MAKANI AAYEEME AMUTWE UULI ACIVWUMBYO | INO LEZA ULIMVWA BUTI KUJATIKIZYA NKONDO?
Leza Mbwaakali Kulimvwa Kujatikizya Nkondo Mumwaanda Wamyaka Wakusaanguna
Bantu bakali kupenzyegwa citaambiki. Mbubwenya mbuli basikale babo, ba Juda bamumwaanda wamyaka wakusaanguna cakwiinduluka-induluka bakapaila kuli Leza kutegwa abagwasye kuzwa mujoko liminya lya Bulelo Bwabana Roma. Mpoonya bakamvwa makani aajatikizya Jesu. Sena wakali kuyooba ngo Mesiya wakasyomezyedwe? Tacigambyi kuti bantu banji “bakali kulangila kuti mwaalumi ooyu wakali kuyoofwutula bana Israyeli” kuzwa kuli basikudyaaminina bana Roma. (Luka 24:21) Pele kunyina lugwasyo ndobakatambula. Muciindi caboobo, mu 70 C.E., impi zyabana Roma zyakaboola akunyonyoona Jerusalemu alimwi atempele.
Ino ncinzi cakacitika? Nkaambo nzi Leza ncaatakabalwanina ba Juda mbuli mbwaakali kucita kaindi? Ino nkaambo nzi ncaatakabazumizya kuti balwane kutegwa balivwune kuli basikubadyaaminina? Sena Leza wakalicincide mbwaakali kulimvwa kujatikizya nkondo? Peepe. Pele kuli cintu cimwi cakacinca cakutayeeyela kujatikizya ba Juda. Bakamukaka mwana wa Leza, Jesu, kuti ngu Mesiya. (Milimo 2:36) Aboobo, bakasweekelwa coolwe caalubazu ncobakajisi cakuba balongwe ba Leza kabali cisi.—Matayo 23:37, 38.
Cisi caba Juda alimwi a Nyika yabo Yakasyomezyedwe tiizyakacili kukwabililwa a Leza, alimwi ba Juda tiibakacili kukonzya alimwi kulwana nkondo iyakali kuzumizyigwa a Leza. Mbubwenya mbuli Jesu mbwaakaamba, zilongezyo izyakaswaangene akukkomaninwa a Leza zyakalonzyegwa kuzwa kubana Israyeli bakumubili kuya kucisi cipya, cisi cakumuuya, calo Bbaibbele ncolyaamba kuti ‘ba Israyeli ba Leza.’ (Bagalatiya 6:16; Matayo 21:43) Mbungano ya Banakristo bananikidwe amuuya yakatondezya kuti mba Israyeli ba Leza bakumuuya. Bakaambilwa caantangalala mumwaanda wamyaka wakusaanguna kuti: “Lino muli ciinga ca Leza.”—1 Petro 2:9, 10.
Mbwaanga lino Banakristo bamumwaanda wamyaka wakusaanguna bakaba “ciinga ca Leza,” sena Leza wakabalwanina kutegwa baangununwe kukudyaaminina kwabana Roma? Naa sena wakabazumizya kulwana basinkondonyina? Peepe, tanaakabazumizya pe. Ino nkaambo nzi? Ikuti Leza ngowazumizya nkondo, nkokuti ngowakali kusala ciindi nkondo eeyo noyakeelede kulwanwa, kweelana ambokwatondezyegwa mucibalo cainda. Leza kunyina naakabalwanina nkondo Banakristo bamumwaanda wamyaka wakusaanguna, naa kubazumizya kuti balo kubagama balwane. Cilisalede kuti, mumwaanda wamyaka wakusaanguna tiicakali ciindi cakuti Leza alwane nkondo yakumana bubi alunya.
Aboobo, mbubwenya mbuli babelesi ba Leza bakaindi, Banakristo bamumwaanda wamyaka wakusaanguna bakeelede kulindila mane kusikila ciindi Leza ncaakeelede kumana bubi alunya. Aciindi eeci Leza tanaakabazumizyide kulwana basinkondonyina. Jesu Kristo wakakasalazya kaambo aaka mukuyiisya kwakwe. Mucikozyanyo, kunyina naakayiisya basikumutobela kuti kabalwana, muciindi caboobo wakabaambila kuti: “Amuzumanane kuyanda basinkondonyoko akubapailila aabo bamupenzya.” (Matayo 5:44) Kasinsima ciindi Jerusalemu wamumwaanda wamyaka wakusaanguna naakali kuyoolwanwa ampi yabana Roma, Jesu wakalailila basikwiiya bakwe kuti bakeelede kutija, kutali kulwana pe—alimwi bakacita mbubwenya oobo.—Luka 21:20, 21.
Kuyungizya waawo, kwiinda mukusololelwa amuuya mwaapostolo Paulo wakalemba kuti: “Mutapilusizyi muntu cibi, . . . nkaambo kulembedwe kuti: ‘Ndime ndisubula; ndime nendiyoopilusya cibi,’ mbwaamba Jehova.” (Baroma 12:19) Paulo wakali kuzubulula ncaakaambide Leza myaanda yamyaka musyule kweelana ambokulembedwe mulugwalo lwa Levitiko 19:18 alimwi a Deuteronomo 32:35. Kweelana ambotwabona mucibalo cainda, nzila imwi Leza njaakali kulwanina bantu bakwe kaindi, nkwiinda mukubagwasya ciindi nobakali kulwana abasinkondonyina. Aboobo majwi aa Paulo atondezya kuti Leza mbwaakali kulimvwa kujatikizya nkondo tanaakalinacinca pe. Mumwaanda wamyaka wakusaanguna, Leza wakacili kubona nkondo kuti yakali nzila yeelede yakulwanina babelesi bakwe alimwi akumana misyobo yoonse yakudyaaminina abubi. Nokuba boobo, mbubwenya mbocakabede kaindi, Leza ngowakali kusala ciindi nokwakeelede kuba nkondo alimwi abaabo ibakeelede kutola lubazu.
Cilisalede kuti Leza tanaakabazumizyide Banakristo bamumwaanda wamyaka wakusaanguna kulwana nkondo. Ino mbuti kujatikizya mazuba aano? Sena kuli nkamu yabantu iili yoonse Leza njazumizya kulwana nkondo? Naa sena eecino nceciindi Leza nayelede kunjilila munkondo akulwanina babelesi bakwe? Ino mubwini Leza ulimvwa buti kujatikizya nkondo mazuba aano? Cibalo camamanino muzibalo eezyi zitobelana cilayiingula mibuzyo eeyi.
