Mabbiza aaya alabalika kapati! Mabbiza one aalaanguzu alimwi abaabo batantide alingawo, alipanduludwe munzila iilimvwisya kapati cakuti cili mbuli kuti tulicibwene cicitika ciindi notubala Bbaibbele! Bbiza lyakusaanguna lilatuba—ooyo uutantide alindilyo, mwami mupya uulemekwa iwakapegwa musini. Musyule lyakwe kutobela bbiza lisalala pyu mbuli mulilo, uutantide alindilyo ugusya luumuno munyika yoonse. Mpoonya kutobela bbiza lyatatu, lisiya mbi, uutantide alindilyo ujisi cikkelo mumaanza ciindi mulumbe uusisya nowaambilizyigwa kujatikizya kubula kwazyakulya. Bbiza lyane lilatuba-tuba alimwi lilibonya kuciswa, ooyo uutantide alindilyo ujisi zina lyakuti Lufwu, iluboola kwiinda mumalwazi alimwi antenda zimbi. Alimwi Cuumbwe, muzikkilwa bantu boonse, cilatobela akutola bantu banji mulincico!—Ciyubunuzyo 6:1-8.

“Ciindi cakusaanguna nondakabala kujatikizya basimabbiza bone ndakayoowa kapati. Ndakalimvwa mbuli kuti Buzuba Bwalubeta bwakali afwaafwi alimwi akuti mbwaanga tiindakalibambilide, tiindakali kukonzya kuyoofwutuka pe.”—Ba Crystal.

“Ndakakkomana kapati kujatikizya mabbiza one aamibala-mibala alimwi abaabo bakatantide alingawo. Nondakacimvwisya ncocakali kupandulula cilengaano, ndakasalalilwa.”—Ba Ed.

Sena inga mwalimvwa mbobakalimvwa ba Crystal kujatikizya basimabbiza bone bamu Ciyubunuzyo? Naa inga mwalimvwa mbobakalimvwa ba Ed? Mumbazu zyoonse zyobilo, makani aabasimabbiza aali akati kamakani aazyibidwe kapati aali mu Ciyubunuzyo, bbuku lyamamanino lyamu Bbaibbele. Sena mulizyi kuti mulakonzya kugwasyigwa kwiinda mukumvwisya cilengaano eeci? Munzila nzi? Leza usyomezya kuti mulakonzya kujana lukkomano lwini-lwini kwiinda mukubala, kwiiya, alimwi akupona kweelana azintu zilembedwe mubbuku lyabusinsimi eeli.—Ciyubunuzyo 1:1-3.

Nokuba kuti bamwi balayoowa kujatikizya cilengaano cabasimabbiza bone, tacibambilidwe kumuyoosya pe. Mubwini, bantu banji bajana kuti cilengaano eeci ciyumya lusyomo lwabo alimwi mane buya akubagwasya kulangila kuzintu zibotu ziboola kumbele. Andinywe cilakonzya kumugwasya munzila eeyi! Mwakulwaizyigwa kuti muzumanane kubala.