Sena mulapaila lyoonse? Bantu banji balapaila, kubikkilizya abaabo ibatasyomi kuti Leza nkwali. Pele ino ncinzi cipa kuti bantu kabapaila? Kweelana abuvwuntauzi bwakacitwa ku France, cisela cabantu bakucisi eeci balapaila naa kuzinzibala kuyeeya zimwi ziindi “akaambo kakuyanda buyo kumvwa kabotu.” Mbubwenya mbuli bantu banji baku Europe, tabapaili akaambo kakuti bayanda kukomba Leza. Muciindi caboobo, bayanda buyo kuti “mupailo ubamvwisye kabotu.” Kulubazu lumwi, bakombi bamwi bapaila buyo kuli Leza kuti kakuli ncobayanda, kumwi kabalangila kuti mipailo yabo ilaingulwa mpoonya-mpoonya.—Isaya 26:16.

Ino mbuti kujatikizya ndinywe kumugama? Sena muyeeya kuti mupailo ninzila yakumugwasya buyo kuyeeya kabotu? Ikuti naa mulasyoma muli Leza, sena mulalibonena mupailo mboumugwasya mubuumi bwanu? Naa, sena mubona mbuli kuti mipailo yanu tayiingulwi? Bbaibbele lilakonzya kumugwasya kubona mupailo kuti ninzila iitaliboteli yakumugwasya kuba acilongwe a Leza, ikutali yakumupa buyo kulimvwa kabotu.