacikombelo ca Katolika, mpoonya masiku ndakali kuyiisya nkatikisima, nkokuti kuyiisya bana basimbi zyintu zijatikizyidwe mukulya mulalilo ciindi cakusaanguna.

Nikwakainda myaka iili 12 kandikkomene mucikwati, ndakafwidwa balumi alimwi ndakacaala abana basimbi bone. Aciindi eeci ndakajisi buyo myaka yakuzyalwa iili 33. Ndakasola kujana luumbulizyo mucikombelo ca Katolika, pele ndakacaala buyo amibuzyo minji. Ndakali kulibuzya kuti: ‘Ino nkaambo nzi bantu ncobazumanana kufwa nokuba kuti Kristo wakatunununa? Nkaambo nzi ncotupailila kuti Bwami bwa Leza buboole ikuti naa bantu bacita zyintu zibotu baunka kujulu?’ Alimwi ndakali kulibuzya kuti: ‘Ikuti naa Leza ulatubeteka ciindi notwafwa, nkaambo nzi kumbele ncotuyakuzwida kujulu, mubusena bwamyuuya naa kuhelo kutegwa tukabetekwe lubeta lwamamanino?

Ndakali kubabuzya mibuzyo eeyi bapaizi. Umwi wakandiingula kuti: “Tandizyi. Amukabuzye babbishopu. Nkaambo nzi ncociyandika? Tee kayi nywebo mulasyoma muli Leza? Kamwaaleka buyo aayo.” Pele ndakazumanana kuyandaula bwiinguzi. Kumbele, ndakatalika kujanika nobakali kuyiisya ba Jesuit, Pentecost, alimwi aba Gnostic. Nokuba boobo kunyina nindakabujana bwiinguzi bukkazyika moyo.

Nindakajisi myaka yakuzyalwa iili kuma 60, sicikolo wamyaka yakuzyalwa iili ciloba, wakanditamba kumiswaangano ya Bakamboni ba Jehova. Zyintu nzyondakabona alimwi akumvwa zyakandibotela, pele akaambo kakuti ndakajisi bubi mubuumi, kunyina nindakabonana a Bakamboni kuzwa  leelyo. Nikwakainda myaka yobilo, Bakamboni banabukwetene ba Juan alimwi aba Maite bakandiswaya aŋanda yangu. Kwamyezi yotatwe, twakali kuba amibandi yakayeeme akubuzyanya alimwi akwiingulana, yalo kumbele yakasololela kuciiyo ca Bbaibbele.

Eelo kaka ndakali kucilangila ciiyo cimwi acimwi! Ndakavwuntauzya makani oonse cakusitikila kubelesya busanduluzi bwama Bbaibbele otatwe aaindene-indene kutegwa ndisinizye naa nzyobakali kuyiisya Bakamboni ba Jehova zyakali zyamasimpe. Mpoonya ndakazoozyiba mbondakanyongene mumakani aabukombi kwamyaka minji. Ndakalibilika nindakabona kwiindana kupati kwakali akati kazyintu nzindakali kusyoma kaindi alimwi azyeezyo nzindakaiya kuzwa mu Bbaibbele. Ndakalimvwa kubula nguzu nkaambo zyintu nzindakali kusyoma zyakaba mbuli cisamu cipati icazyulwa.

Mpoonya, balumi bangu babili bakaciswa kapati kumane bakafwa. Aciindi nciconya, ndakacileka kubeleka alimwi ndakazwa ku Bilbao kwaciindi cili mbocibede. Ba Juan alimwi aba Maite abalo bakalonga. Cuusisya ncakuti, ndakacileka kwiiya Bbaibbele. Nokuba boobo, kuzwa ansi aamoyo, ndakalizyi kuti ndacijana cintu ciyandisi. Alimwi kunyina nindakaciluba pe.

Nikwakainda myaka iili 20, kandijisi myaka yakuzyalwa iili 82, ba Juan aba Maite bakapiluka ku Bilbao, mpoonya bakandiswaya. Eelo kaka ndakakkomana kubabona alimwi! Ndakazyiba kuti kunyina naakandilubide Jehova, aboobo ndakatalika alimwi kwiiya Bbaibbele. Banabukwetene aaba bakandikkazyikila moyo, nkaambo kanji-kanji ndakali kubabuzya mibuzyo njimunya cakwiinduluka-induluka. Ndakali kuyanda kumvwisya bumboni bwamu Bbaibbele cakwiinduluka-induluka kutegwa ndicileke kusyoma zyintu nzindakali kusyoma musyule. Alimwi ndakali kuyanda kulibambila kuzyiba mbondikonzya kupandulula kasimpe kamu Bbaibbele kubanamukwasyi alimwi abalongwe.

Kandijisi myaka yakuzyalwa iili 87, ndakabbapatizyigwa. Oobu bwakali buzuba bukkomanisya kapati mubuumi bwangu. Lubbapatizyo lwakacitilwa amuswaangano mupati wa Bakamboni ba Jehova. Imwaalu Munakristo wakapa makani aakagamikidwe kulindiswe notwakali kuya kukubbapatizyigwa. Aaya makani akandeezya misozi. Nindakali kuswiilila, cakali mbuli kuti Jehova waambaula andime cacigaminina. Nindakabbapatizyigwa, Bakamboni banji bakaboola kulindime akundilumbaizya nokuba kuti bamwi kunyina nitwakazibene.

Lyoonse ndakalizyi kuti Jesu Kristo ‘nenzila.’ (Johane 14:6) Pele kwiiya Bbaibbele kwakandigwasya kumuzyiba Jehova, alimwi akuti Jesu nguutusololela kulinguwe. Lino ndilakonzya kupaila kuli Leza kali Taata alimwi Mweenzuma. Kubala bbuku lyakuti Amubaa Cilongwe a Jehova * kwakapa kuti ndicince mubuumi. Cakusaanguna bbuku eeli ndakalibala lyoonse mbolizulwa mubusiku bomwe buyo. Ndakakkomana kapati kuzyiba mbuli mbwali siluzyalo ncobeni Jehova.

Ndalanga myaka minji njindakali kuyandaula kasimpe kamu Bbaibbele, cindiyeezya majwi aa Jesu aakuti: “Amuzumanane kulomba, eelyo ciyoopegwa kulindinywe; amuzumanane kuyandaula, eelyo muyoojana; amuzumanane kukonkomona, eelyo muyoojulilwa.” (Matayo 7:7) Mbokunga lino ndakabujana bwiinguzi mbondakali kuyanda, eeci cindipa kukkomana kapati kwaambila bamwi.

Nokuba kuti ndijisi myaka yakuzyalwa iili 90, kucili zyintu zinji nzyondiyandika kwiiya kujatikizya Jehova. Lyoonse ciindi nondiswaangana ku Ŋanda ya Bwami ndilakkomana nkaambo luzyibo lwangu lulayungizyigwa alimwi ndilayanzana abakwesu abacizyi. Ndilombozya kuyooba mwiiyi alimwi munyika ya Paradaiso yakasyomezyegwa. (Ciyubunuzyo 21:3, 4) Calukkomano ndilangila ciindi nondiyoobonana alimwi abayandwa bangu bakafwa alimwi akuba acoolwe cakubayiisya kasimpe kamu Bbaibbele. (Milimo 24:15) Eelo kaka ndiliyandide kuyoobapandulwida cipego cibotu ncaakandipa Jehova mubucembele bwangu!