Toonse tulayeeya kujatikizya zyakumbele. Tulalibilika kujatikizya buumi bwesu abwabayandwa besu mbobuyooba. Tulalibuzya mibuzyo mbuli yakuti: ‘Sena bana bangu bayoopona munyika iili kabotu? Sena nyika iyoonyonyoonwa antenda zilicitikila? Sena kuli ncondikonzya kucinca lino kutegwa buumi bwangu bwakumbele bukabote?’ Kuyandisisya kuzyiba zintu zili boobu ncilengwa buya; toonse inga tuyanda bulangizi bwini-bwini, luumuno alimwi akuti zintu kazili kabotu. Nomwali kukonzya kuzyibila limwi ziyoocitika kumbele, nomwali kulibambilila limwi, kumubili amumizeezo.

Aboobo, sena mulizyi ziyoocitika kumbele? Sena kuli uukonzya kuzyiba? Basyaazibwene ibasola kwaambila limwi ziyoocitika kumbele, zintu zimwi nzyobaamba kuzwidilila nkusyoonto, kwaalilwa nkokunji. Pele kwaambwa kuti Leza ulakonzya kwaambila limwi zini ziyoocitika kumbele. Ijwi lyakwe, lyaamba kuti: “Ndime uulungulula makani aamamanino nikuba kuzwa kumatalikilo, uumulwiida makani naatana kuba.” (Isaya 46:10) Ino mbuti mbwaazwidilila?

Nkaambo nzi ncomweelede kuyandisisya kuzyiba mbwaakazwidilila Leza kujatikizya businsimi bwakwe bwakaindi? Ikuti nzyaamba sikwaamba mbobuca zilacitika mbubwena mbwaamba buzuba abuzuba kwaciindi cilamfu, sena inga tiimwabotelwa? Cakutazumbauzya inga mwabikkila maano ncaamba kujatikizya mbobutiice buzuba butobela. Mbubwenya buyo, ikuti mwazyiba kuti Leza wakasinsima kujatikizya zintu zimwi alimwi zyacitika ncobeni, masimpe inga mwayanda kuzyiba nzyasinsima kujatikizya ziyoocitika kumbele.

KUNYONYOONWA KWAMUNZI MUPATI:

Mucikozyanyo, inga caba cintu cigambya kusinsima munzila iiluzi kuti munzi mupati iwali muyumu kwamyaka minji uyoonyonyoonwa ino-ino. Kwiinda muli umwi wabasikumwaambilila,  Leza wakasinsima makani aali boobo aajatikizya kunyonyoonwa kwamunzi wa Nineve. (Zefaniya 2:13-15) Ino basyaazibwene mumakani aakaindi bakalemba nzi? Mumwaka wa 632 B.C.E., ambweni kakwiindide myaka iili 15 kuzwa Leza naakasinsima, bana Babuloni abana Medi bakasaala akunyonyoona munzi wa Nineve. Kuyungizya waawo, Leza wakaambila limwi kuti munzi wa Nineve uyooba “itongo, akuyuma mbuli inkanda.” Sena businsimi oobu bwakacitika mbubwenya mbokwakasinsimwa? Inzya. Nokuba kuti munzi ooyu atunzi twakauzingulukide bwakali busena bupati kusika ku 518 sq km, basikuzunda tiibakaweengelela munzi naa kuubelesya, kweelana ambokwakali kuyeeyelwa. Muciindi caboobo, bakaunyonyoona. Sena kuli basikulanga-langa twaambo twacisi bakali kukonzya kwaambila limwi zintu eezi munzila iiluzi boobu?

ZIFWUWA ZYABANTU ZIYOOTENTWA:

Ino nguni uukonzya kwaamba kuti inga waambilizya ciyoocitika kwainda myaaka iili 300, kwaamba zina lini amukowa wamuntu uuyootenta mafwuwa aabantu acipaililo, alimwi azina lyamunzi mocinoobede cipaililo eeco? Ikuti kusinsima kugambya kuli boobu kwacitika ncobeni, inga capa sikwaamba zyakumbele kuba aampuwo kapati. Muntu wa Leza wakaambilizya kuti: “Kuyoozyalwa mwana muluzubo lwa-Davida uuyootegwa Josiya  . . , azifuwa zyabantu ziyootentwa alinduwe” acipaililo cili mumunzi wa Beteli. (1 Bami 13:1, 2) Nokwakainda myaka iili 300, mwami wazina lya Josiya—zina litavwuli kwaambwa mu Bbaibbele—wakazyalwa mumukwasyi walunyungu lwa Davida. Mbubwena mbokwakasinsimwa, Josiya ‘wakatuma kuti bagwisye zifuwa omo mutubanda, akuzitenta acipaililo’ icakali ku Beteli. (2 Bami 23:14-16) Ino mbuti muntu mbwakonzya kwaamba bwini zintu mboziyoocitika kumbele kakunyina kusololelwa aanguzu ziinda zyabantu?

MAMANINO AABWAMI:

Inga cagambya ikuti muntu wazwidilila mukwaambila limwi zina lyamuntu—katanazyalwa—uuyooyendelezya kunyonyoonwa kwabulelo bupati bwanyika yoonse alimwi akwaamba nzila iigambya iyoobelesyegwa kucita boobo. Leza wakaambilizya kuti mwaalumi wazina lya Koresi wakali kuyoosaala akuzunda cisi. Kunze lyaboobo, Koresi wakali kuyakwaangununa baange ba Juda akugwasyilizya kuyaka tempele lyabo lisalala. Kuyungizya waawo, Leza wakaambila limwi zyakumbele kuti nzila njayoobelesya Koresi  iyoobikkilizya akuyuminizya milonga alimwi wakatondezya kuti milyango yamunzi iyoosiigwa kiitajedwe, kupa kuti cuube-ube kuzunda. (Isaya 44:27–45:2) Sena makani oonse aakasinsimwa a Leza akazuzikizyigwa kweelana anzyaakaamba? Basikulemba zyakaindi balazumina kuti ncobeni Koresi wakazunda. Impi yabasikalumamba ba Koresi yakabelesya nzila iigambya yakunyona maanzi aamumulonga umwi wamu Babuloni, calo cakapa kuti maanzi ayuminine mumulonga. Kuyungizya waawo, basikalumamba bakanjila mumunzi kwiinda mukubelesya milyango yakasiigwa kiitajedwe. Mpoonya Koresi wakaangununa ba Juda mubuzike akubaambila kuti bakali kukonzya kuyooyakulula tempele lyabo ku Jerusalemu. Eeci cakagambya nkaambo Koresi taakali kukomba Leza waba Juda pe. (Ezara 1:1-3) Sena kuli muntu uumbi wakali kukonzya kusinsima zintu eezi zyakacitika kaindi kunze lya Leza?

Twalanga-langa zikozyanyo zyotatwe zitondezya Leza mbwaakazuzikizya zintu nzyaakaambila limwi kuti zyakali kuyoocitika. Oobu tabuli mbobusinsimi bulikke buyo ibwakazuzikizyigwa. Musololeli waba Juda wakaamba makani aamasimpe ngobakazyi kabotu bantu banji ibakali kumuswiilila naakati: “Mulizi camyoyo yanu yoonse acamiyeeyo yanu yoonse kuti taakwe cintu niciba comwe icakawida ansi akati kazintu zibotu zyoonse Jehova Leza wanu nzyakaamba aandinywe. Zyoonse buyo zyakacitika, taakwe niciba comwe icakawida ansi.” Joshua 23:1, 2, 14. Bantu ba Joshua bakalibonena Leza mbwaakazwidilila mukuzuzikizya zisyomezyo zyakwe alimwi abusinsimi. Pele ino mbuti Leza mbwacita oobo? Kuli kwiindana kupati akati kanzila zya Leza azyabantu. Eeci cilayandika kapati kuti mucizyibe nkaambo Leza waambilizya kwaciindi cilamfwu zintu iziyoocitika ino-ino iziyoomujatikizya muyande mutayandi.

Nzyobaamba bantu kujatikizya zyakumbele kanji-kanji inga ziyeeme abuvwuntauzi bwasayaansi, kulanga-langa makani aamasimpe aaliko kale azimwi buyo, naa kubelesya luzyibo lwakubeja lwiinda lwabantu. Bamana kwaambila limwi zyakumbele, bantu bakkala buyo akulindila kuti babone citiicitike.—Tusimpi 27:1.

Pele Leza tali mbuli bantu, walo ulizizyi zyoonse. Ulizyi kabotu bantu mbobabede anzyobalombozya; aboobo, nasala kucita cintu cimwi, Leza ulakonzya kuzyibila limwi bantu alimwi amasi oonse nzyobayoocita. Pele Leza ulakonzya kucita kwiinda waawo. Ulakonzya kuzyeendelezya alimwi akucinca zintu kutegwa zicitike kweelana ambwayanda. Waamba kuti: ‘Ijwi lyangu lizwa kumulomo wangu. Talikooyooboola kulindime cabuyo pe, . . . liyoocita kabotu makani ngendalitumina.’ (Isaya 55:11) Aboobo zintu Leza nzyaasinsima zili mbuli kuti nkwaambilizya zintu ziyoocitika kumbele. Ulasinizya kuti nzyaamba zyazwidilila.

Sena kuli ngomukonzya kusyoma uukonzya kwaamba buumi bwanu bwakumbele mbobuyooba alimwi abwabayandwa banu? Ikuti kamuzyi kuti kulaboola guwo pati, mulakonzya kubweza ntaamu yakufwutula buumi bwanu. Mulakonzya kucita mbubwenya oobo kujatikizya businsimi bwamu Bbaibbele. Leza waambilizya kuti kucinca kupati kwanyika yoonse kuli afwaafwi kucitika. (Amubone kabbokesi kakuti: “ Zintu Zyakumbele Leza Nzyaayubununa.”) Buumi bwakumbele oobu buliindene kapati abuumi mbobaamba aabo balyaamba kuti mbaasyaazibwene mukwaambila limwi zintu ziyoocitika kumbele.

Mulakonzya kucaamba munzila eeyi: Makani aajatikizya nyika eeyi alijisi bubambe bubikkidwe kale. Akalembwa kale, alimwi tulakonzya kuzyibila limwi zyakumbele. Leza waamba kuti: “Ndime uulungulula makani aamamanino nikuba kuzwa kumatalikilo, . . . Ndati, Lulayo lwangu luyoozuzikizigwa, njoocita zyoonse nzinjanda.” (Isaya 46:10) Nywebo amukwasyi wanu mulakonzya kuba abuumi bubotu kumbele. Amubabuzye Bakamboni ba Jehova ncolyaamba Bbaibbele kujatikizya zintu zili afwaafwi kucitika. Bakamboni tabalyaambi kuti balijisi nguzu zyakwaambila limwi zyakumbele; naa kwaamba kuti kuli majwi aamyuuya ngobamvwa; naa kuba aanguzu zilibedelede zyakwaamba zyakumbele. Mbaasikwiiya Bbaibbele ibakonzya kumutondezya zintu zibotu eezyo Leza nzyaamubambila kumbele.