Ndakazyalilwa ku Poland mudolopo lisyoonto lili munsi-munsi aamunyinza wacisi ca German. Ndakali kupona buumi bwaluumuno, nkaambo dolopo eeli lyakazingulikidwe amafaamu alimwi azisaka. Bazyali bangu bakali kundikulwaizya kuba muntu uuli kabotu, uucita kabotu kucikolo, alimwi uuyandisya kuba alwiiyo lwaatala.

Mapenzi akatalika ciindi nindakaunka kuyunivesiti mudolopo lya Wrocław kuyakwiiya mulawo. Akaambo kakutakkala abazyali, ndakatalika kuyanzana abantu batali kabotu. Kuzwa kaindi ndakali kwiiyanda bbola yamaulu, pele akaambo kakuyungwa abalongwe bangu bapya, ndakatalika kwiiyandisisya kapati. Tiimu yabasibbola mbondakali kuyandisya kapati bakali kuzwa mudolopo lya Warsaw, cakuti kumamanino aansondo ndakali kubaccilila kufwumbwa nkobaunka kuyakuuma bbola. Munyendo eezyi zyakutobela basibbola, kwakali kunywa makoko, kubelesya misamu iikola alimwi akulwana abaabo ibakali kuyanda tiimu iyakali kuzundana atiimu yesu. Ndakali kubona kuti kupona buumi buli boobu kwakali kundigwasya kuluba mapenzi aangu, nokuba kuti ndakalizyi kuti, ikuti naa ndaangwa ndilakonzya kunyonganya lwiiyo lwangu.

Mebo abalongwe bangu twakali kuyandisya kuunka mumataveni alimwi amumaanda aakuzyanina. Katuli mumasena aaya, kanji-kanji twakali kujatikizyigwa mukulwana. Ndakaangwa kwaziindi zili mbozibede, pele lyoonse ndakali kucikonzya kweeleba milandu mipati, zimwi ziindi kwiinda mukubapa cisinkamulomo. Ndakali kuyeeya kuti ndakali kupona buumi bukkomanisya. Nokuba boobo, mumoyo ndakalizyi kuti nzyondakali kucita tiizyakali kabotu. Mvwiki amvwiki mu Nsondo ndakali kuunka kucikombelo ikusola kuumuzya manjezeezya aangu.

Mu 2004, Bakamboni ba Jehova bobilo bakakonkomona amulyango waŋanda yangu, mpoonya ndakazumina kubandika makani aamu Bbaibbele ambabo. Nondakazumanana kwiiya kujatikizya ncocaamba kuba Munakristo wakasimpe, manjezeezya aangu akatalika kundikatazya. Ndakalizyi kuti ndakeelede kuleka kuciindizya kunywa bukoko, kubelesya misamu iikola, alimwi akuyanzana abantu bataponi kweelana azyeelelo zyamu Bbaibbele. Alimwi ndakeelede kucinca bube bwangu bwakuyandisya nkondo. Nokuba kuti ndakalizyi kuti ndakeelede kucinca, ndakazumanana abukkale bwangu bubyaabi.

 Bumwi buzuba masiku ndakatalisya nkondo yakulwana abaalumi bali lusele, eeci cakapa kuti ndicince. Ndiliyeeyede kandaalabene ansi munzila, kabanduuma akundilyatauka kumutwe. Kandimvwide kuti ndakali afwaafwi kufwa, ndakapaila kuti: “Kondijatila O Jehova, akaambo kakutabikkila maano ku Jwi lyako. Ikuti naa ndipone, ndisyomezya kuti ndiyootalika kwiiya Bbaibbele a Bakamboni akucinca bukkale bwangu.” Icakandigambya ncakuti, ndakapona ncobeni. Ndakacibamba cisyomezyo cangu cakwiiya Bbaibbele.

Mu 2006, ndakalongela ku England. Makanze aangu akali aakuti ndikayandaule mali aakubelesya kutegwa ndipiluke ku Poland akuyoojana digili mulwiiyo lwaatala lwakwiiya Mulawo. Nondakazumanana kwiiya Bbaibbele, kuli lugwalo lomwe lwakandinjila kapati. Mwaapostolo Paulo wakalemba kuti: “Zintu zyoonse ndizibona kuti nzyabuyo akaambo kampindu mpati yaluzyibo lwa Kristo Jesu Mwami wangu. Akaambo kanguwe izintu zyoonse ndizibona kuti nzyabuyo akuti mulwi buyo wamafwuse, ikutegwa ndijane Kristo.” (Bafilipi 3:8) Mbubonya mbuli ndime, mwaapostolo Paulo awalo wakatambula lwiiyo lwamulawo—alimwi awalo wakali silunya kapati. (Milimo 8:3) Nokuba boobo, wakabona kuti kwakali nzila mbotu yakupona: nkokuti kubelekela Leza alimwi akwiiya cikozyanyo ca Jesu. Nondakazinzibala kuyeeya cikozyanyo ca Paulo, ndakabona kuti kuyandaula mulimo waatala alimwi akuba silunya tazikonzyi kundipa lukkomano lwini-lwini. Eeci cakandipa kusyoma kuti, ikuti naa Paulo wakacinca, andime inga ndacinca. Aboobo ndakasala buyo kukkala mu England akucileka kuyandaula digili mulwiiyo lwakwiiya mulawo.

Nondakazumanana kwiiya kujatikizya Jehova, ndakalimvwa kuba afwaafwi anguwe. Cisyomezyo cakwe cakuti ulalekelela boonse aabo ibayanda kucinca, cakandinjila kapati mumoyo. (Milimo 2:38) Kuyungizya waawo, nondakazinzibala kuyeeya lugwalo lwa 1 Johane 4:16, ilwaamba kuti “Leza nduyando,” ndakakabona kaambo Leza ncataiyandili nkondo.

Alimwi ndakakkomana kapati kubona mbobakali kulilemeka Bakamboni. Ndakalibonena caantangalala kuti bakali kusoleka kupona kweelana azyeelelo zisumpukide zyamu Bbaibbele zyakulilemeka. Andime ndakali kuyanda kuba akati kababunyina bakkomene. Nondakamana kubeleka canguzu akucinca buumi bwangu, ndakabbapatizyigwa mu 2008 akuba Kamboni wa Jehova.

Bbaibbele lyakandicinca kuzwa kukuba muntu wakajisi makanze aakuba alwiiyo lwaatala, silunya, sikubelesya misamu iikola, cakolwa, alimwi sikuyandisya bbola. Mpoonya ndakaba mubelesi wa Leza uukkomana kuyiisya bamwi kujatikizya Bbaibbele. Noliba lino ndilaiyanda bbola, pele zyakulikondelezya ndizibikka mubusena bweelede.

Lino ndakakwata Munakristoma, wazina lya Esther. Tulakkomana kapati kuyiisya bantu Bbaibbele ibabelesya mwaambo waku Poland ibakkala kunyika lwaambo ku England. Tandinalimvwide kukkutila boobu mubuumi bwangu. Ndijisi manjezeezya aasalala alimwi ndipona buumi bukkomanisya.